{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdg003.htm","path":"bib/vul/jdg003.htm","source_url":"https://sacred-texts.com/bib/vul/jdg003.htm","text":"1 H\u00e6 sunt gentes quas Dominus dereliquit, ut erudiret in eis Isra\u00eblem, et omnes qui non noverant bella Chanan\u00e6orum:\n2 ut postea discerent filii eorum certare cum hostibus, et habere consuetudinem pr\u00e6liandi:\n3 quinque satrapas Philisthinorum, omnemque Chanan\u00e6um, et Sidonium, atque Hev\u00e6um, qui habitabat in monte Libano, de monte Baal Hermon usque ad introitum Emath.\n4 Dimisitque eos, ut in ipsis experiretur Isra\u00eblem, utrum audiret mandata Domini qu\u00e6 pr\u00e6ceperat patribus eorum per manum Moysi, an non.\n5 Itaque filii Isra\u00ebl habitaverunt in medio Chanan\u00e6i, et Heth\u00e6i, et Amorrh\u00e6i, et Pherez\u00e6i, et Hev\u00e6i, et Jebus\u00e6i:\n6\u00a0et duxerunt uxores filias eorum, ipsique filias suas filiis eorum tradiderunt, et servierunt diis eorum.\n \n7 Feceruntque malum in conspectu Domini, et obliti sunt Dei sui, servientes Baalim et Astaroth.\n8 Iratusque contra Isra\u00ebl Dominus, tradidit eos in manus Chusan Rasathaim regis Mesopotami\u00e6, servieruntque ei octo annis.\n9 Et clamaverunt ad Dominum, qui suscitavit eis salvatorem, et liberavit eos, Othoniel videlicet filium Cenez, fratrem Caleb minorem:\n10 fuitque in eo spiritus Domini, et judicavit Isra\u00ebl. Egressusque est ad pugnam, et tradidit Dominus in manus ejus Chusan Rasathaim regem Syri\u00e6, et oppressit eum.\n11\u00a0Quievitque terra quadraginta annis, et mortuus est Othoniel filius Cenez.\n \n12 Addiderunt autem filii Isra\u00ebl facere malum in conspectu Domini: qui confortavit adversum eos Eglon regem Moab, quia fecerunt malum in conspectu ejus.\n13 Et copulavit ei filios Ammon, et Amalec: abiitque et percussit Isra\u00ebl, atque possedit urbem palmarum.\n14 Servieruntque filii Isra\u00ebl Eglon regi Moab decem et octo annis.\n15 Et postea clamaverunt ad Dominum, qui suscitavit eis salvatorem vocabulo Aod, filium Gera, filii Jemini, qui utraque manu pro dextera utebatur. Miseruntque filii Isra\u00ebl per illum munera Eglon regi Moab.\n16 Qui fecit sibi gladium ancipitem, habentem in medio capulum longitudinis palm\u00e6 manus, et accinctus est eo subter sagum in dextro femore.\n17 Obtulitque munera Eglon regi Moab. Erat autem Eglon crassus nimis.\n18 Cumque obtulisset ei munera, prosecutus est socios, qui cum eo venerant.\n19 Et reversus de Galgalis, ubi erant idola, dixit ad regem: Verbum secretum habeo ad te, o rex. Et ille imperavit silentium: egressisque omnibus qui circa eum erant,\n20 ingressus est Aod ad eum: sedebat autem in \u00e6stivo c\u0153naculo solus: dixitque: Verbum Dei habeo ad te. Qui statim surrexit de throno.\n21 Extenditque Aod sinistram manum, et tulit sicam de dextro femore suo, infixitque eam in ventre ejus\n22 tam valide, ut capulus sequeretur ferrum in vulnere, ac pinguissimo adipe stringeretur. Nec eduxit gladium, sed ita ut percusserat, reliquit in corpore: statimque per secreta natur\u00e6 alvi stercora proruperunt.\n23 Aod autem clausis diligentissime ostiis c\u0153naculi, et obfirmatis sera,\n24 per posticum egressus est. Servique regis ingressi viderunt clausas fores c\u0153naculi, atque dixerunt: Forsitan purgat alvum in \u00e6stivo cubiculo.\n25\u00a0Expectantesque diu donec erubescerent, et videntes quod nullus aperiret, tulerunt clavem: et aperientes invenerunt dominum suum in terra jacentem mortuum.\n \n26 Aod autem, dum illi turbarentur, effugit, et pertransiit locum idolorum, unde reversus fuerat. Venitque in Seirath:\n27 et statim insonuit buccina in monte Ephraim, descenderuntque cum eo filii Isra\u00ebl, ipso in fronte gradiente.\n28 Qui dixit ad eos: Sequimini me: tradidit enim Dominus inimicos nostros Moabitas in manus nostras. Descenderuntque post eum, et occupaverunt vada Jordanis qu\u00e6 transmittunt in Moab: et non dimiserunt transire quemquam:\n29 sed percusserunt Moabitas in tempore illo, circiter decem millia, omnes robustos et fortes viros. Nullus eorum evadere potuit.\n30\u00a0Humiliatusque est Moab in die illo sub manu Isra\u00ebl: et quievit terra octoginta annis.\n \n31 Post hunc fuit Samgar filius Anath, qui percussit de Philisthiim sexcentos viros vomere: et ipse quoque defendit Isra\u00ebl.","title":"Vulgate: Judges: Judges Chapter 3","type":"page"}