{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdg004.htm","path":"bib/vul/jdg004.htm","source_url":"https://sacred-texts.com/bib/vul/jdg004.htm","text":"1 Addideruntque filii Isra\u00ebl facere malum in conspectu Domini post mortem Aod,\n2 et tradidit illos Dominus in manus Jabin regis Chanaan, qui regnavit in Asor: habuitque ducem exercitus sui nomine Sisaram, ipse autem habitabat in Haroseth gentium.\n3 Clamaveruntque filii Isra\u00ebl ad Dominum: nongentos enim habebat falcatos currus, et per viginti annos vehementer oppresserat eos.\n4 Erat autem Debbora prophetis uxor Lapidoth, qu\u00e6 judicabat populum in illo tempore.\n5 Et sedebat sub palma, qu\u00e6 nomine illius vocabatur, inter Rama et Bethel in monte Ephraim: ascendebantque ad eam filii Isra\u00ebl in omne judicium.\n6 Qu\u00e6 misit et vocavit Barac filium Abino\u00ebm de Cedes Nephthali: dixitque ad eum: Pr\u00e6cepit tibi Dominus Deus Isra\u00ebl: Vade, et duc exercitum in montem Thabor, tollesque tecum decem millia pugnatorum de filiis Nephthali, et de filiis Zabulon:\n7 ego autem adducam ad te in loco torrentis Cison, Sisaram principem exercitus Jabin, et currus ejus, atque omnem multitudinem, et tradam eos in manu tua.\n8 Dixitque ad eam Barac: Si venis mecum, vadam: si nolueris venire mecum, non pergam.\n9 Qu\u00e6 dixit ad eum: Ibo quidem tecum, sed in hac vice victoria non reputabitur tibi, quia in manu mulieris tradetur Sisara. Surrexit itaque Debbora, et perrexit cum Barac in Cedes.\n10 Qui, accitis Zabulon et Nephthali, ascendit cum decem millibus pugnatorum, habens Debboram in comitatu suo.\n11 Haber autem Cin\u00e6us recesserat quondam a ceteris Cin\u00e6is fratribus suis, filiis Hobab cognati Moysi: et tetenderat tabernacula usque ad vallem, qu\u00e6 vocatur Sennim, et erat juxta Cedes.\n12 Nuntiatumque est Sisar\u00e6 quod ascendisset Barac filius Abino\u00ebm in montem Thabor:\n13 et congregavit nongentos falcatos currus, et omnem exercitum de Haroseth gentium ad torrentem Cison.\n14 Dixitque Debbora ad Barac: Surge, h\u00e6c est enim dies, in qua tradidit Dominus Sisaram in manus tuas: en ipse ductor est tuus. Descendit itaque Barac de monte Thabor, et decem millia pugnatorum cum eo.\n15 Perterruitque Dominus Sisaram, et omnes currus ejus, universamque multitudinem in ore gladii ad conspectum Barac: in tantum, ut Sisara de curru desiliens, pedibus fugeret,\n16\u00a0et Barac persequeretur fugientes currus, et exercitum usque ad Haroseth gentium, et omnis hostium multitudo usque ad internecionem caderet.\n \n17 Sisara autem fugiens pervenit ad tentorium Jahel uxoris Haber Cin\u00e6i. Erat enim pax inter Jabin regem Asor, et domum Haber Cin\u00e6i.\n18 Egressa igitur Jahel in occursum Sisar\u00e6, dixit ad eum: Intra ad me, domine mi: intra, ne timeas. Qui ingressus tabernaculum ejus, et opertus ab ea pallio,\n19 dixit ad eam: Da mihi, obsecro, paululum aqu\u00e6, quia sitio valde. Qu\u00e6 aperuit utrem lactis, et dedit ei bibere, et operuit illum.\n20 Dixitque Sisara ad eam: Sta ante ostium tabernaculi: et cum venerit aliquis interrogans te, et dicens: Numquid hic est aliquis? respondebis: Nullus est.\n21 Tulit itaque Jahel uxor Haber clavum tabernaculi, assumens pariter et malleum: et ingressa abscondite et cum silentio, posuit supra tempus capitis ejus clavum, percussumque malleo defixit in cerebrum usque ad terram: qui soporem morti consocians defecit, et mortuus est.\n22 Et ecce Barac sequens Sisaram veniebat: egressaque Jahel in occursum ejus, dixit ei: Veni, et ostendam tibi virum quem qu\u00e6ris. Qui cum intrasset ad eam, vidit Sisaram jacentem mortuum, et clavum infixum in tempore ejus.\n23 Humiliavit ergo Deus in die illo Jabin regem Chanaan coram filiis Isra\u00ebl:\n24 qui crescebant quotidie, et forti manu opprimebant Jabin regem Chanaan, donec delerent eum.","title":"Vulgate: Judges: Judges Chapter 4","type":"page"}