{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdg005.htm","path":"bib/vul/jdg005.htm","source_url":"https://sacred-texts.com/bib/vul/jdg005.htm","text":"1 Cecineruntque Debbora et Barac filius Abino\u00ebm in illo die, dicentes:\n2\u00a0[Qui sponte obtulistis de Isra\u00ebl animas vestras ad periculum,\n benedicite Domino.\n3\u00a0Audite, reges; auribus percipite, principes:\n ego sum, ego sum, qu\u00e6 Domino canam,\n psallam Domino Deo Isra\u00ebl.\n4\u00a0Domine, cum exires de Seir,\n et transires per regiones Edom,\n terra mota est,\n c\u00e6lique ac nubes distillaverunt aquis.\n5\u00a0Montes fluxerunt a facie Domini,\n et Sinai a facie Domini Dei Isra\u00ebl.\n6\u00a0In diebus Samgar filii Anath,\n in diebus Jahel quieverunt semit\u00e6:\n et qui ingrediebantur per eas,\n ambulaverunt per calles devios.\n7\u00a0Cessaverunt fortes in Isra\u00ebl, et quieverunt:\n donec surgeret Debbora,\n surgeret mater in Isra\u00ebl.\n8\u00a0Nova bella elegit Dominus,\n et portas hostium ipse subvertit:\n clypeus et hasta si apparuerint\n in quadraginta millibus Isra\u00ebl.]\n \n9\u00a0[Cor meum diligit principes Isra\u00ebl:\n qui propria voluntate obtulistis vos discrimini,\n benedicite Domino.\n10\u00a0Qui ascenditis super nitentes asinos,\n et sedetis in judicio,\n et ambulatis in via,\n loquimini.\n11\u00a0Ubi collisi sunt currus,\n et hostium suffocatus est exercitus,\n ibi narrentur justiti\u00e6 Domini,\n et clementia in fortes Isra\u00ebl:\n tunc descendit populus Domini ad portas,\n et obtinuit principatum.\n12\u00a0Surge, surge Debbora;\n surge, surge, et loquere canticum:\n surge Barac, et apprehende captivos tuos, fili Abino\u00ebm.\n13\u00a0Salvat\u00e6 sunt reliqui\u00e6 populi:\n Dominus in fortibus dimicavit.\n14\u00a0Ex Ephraim delevit eos in Amalec,\n et post eum ex Benjamin in populos tuos, o Amalec:\n de Machir principes descenderunt,\n et de Zabulon qui exercitum ducerent ad bellandum.\n15\u00a0Duces Issachar fuere cum Debbora,\n et Barac vestigia sunt secuti,\n qui quasi in pr\u00e6ceps ac barathrum se discrimini dedit:\n diviso contra se Ruben,\n magnanimorum reperta est contentio.\n16\u00a0Quare habitas inter duos terminos,\n ut audias sibilos gregum?\n diviso contra se Ruben,\n magnanimorum reperta est contentio.\n17\u00a0Galaad trans Jordanem quiescebat,\n et Dan vacabat navibus:\n Aser habitabat in littore maris,\n et in portubus morabatur.\n18\u00a0Zabulon vero et Nephthali obtulerunt animas suas morti\n in regione Merome.]\n \n19\u00a0[Venerunt reges et pugnaverunt:\n pugnaverunt reges Chanaan\n in Thanach juxta aquas Mageddo,\n et tamen nihil tulere pr\u00e6dantes.\n20\u00a0De c\u00e6lo dimicatum est contra eos:\n stell\u00e6 manentes in ordine et cursu suo,\n adversus Sisaram pugnaverunt.\n21\u00a0Torrens Cison traxit cadavera eorum,\n torrens Cadumim, torrens Cison:\n conculca, anima mea, robustos.\n22\u00a0Ungul\u00e6 equorum ceciderunt, fugientibus impetu,\n et per pr\u00e6ceps ruentibus fortissimis hostium.\n23\u00a0Maledicite terr\u00e6 Meroz, dixit angelus Domini:\n maledicite habitatoribus ejus,\n quia non venerunt ad auxilium Domini,\n in adjutorium fortissimorum ejus.]\n \n24\u00a0[Benedicta inter mulieres Jahel uxor Haber Cin\u00e6i,\n et benedicatur in tabernaculo suo.\n25\u00a0Aquam petenti lac dedit,\n et in phiala principum obtulit butyrum.\n26\u00a0Sinistram manum misit ad clavum,\n et dexteram ad fabrorum malleos.\n Percussitque Sisaram qu\u00e6rens in capite vulneri locum,\n et tempus valide perforans:\n27\u00a0inter pedes ejus ruit; defecit, et mortuus est:\n volvebatur ante pedes ejus,\n et jacebat exanimis et miserabilis.\n28\u00a0Per fenestram respiciens, ululabat mater ejus:\n et de c\u0153naculo loquebatur:\n Cur moratur regredi currus ejus?\n quare tardaverunt pedes quadrigarum illius?\n29\u00a0Una sapientior ceteris uxoribus ejus,\n h\u00e6c socrui verba respondit:\n30\u00a0Forsitan nunc dividit spolia,\n et pulcherrima feminarum eligitur ei:\n vestes diversorum Sisar\u00e6 traduntur in pr\u00e6dam,\n et supellex varia ad ornanda colla congeritur.\n31\u00a0Sic pereant omnes inimici tui, Domine:\n qui autem diligunt te, sicut sol in ortu suo splendet, ita rutilent.]\n32 Quievitque terra per quadraginta annos.","title":"Vulgate: Judges: Judges Chapter 5","type":"page"}