{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdg010.htm","path":"bib/vul/jdg010.htm","source_url":"https://sacred-texts.com/bib/vul/jdg010.htm","text":"1 Post Abimelech surrexit dux in Isra\u00ebl Thola filius Phua patrui Abimelech, vir de Issachar, qui habitavit in Samir montis Ephraim:\n2 et judicavit Isra\u00eblem viginti et tribus annis, mortuusque est, ac sepultus in Samir.\n3 Huic successit Jair Galaadites, qui judicavit Isra\u00ebl per viginti et duos annos,\n4 habens triginta filios sedentes super triginta pullos asinarum, et principes triginta civitatum, qu\u00e6 ex nomine ejus sunt appellat\u00e6 Havoth Jair, id est, oppida Jair, usque in pr\u00e6sentem diem, in terra Galaad.\n5\u00a0Mortuusque est Jair, ac sepultus in loco cui est vocabulum Camon.\n \n6 Filii autem Isra\u00ebl peccatis veteribus jungentes nova, fecerunt malum in conspectu Domini, et servierunt idolis, Baalim et Astaroth, et diis Syri\u00e6 ac Sidonis et Moab et filiorum Ammon et Philisthiim: dimiseruntque Dominum, et non coluerunt eum.\n7 Contra quos Dominus iratus, tradidit eos in manus Philisthiim et filiorum Ammon.\n8 Afflictique sunt, et vehementer oppressi per annos decem et octo, omnes qui habitabant trans Jordanem in terra Amorrh\u00e6i, qui est in Galaad:\n9 in tantum ut filii Ammon, Jordane transmisso, vastarent Judam et Benjamin et Ephraim: afflictusque est Isra\u00ebl nimis.\n10 Et clamantes ad Dominum, dixerunt: Peccavimus tibi, quia dereliquimus Dominum Deum nostrum, et servivimus Baalim.\n11 Quibus locutus est Dominus: Numquid non \u00c6gyptii et Amorrh\u00e6i, filiique Ammon et Philisthiim,\n12 Sidonii quoque et Amalec et Chanaan oppresserunt vos, et clamastis ad me, et erui vos de manu eorum?\n13 Et tamen reliquistis me, et coluistis deos alienos: idcirco non addam ut ultra vos liberem:\n14 ite, et invocate deos quos elegistis: ipsi vos liberent in tempore angusti\u00e6.\n15 Dixeruntque filii Isra\u00ebl ad Dominum: Peccavimus, redde tu nobis quidquid tibi placet: tantum nunc libera nos.\n16 Qu\u00e6 dicentes, omnia de finibus suis alienorum deorum idola projecerunt, et servierunt Domino Deo: qui doluit super miseriis eorum.\n17 Itaque filii Ammon conclamantes in Galaad fixere tentoria, contra quos congregati filii Isra\u00ebl in Maspha castrametati sunt.\n18 Dixeruntque principes Galaad singuli ad proximos suos: Qui primus ex nobis contra filios Ammon c\u0153perit dimicare, erit dux populi Galaad.","title":"Vulgate: Judges: Judges Chapter 10","type":"page"}