{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdg017.htm","path":"bib/vul/jdg017.htm","source_url":"https://sacred-texts.com/bib/vul/jdg017.htm","text":"1 Fuit eo tempore vir quidam de monte Ephraim nomine Michas,\n2 qui dixit matri su\u00e6: Mille et centum argenteos, quos separaveras tibi, et super quibus me audiente juraveras, ecce ego habeo, et apud me sunt. Cui illa respondit: Benedictus filius meus Domino.\n3 Reddidit ergo eos matri su\u00e6, qu\u00e6 dixerat ei: Consecravi et vovi hoc argentum Domino, ut de manu mea suscipiat filius meus, et faciat sculptile atque conflatile: et nunc trado illud tibi.\n4 Reddidit igitur eos matri su\u00e6: qu\u00e6 tulit ducentos argenteos, et dedit eos argentario, ut faceret ex eis sculptile atque conflatile, quod fuit in domo Mich\u00e6.\n5 Qui \u00e6diculam quoque in ea deo separavit, et fecit ephod, et theraphim, id est, vestem sacerdotalem, et idola: implevitque unius filiorum suorum manum, et factus est ei sacerdos.\n6\u00a0In diebus illis non erat rex in Isra\u00ebl, sed unusquisque quod sibi rectum videbatur, hoc faciebat.\n \n7 Fuit quoque alter adolescens de Bethlehem Juda, ex cognatione ejus: eratque ipse Levites, et habitabat ibi.\n8 Egressusque de civitate Bethlehem, peregrinari voluit ubicumque sibi commodum reperisset. Cumque venisset in montem Ephraim, iter faciens, et declinasset parumper in domum Mich\u00e6,\n9 interrogatus est ab eo unde venisset. Qui respondit: Levita sum de Bethlehem Juda, et vado ut habitem ubi potuero, et utile mihi esse perspexero.\n10 Dixitque Michas: Mane apud me, et esto mihi parens ac sacerdos: daboque tibi per annos singulos decem argenteos, ac vestem duplicem, et qu\u00e6 ad victum sunt necessaria.\n11 Acquievit, et mansit apud hominem, fuitque illi quasi unus de filiis.\n12 Implevitque Michas manum ejus, et habuit puerum sacerdotem apud se:\n13 Nunc scio, dicens, quod benefaciet mihi Deus habenti Levitici generis sacerdotem.","title":"Vulgate: Judges: Judges Chapter 17","type":"page"}