{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdt004.htm","path":"bib/vul/jdt004.htm","source_url":"https://sacred-texts.com/bib/vul/jdt004.htm","text":"1 Tunc audientes h\u00e6c filii Isra\u00ebl qui habitabant in terra Juda, timuerunt valde a facie ejus.\n2 Tremor et horror invasit sensus eorum, ne hoc faceret Jerusalem et templo Domini, quod fecerat ceteris civitatibus et templis earum.\n3 Et miserunt in omnem Samariam per circuitum usque Jericho, et pr\u00e6occupaverunt omnes vertices montium:\n4 et muris circumdederunt vicos suos, et congregaverunt frumenta in pr\u00e6parationem pugn\u00e6.\n5 Sacerdos etiam Eliachim scripsit ad universos qui erant contra Esdrelon, qu\u00e6 est contra faciem campi magni juxta Dothain, et universos per quos vi\u00e6 transitus esse poterat,\n6 ut obtinerent ascensus montium, per quos via esse poterat ad Jerusalem, et illic custodirent ubi angustum iter esse poterat inter montes.\n7 Et fecerunt filii Isra\u00ebl secundum quod constituerat eis sacerdos Domini Eliachim.\n8 Et clamavit omnis populus ad Dominum instantia magna, et humiliaverunt animas suas in jejuniis et orationibus, ipsi et mulieres eorum.\n9 Et induerunt se sacerdotes ciliciis, et infantes prostraverunt contra faciem templi Domini, et altare Domini operuerunt cilicio:\n10 et clamaverunt ad Dominum Deum Isra\u00ebl unanimiter ne darentur in pr\u00e6dam infantes eorum, et uxores eorum in divisionem, et civitates eorum in exterminium, et sancta eorum in pollutionem, et fierent opprobrium gentibus.\n11 Tunc Eliachim sacerdos Domini magnus circuivit omnem Isra\u00ebl, allocutusque est eos,\n12 dicens: Scitote quoniam exaudiet Dominus preces vestras, si manentes permanseritis in jejuniis et orationibus in conspectu Domini.\n13 Memores estote Moysi servi Domini, qui Amalec confidentem in virtute sua, et in potentia sua, et in exercitu suo, et in clypeis suis, et in curribus suis, et in equitibus suis, non ferro pugnando, sed precibus sanctis orando dejecit:\n14 sic erunt universi hostes Isra\u00ebl, si perseveraveritis in hoc opere quod c\u0153pistis.\n15 Ad hanc igitur exhortationem ejus deprecantes Dominum, permanebant in conspectu Domini,\n16 ita ut etiam hi qui offerebant Domino holocausta, pr\u00e6cincti ciliciis offerrent sacrificia Domino, et erat cinis super capita eorum.\n17 Et ex toto corde suo omnes orabant Deum, ut visitaret populum suum Isra\u00ebl.","title":"Vulgate: Judith: Judith Chapter 4","type":"page"}