{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdt005.htm","path":"bib/vul/jdt005.htm","source_url":"https://sacred-texts.com/bib/vul/jdt005.htm","text":"1 Nuntiatumque est Holoferni principi militi\u00e6 Assyriorum, quod filii Isra\u00ebl pr\u00e6pararent se ad resistendum, ac montium itinera conclusissent:\n2 et furore nimio exarsit in iracundia magna, vocavitque omnes principes Moab et duces Ammon,\n3 et dixit eis: Dicite mihi quis sit populus iste, qui montana obsidet: aut qu\u00e6, et quales, et quant\u00e6 sint civitates eorum: qu\u00e6 etiam sit virtus eorum, aut qu\u00e6 sit multitudo eorum, vel quis rex militi\u00e6 illorum:\n4\u00a0et quare pr\u00e6 omnibus qui habitant in oriente, isti contempserunt nos, et non exierunt obviam nobis ut susciperent nos cum pace?\n \n5 Tunc Achior dux omnium filiorum Ammon respondens, ait: Si digneris audire, domine mi, dicam veritatem in conspectu tuo de populo isto qui in montanis habitat, et non egredietur verbum falsum ex ore meo.\n6 Populus iste ex progenie Chald\u00e6orum est.\n7 Hic primum in Mesopotamia habitavit, quoniam noluerunt sequi deos patrum suorum, qui erant in terra Chald\u00e6orum.\n8 Deserentes itaque c\u00e6remonias patrum suorum, qu\u00e6 in multitudine deorum erant,\n9 unum Deum c\u00e6li coluerunt, qui et pr\u00e6cepit eis ut exirent inde et habitarent in Charan. Cumque operuisset omnem terram fames, descenderunt in \u00c6gyptum, illicque per quadringentos annos sic multiplicati sunt, ut dinumerari eorum non posset exercitus.\n10 Cumque gravaret eos rex \u00c6gypti, atque in \u00e6dificationibus urbium suarum in luto et latere subjugasset eos, clamaverunt ad Dominum suum, et percussit totam terram \u00c6gypti plagis variis.\n11 Cumque ejecissent eos \u00c6gyptii a se, et cessasset plaga ab eis, et iterum eos vellent capere, et ad suum servitium revocare,\n12 fugientibus his, Deus c\u00e6li mare aperuit, ita ut hinc inde aqu\u00e6 quasi murus solidarentur, et isti pede sicco fundum maris perambulando transirent.\n13 In quo loco dum innumerabilis exercitus \u00c6gyptiorum eos persequeretur, ita aquis coopertus est, ut non remaneret vel unus, qui factum posteris nuntiaret.\n14 Egressi vero mare Rubrum, deserta Sina montis occupaverunt, in quibus numquam homo habitare potuit, vel filius hominis requievit.\n15 Illic fontes amari obdulcati sunt eis ad bibendum, et per annos quadraginta annonam de c\u00e6lo consecuti sunt.\n16 Ubicumque ingressi sunt sine arcu et sagitta, et absque scuto et gladio, Deus eorum pugnavit pro eis, et vicit.\n17 Et non fuit qui insultaret populo isti, nisi quando recessit a cultu Domini Dei sui.\n18 Quotiescumque autem pr\u00e6ter ipsum Deum suum, alterum coluerunt, dati sunt in pr\u00e6dam, et in gladium, et in opprobrium.\n19 Quotiescumque autem p\u0153nituerunt se recessisse a cultura Dei sui, dedit eis Deus c\u00e6li virtutem resistendi.\n20 Denique Chanan\u00e6um regem, et Jebus\u00e6um, et Pherez\u00e6um, et Heth\u00e6um, et Hev\u00e6um, et Amorrh\u00e6um, et omnes potentes in Hesebon prostraverunt, et terras eorum et civitates eorum ipsi possederunt:\n21 et usque dum non peccarent in conspectu Dei sui, erant cum illis bona: Deus enim illorum odit iniquitatem.\n22 Nam et ante hos annos cum recessissent a via quam dederat illis Deus ut ambularent in ea, exterminati sunt pr\u00e6liis a multis nationibus, et plurimi eorum captivi abducti sunt in terram non suam.\n23 Nuper autem reversi ad Dominum Deum suum, ex dispersione qua dispersi fuerant, adunati sunt, et ascenderunt montana h\u00e6c omnia, et iterum possident Jerusalem, ubi sunt sancta eorum.\n24 Nunc ergo mi domine, perquire si est aliqua iniquitas eorum in conspectu Dei eorum: ascendamus ad illos, quoniam tradens tradet illos Deus eorum tibi, et subjugati erunt sub jugo potenti\u00e6 tu\u00e6.\n25\u00a0Si vero non est offensio populi hujus coram Deo suo, non poterimus resistere illis, quoniam Deus eorum defendet illos: et erimus in opprobrium univers\u00e6 terr\u00e6.\n \n26 Et factum est, cum cessasset loqui Achior verba h\u00e6c, irati sunt omnes magnates Holofernis, et cogitabant interficere eum, dicentes ad alterutrum:\n27 Quis est iste, qui filios Isra\u00ebl posse dicat resistere regi Nabuchodonosor et exercitibus ejus, homines inermes, et sine virtute, et sine peritia artis pugn\u00e6?\n28 Ut ergo agnoscat Achior quoniam fallit nos, ascendamus in montana: et cum capti fuerint potentes eorum, tunc cum eisdem gladio transverberabitur:\n29 ut sciat omnis gens quoniam Nabuchodonosor deus terr\u00e6 est, et pr\u00e6ter ipsum alius non est.","title":"Vulgate: Judith: Judith Chapter 5","type":"page"}