{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdt007.htm","path":"bib/vul/jdt007.htm","source_url":"https://sacred-texts.com/bib/vul/jdt007.htm","text":"1 Holofernes autem altera die pr\u00e6cepit exercitibus suis ut ascenderent contra Bethuliam.\n2 Erant autem pedites bellatorum centum viginti millia, et equites viginti duo millia, pr\u00e6ter pr\u00e6parationes virorum illorum quos occupaverat captivitas, et abducti fuerant de provinciis et urbibus univers\u00e6 juventutis.\n3 Omnes paraverunt se pariter ad pugnam contra filios Isra\u00ebl, et venerunt per crepidinem montis usque ad apicem, qui respicit super Dothain, a loco qui dicitur Belma usque ad Chelmon, qui est contra Esdrelon.\n4 Filii autem Isra\u00ebl, ut viderunt multitudinem illorum, prostraverunt se super terram, mittentes cinerem super capita sua, unanimes orantes ut Deus Isra\u00ebl misericordiam suam ostenderet super populum suum.\n5\u00a0Et assumentes arma sua bellica, sederunt per loca qu\u00e6 ad angusti itineris tramitem dirigunt inter montosa, et erant custodientes ea tota die et nocte.\n \n6 Porro Holofernes, dum circuit per gyrum, reperit quod fons qui influebat, aqu\u00e6ductum illorum a parte australi extra civitatem dirigeret: et incidi pr\u00e6cepit aqu\u00e6ductum illorum.\n7 Erant tamen non longe a muris fontes, ex quibus furtim videbantur haurire aquam ad refocillandum potius quam ad potandum.\n8 Sed filii Ammon et Moab accesserunt ad Holofernem, dicentes: Filii Isra\u00ebl non in lancea nec in sagitta confidunt, sed montes defendunt illos, et muniunt illos colles in pr\u00e6cipitio constituti.\n9 Ut ergo sine congressione pugn\u00e6 possis superare eos, pone custodes fontium, ut non hauriant aquam ex eis, et sine gladio interficies eos, vel certe fatigati tradent civitatem suam, quam putant in montibus positam superari non posse.\n10 Et placuerunt verba h\u00e6c coram Holoferne et coram satellitibus ejus, et constituit per gyrum centenarios per singulos fontes.\n11\u00a0Cumque ista custodia per dies viginti fuisset expleta, defecerunt cistern\u00e6 et collectiones aquarum omnibus habitantibus Bethuliam, ita ut non esset intra civitatem unde satiarentur vel una die, quoniam ad mensuram dabatur populis aqua quotidie.\n \n12 Tunc ad Oziam congregati omnes viri femin\u00e6que, juvenes et parvuli, omnes simul una voce\n13 dixerunt: Judicet Deus inter nos et te, quoniam fecisti in nos mala, nolens loqui pacifice cum Assyriis, et propter hoc vendidit nos Deus in manibus eorum.\n14 Et ideo non est qui adjuvet, cum prosternamur ante oculos eorum in siti, et perditione magna.\n15 Et nunc congregate universos qui in civitate sunt, ut sponte tradamus nos omnes populo Holofernis.\n16 Melius est enim ut captivi benedicamus Dominum viventes, quam moriamur, et simus opprobrium omni carni, cum viderimus uxores nostras et infantes nostros mori ante oculos nostros.\n17 Contestamur hodie c\u00e6lum et terram, et Deum patrum nostrorum, qui ulciscitur nos secundum peccata nostra, ut jam tradatis civitatem in manu militi\u00e6 Holofernis, et sit finis noster brevis in ore gladii, qui longior efficitur in ariditate sitis.\n18 Et cum h\u00e6c dixissent, factus est fletus et ululatus magnus in ecclesia ab omnibus, et per multas horas una voce clamaverunt ad Deum, dicentes:\n19 Peccavimus cum patribus nostris: injuste egimus, iniquitatem fecimus.\n20 Tu, quia pius es, miserere nostri, aut in tuo flagello vindica iniquitates nostras, et noli tradere confitentes te populo qui ignorat te,\n21 ut non dicant inter gentes: Ubi est Deus eorum?\n22 Et cum fatigati ex his clamoribus et his fletibus lassati siluissent,\n23 exsurgens Ozias infusus lacrimis, dixit: \u00c6quo animo estote, fratres, et hos quinque dies expectemus a Domino misericordiam.\n24 Forsitan enim indignationem suam abscindet, et dabit gloriam nomini suo.\n25 Si autem transactis quinque diebus non venerit adjutorium, faciemus h\u00e6c verba qu\u00e6 locuti estis.","title":"Vulgate: Judith: Judith Chapter 7","type":"page"}