{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdt010.htm","path":"bib/vul/jdt010.htm","source_url":"https://sacred-texts.com/bib/vul/jdt010.htm","text":"1 Factum est autem, cum cessasset clamare ad Dominum, surrexit de loco in quo jacuerat prostrata ad Dominum.\n2 Vocavitque abram suam, et descendens in domum suam, abstulit a se cilicium, et exuit se vestimentis viduitatis su\u00e6,\n3 et lavit corpus suum, et unxit se myro optimo, et discriminavit crinem capitis sui, et imposuit mitram super caput suum, et induit se vestimentis jucunditatis su\u00e6, induitque sandalia pedibus suis, assumpsitque dextraliola, et lilia, et inaures, et annulos, et omnibus ornamentis suis ornavit se.\n4 Cui etiam Dominus contulit splendorem: quoniam omnis ista compositio non ex libidine, sed ex virtute pendebat: et ideo Dominus hanc in illam pulchritudinem ampliavit, ut incomparabili decore omnium oculis appareret.\n5 Imposuit itaque abr\u00e6 su\u00e6 ascoperam vini, et vas olei, et polentam, et palathas, et panes, et caseum, et profecta est.\n6 Cumque venissent ad portam civitatis, invenerunt expectantem Oziam et presbyteros civitatis.\n7 Qui cum vidissent eam, stupentes mirati sunt nimis pulchritudinem ejus.\n8 Nihil tamen interrogantes eam, dimiserunt transire, dicentes: Deus patrum nostrorum det tibi gratiam, et omne consilium tui cordis sua virtute corroboret, ut glorietur super te Jerusalem, et sit nomen tuum in numero sanctorum et justorum.\n9 Et dixerunt hi qui illic erant omnes una voce: Fiat, fiat.\n10\u00a0Judith vero orans Dominum, transivit per portas, ipsa et abra ejus.\n \n11 Factum est autem cum descenderet montem, circa ortum diei, occurrerunt ei exploratores Assyriorum, et tenuerunt eam, dicentes: Unde venis? aut quo vadis?\n12 Qu\u00e6 respondit: Filia sum Hebr\u00e6orum, ideo ego fugi a facie eorum, quoniam futurum agnovi quod dentur vobis in depr\u00e6dationem, pro eo quod contemnentes vos, noluerunt ultro tradere seipsos ut invenirent misericordiam in conspectu vestro.\n13 Hac de causa cogitavi mecum, dicens: Vadam ad faciem principis Holofernis, ut indicem illi secreta illorum, et ostendam illi quo aditu possit obtinere eos, ita ut non cadat vir unus de exercitu ejus.\n14 Et cum audissent viri illi verba ejus, considerabant faciem ejus, et erat in oculis eorum stupor, quoniam pulchritudinem ejus mirabantur nimis.\n15 Et dixerunt ad eam: Conservasti animam tuam, eo quod tale reperisti consilium, ut descenderes ad dominum nostrum.\n16 Hoc autem scias, quoniam cum steteris in conspectu ejus, bene tibi faciet, et eris gratissima in corde ejus. Duxeruntque illam ad tabernaculum Holofernis, annuntiantes eam.\n17 Cumque intrasset ante faciem ejus, statim captus est in suis oculis Holofernes.\n18\u00a0Dixeruntque ad eum satellites ejus: Quis contemnat populum Hebr\u00e6orum, qui tam decoras mulieres habent, ut non pro his merito pugnare contra eos debeamus?\n \n19 Videns itaque Judith Holofernem sedentem in conopeo, quod erat ex purpura, et auro, et smaragdo, et lapidibus pretiosis intextum,\n20 et cum in faciem ejus intendisset, adoravit eum, prosternens se super terram. Et elevaverunt eam servi Holofernis, jubente domino suo.","title":"Vulgate: Judith: Judith Chapter 10","type":"page"}