{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdt015.htm","path":"bib/vul/jdt015.htm","source_url":"https://sacred-texts.com/bib/vul/jdt015.htm","text":"1 Cumque omnis exercitus decollatum Holofernem audisset, fugit mens et consilium ab eis, et solo tremore et metu agitati, fug\u00e6 pr\u00e6sidium sumunt,\n2 ita ut nullus loqueretur cum proximo suo, sed inclinato capite, relictis omnibus, evadere festinabant Hebr\u00e6os, quos armatos super se venire audiebant, fugientes per vias camporum et semitas collium.\n3 Videntes itaque filii Isra\u00ebl fugientes, secuti sunt illos. Descenderuntque clangentes tubis, et ululantes post ipsos.\n4 Et quoniam Assyrii non adunati, in fugam ibant pr\u00e6cipites: filii autem Isra\u00ebl uno agmine persequentes debilitabant omnes quos invenire potuissent.\n5 Misit itaque Ozias nuntios per omnes civitates et regiones Isra\u00ebl.\n6 Omnis itaque regio, omnisque urbs electam juventutem armatam misit post eos, et persecuti sunt eos in ore gladii, quousque pervenirent ad extremitatem finium suorum.\n7 Reliqui autem qui erant in Bethulia, ingressi sunt castra Assyriorum, et pr\u00e6dam quam fugientes Assyrii reliquerant, abstulerunt, et onustati sunt valde.\n8\u00a0Hi vero qui victores reversi sunt ad Bethuliam, omnia qu\u00e6 erant illorum attulerunt secum, ita ut non esset numerus in pecoribus et jumentis et universis mobilibus eorum, ut a minimo usque ad maximum omnes divites fierent de pr\u00e6dationibus eorum.\n \n9 Joacim autem summus pontifex de Jerusalem venit in Bethuliam cum universis presbyteris suis ut videret Judith.\n10 Qu\u00e6 cum exisset ad illum, benedixerunt eam omnes una voce, dicentes: Tu gloria Jerusalem; tu l\u00e6titia Isra\u00ebl; tu honorificentia populi nostri:\n11 quia fecisti viriliter, et confortatum est cor tuum, eo quod castitatem amaveris, et post virum tuum, alterum nescieris: ideo et manus Domini confortavit te, et ideo eris benedicta in \u00e6ternum.\n12 Et dixit omnis populus: Fiat, fiat.\n13 Per dies autem triginta, vix collecta sunt spolia Assyriorum a populo Isra\u00ebl.\n14 Porro autem universa qu\u00e6 Holofernis peculiaria fuisse probata sunt, dederunt Judith in auro, et argento, et vestibus, et gemmis, et omni supellectili: et tradita sunt omnia illi a populo.\n15 Et omnes populi gaudebant cum mulieribus, et virginibus, et juvenibus, in organis et citharis.","title":"Vulgate: Judith: Judith Chapter 15","type":"page"}