{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdt016.htm","path":"bib/vul/jdt016.htm","source_url":"https://sacred-texts.com/bib/vul/jdt016.htm","text":"1 Tunc cantavit canticum hoc Domino Judith, dicens:\n2\u00a0[Incipite Domino in tympanis;\n cantate Domino in cymbalis;\n modulamini illi psalmum novum:\n exaltate, et invocate nomen ejus.\n3\u00a0Dominus conterens bella,\n Dominus nomen est illi.\n4\u00a0Qui posuit castra sua in medio populi sui,\n ut eriperet nos de manu omnium inimicorum nostrorum.\n5\u00a0Venit Assur ex montibus ab aquilone\n in multitudine fortitudinis su\u00e6:\n cujus multitudo obturavit torrentes,\n et equi eorum cooperuerunt valles.\n6\u00a0Dixit se incensurum fines meos,\n et juvenes meos occisurum gladio;\n infantes meos dare in pr\u00e6dam,\n et virgines in captivitatem.\n7\u00a0Dominus autem omnipotens nocuit eum,\n et tradidit eum in manus femin\u00e6, et confodit eum.\n8\u00a0Non enim cecidit potens eorum a juvenibus,\n nec filii Titan percusserunt eum,\n nec excelsi gigantes opposuerunt se illi:\n sed Judith filia Merari in specie faciei su\u00e6 dissolvit eum.\n9\u00a0Exuit enim se vestimento viduitatis,\n et induit se vestimento l\u00e6titi\u00e6\n in exultatione filiorum Isra\u00ebl.\n10\u00a0Unxit faciem suam unguento,\n et colligavit cincinnos suos mitra;\n accepit stolam novem ad decipiendum illum.\n11\u00a0Sandalia ejus rapuerunt oculos ejus;\n pulchritudo ejus captivam fecit animam ejus:\n amputavit pugione cervicem ejus.\n12\u00a0Horruerunt Pers\u00e6 constantiam ejus,\n et Medi audaciam ejus.\n13\u00a0Tunc ululaverunt castra Assyriorum,\n quando apparuerunt humiles mei, arescentes in siti.\n14\u00a0Filii puellarum compunxerunt eos,\n et sicut pueros fugientes occiderunt eos:\n perierunt in pr\u00e6lio a facie Domini Dei mei.\n15\u00a0Hymnum cantemus Domino;\n hymnum novum cantemus Deo nostro.\n16\u00a0Adonai Domine, magnus es tu,\n et pr\u00e6clarus in virtute tua:\n et quem superare nemo potest.\n17\u00a0Tibi serviat omnis creatura tua,\n quia dixisti, et facta sunt;\n misisti spiritum tuum, et creata sunt:\n et non est qui resistat voci tu\u00e6.\n18\u00a0Montes a fundamentis movebuntur cum aquis;\n petr\u00e6, sicut cera, liquescent ante faciem tuam.\n19\u00a0Qui autem timent te,\n magni erunt apud te per omnia.\n20\u00a0V\u00e6 genti insurgenti super genus meum:\n Dominus enim omnipotens vindicabit in eis;\n in die judicii visitabit illos.\n21\u00a0Dabit enim ignem et vermes in carnes eorum,\n ut urantur et sentiant usque in sempiternum.]\n \n22 Et factum est post h\u00e6c, omnis populus post victoriam venit in Jerusalem adorare Dominum: et mox ut purificati sunt, obtulerunt omnes holocausta, et vota, et repromissiones suas.\n23 Porro Judith universa vasa bellica Holofernis, qu\u00e6 dedit illi populus, et conopeum quod ipsa sustulerat de cubili ipsius, obtulit in anathema oblivionis.\n24 Erat autem populus jucundus secundum faciem sanctorum: et per tres menses gaudium hujus victori\u00e6 celebratum est cum Judith.\n25 Post dies autem illos, unusquisque rediit in domum suam: et Judith magna facta est in Bethulia, et pr\u00e6clarior erat univers\u00e6 terr\u00e6 Isra\u00ebl.\n26 Erat enim virtuti castitas adjuncta, ita ut non cognosceret virum omnibus diebus vit\u00e6 su\u00e6, ex quo defunctus est Manasses vir ejus.\n27 Erat autem, diebus festis, procedens cum magna gloria.\n28 Mansit autem in domo viri sui annos centum quinque, et dimisit abram suam liberam: et defuncta est ac sepulta cum viro suo in Bethulia.\n29 Luxitque illam omnis populus diebus septem.\n30 In omni autem spatio vit\u00e6 ejus non fuit qui perturbaret Isra\u00ebl, et post mortem ejus annis multis.\n31 Dies autem victori\u00e6 hujus festivitatis ab Hebr\u00e6is in numero sanctorum dierum accipitur, et colitur a Jud\u00e6is ex illo tempore usque in pr\u00e6sentem diem.","title":"Vulgate: Judith: Judith Chapter 16","type":"page"}