{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer002.htm","path":"bib/vul/jer002.htm","source_url":"https://sacred-texts.com/bib/vul/jer002.htm","text":"1 Et factum est verbum Domini ad me, dicens:\n2\u00a0[Vade, et clama in auribus Jerusalem, dicens:\n H\u00e6c dicit Dominus:\n Recordatus sum tui, miserans adolescentiam tuam,\n et caritatem desponsationis tu\u00e6,\n quando secuta es me in deserto,\n in terra qu\u00e6 non seminatur.\n3\u00a0Sanctus Isra\u00ebl Domino,\n primiti\u00e6 frugum ejus:\n omnes qui devorant eum delinquunt:\n mala venient super eos,\n dicit Dominus.\n4\u00a0Audite verbum Domini, domus Jacob,\n et omnes cognationes domus Isra\u00ebl.\n5\u00a0H\u00e6c dicit Dominus:\n Quid invenerunt patres vestri in me iniquitatis,\n quia elongaverunt a me,\n et ambulaverunt post vanitatem,\n et vani facti sunt?\n6\u00a0Et non dixerunt: Ubi est Dominus\n qui ascendere nos fecit de terra \u00c6gypti;\n qui traduxit nos per desertum,\n per terram inhabitabilem et inviam,\n per terram sitis, et imaginem mortis,\n per terram in qua non ambulavit vir,\n neque habitavit homo?\n7\u00a0Et induxi vos in terram Carmeli,\n ut comederetis fructum ejus et optima illius:\n et ingressi contaminastis terram meam,\n et h\u00e6reditatem meam posuistis in abominationem.\n8\u00a0Sacerdotes non dixerunt: Ubi est Dominus?\n et tenentes legem nescierunt me,\n et pastores pr\u00e6varicati sunt in me,\n et prophet\u00e6 prophetaverunt in Baal,\n et idola secuti sunt.\n9\u00a0Propterea adhuc judicio contendam vobiscum, ait Dominus,\n et cum filiis vestris disceptabo.\n10\u00a0Transite ad insulas Cethim, et videte:\n et in Cedar mittite, et considerate vehementer:\n et videte si factum est hujuscemodi:\n11\u00a0si mutavit gens deos suos,\n et certe ipsi non sunt dii:\n populus vero meus mutavit gloriam suam in idolum.\n12\u00a0Obstupescite, c\u00e6li, super hoc,\n et port\u00e6 ejus, desolamini vehementer, dicit Dominus.\n13\u00a0Duo enim mala fecit populus meus:\n me dereliquerunt fontem aqu\u00e6 viv\u00e6,\n et foderunt sibi cisternas, cisternas dissipatas,\n quia continere non valent aquas.\n14\u00a0Numquid servus est Isra\u00ebl, aut vernaculus?\n quare ergo factus est in pr\u00e6dam?\n15\u00a0Super eum rugierunt leones,\n et dederunt vocem suam:\n posuerunt terram ejus in solitudinem.\n Civitates ejus exust\u00e6 sunt,\n et non est qui habitet in eis.\n16\u00a0Filii quoque Mempheos et Taphnes\n constupraverunt te usque ad verticem.\n17\u00a0Numquid non istud factum est tibi,\n quia dereliquisti Dominum Deum tuum\n eo tempore quo ducebat te per viam?\n18\u00a0Et nunc quid tibi vis in via \u00c6gypti,\n ut bibas aquam turbidam?\n et quid tibi cum via Assyriorum,\n ut bibas aquam fluminis?\n19\u00a0Arguet te malitia tua,\n et aversio tua increpabit te.\n Scito et vide quia malum et amarum est\n reliquisse te Dominum Deum tuum,\n et non esse timorem mei apud te,\n dicit Dominus Deus exercituum.\n20\u00a0A s\u00e6culo confregisti jugum meum:\n rupisti vincula mea,\n et dixisti: Non serviam.\n In omni enim colle sublimi,\n et sub omni ligno frondoso,\n tu prosternebaris meretrix.\n21\u00a0Ego autem plantavi te vineam electam,\n omne semen verum:\n quomodo ergo conversa es mihi in pravum,\n vinea aliena?\n22\u00a0Si laveris te nitro,\n et multiplicaveris tibi herbam borith,\n maculata es in iniquitate tua coram me,\n dicit Dominus Deus.\n23\u00a0Quomodo dicis: Non sum polluta;\n post Baalim non ambulavi?\n Vide vias tuas in convalle;\n scito quid feceris:\n cursor levis explicans vias suas.\n24\u00a0Onager assuetus in solitudine,\n in desiderio anim\u00e6 su\u00e6 attraxit ventum amoris sui:\n nullus avertet eam:\n omnes qui qu\u00e6runt eam non deficient:\n in menstruis ejus invenient eam.\n25\u00a0Prohibe pedem tuum a nuditate,\n et guttur tuum a siti.\n Et dixisti: Desperavi: nequaquam faciam:\n adamavi quippe alienos,\n et post eos ambulabo.]\n \n26\u00a0[Quomodo confunditur fur quando deprehenditur,\n sic confusi sunt domus Isra\u00ebl,\n ipsi et reges eorum,\n principes, et sacerdotes, et prophet\u00e6 eorum,\n27\u00a0dicentes ligno: Pater meus es tu:\n et lapidi: Tu me genuisti.\n Verterunt ad me tergum et non faciem,\n et in tempore afflictionis su\u00e6 dicent:\n Surge, et libera nos.\n28\u00a0Ubi sunt dii tui quos fecisti tibi?\n surgant, et liberent te in tempore afflictionis tu\u00e6:\n secundum numerum quippe civitatum tuarum erant dii tui, Juda.\n29\u00a0Quid vultis mecum judicio contendere?\n omnes dereliquistis me, dicit Dominus.\n30\u00a0Frustra percussi filios vestros:\n disciplinam non receperunt.\n Devoravit gladius vester prophetas vestros:\n quasi leo vastator\n31\u00a0generatio vestra.\n Videte verbum Domini:\n numquid solitudo factus sum Isra\u00ebli,\n aut terra serotina?\n quare ergo dixit populus meus: Recessimus;\n non veniemus ultra ad te?\n32\u00a0Numquid obliviscetur virgo ornamenti sui,\n aut sponsa fasci\u00e6 pectoralis su\u00e6?\n populus vero meus oblitus est mei diebus innumeris.\n33\u00a0Quid niteris bonam ostendere viam tuam\n ad qu\u00e6rendam dilectionem,\n qu\u00e6 insuper et malitias tuas docuisti vias tuas,\n34\u00a0et in alis tuis inventus est sanguis animarum pauperum et innocentum?\n non in fossis inveni eos,\n sed in omnibus qu\u00e6 supra memoravi.\n35\u00a0Et dixisti: Absque peccato et innocens ego sum,\n et propterea avertatur furor tuus a me.\n Ecce ego judicio contendam tecum,\n eo quod dixeris: Non peccavi.\n36\u00a0Quam vilis facta es nimis, iterans vias tuas!\n et ab \u00c6gypto confunderis,\n sicut confusa es ab Assur.\n37\u00a0Nam et ab ista egredieris,\n et manus tu\u00e6 erunt super caput tuum:\n quoniam obtrivit Dominus confidentiam tuam,\n et nihil habebis prosperum in ea.]","title":"Vulgate: Jeremiah: Jeremiah Chapter 2","type":"page"}