{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer004.htm","path":"bib/vul/jer004.htm","source_url":"https://sacred-texts.com/bib/vul/jer004.htm","text":"1\u00a0[Si reverteris, Isra\u00ebl, ait Dominus,\n ad me convertere:\n si abstuleris offendicula tua a facie mea,\n non commoveberis.\n2\u00a0Et jurabis: Vivit Dominus in veritate, et in judicio, et in justitia:\n et benedicent eum gentes,\n ipsumque laudabunt.\n3\u00a0H\u00e6c enim dicit Dominus viro Juda et Jerusalem:\n Novate vobis novale,\n et nolite serere super spinas.\n4\u00a0Circumcidimini Domino,\n et auferte pr\u00e6putia cordium vestrorum,\n viri Juda, et habitatores Jerusalem:\n ne forte egrediatur ut ignis indignatio mea,\n et succendatur, et non sit qui extinguat,\n propter malitiam cogitationum vestrarum.]\n \n5\u00a0[Annuntiate in Juda, et in Jerusalem auditum facite:\n loquimini, et canite tuba in terra,\n clamate fortiter, et dicite:\n Congregamini, et ingrediamur civitates munitas.\n6\u00a0Levate signum in Sion;\n confortamini, nolite stare:\n quia malum ego adduco ab aquilone,\n et contritionem magnam.\n7\u00a0Ascendit leo de cubili suo,\n et pr\u00e6do gentium se levavit:\n egressus est de loco suo ut ponat terram tuam in solitudinem:\n civitates tu\u00e6 vastabuntur,\n remanentes absque habitatore.\n8\u00a0Super hoc accingite vos ciliciis;\n plangite, et ululate:\n quia non est aversa ira furoris Domini a nobis.\n9\u00a0Et erit in die illa, dicit Dominus:\n peribit cor regis, et cor principum,\n et obstupescent sacerdotes,\n et prophet\u00e6 consternabuntur.]\n10\u00a0Et dixi: [Heu! heu! heu! Domine Deus,\n ergone decepisti populum istum et Jerusalem,\n dicens: Pax erit vobis:\n et ecce pervenit gladius usque ad animam?]\n11\u00a0[In tempore illo dicetur populo huic et Jerusalem:\n Ventus urens in viis qu\u00e6 sunt in deserto vi\u00e6 fili\u00e6 populi mei,\n non ad ventilandum et ad purgandum.\n12\u00a0Spiritus plenus ex his veniet mihi,\n et nunc ego loquar judicia mea cum eis.\n13\u00a0Ecce quasi nubes ascendet,\n et quasi tempestas currus ejus:\n velociores aquilis equi illius.\n V\u00e6 nobis, quoniam vastati sumus.\n14\u00a0Lava a malitia cor tuum, Jerusalem, ut salva fias:\n usquequo morabuntur in te cogitationes noxi\u00e6?\n15\u00a0Vox enim annuntiantis a Dan,\n et notum facientis idolum de monte Ephraim.\n16\u00a0Dicite gentibus: Ecce auditum est in Jerusalem\n custodes venire de terra longinqua,\n et dare super civitates Juda vocem suam:\n17\u00a0quasi custodes agrorum facti sunt super eam in gyro,\n quia me ad iracundiam provocavit, dicit Dominus.\n18\u00a0Vi\u00e6 tu\u00e6 et cogitationes tu\u00e6 fecerunt h\u00e6c tibi:\n ista malitia tua, quia amara,\n quia tetigit cor tuum.\n19\u00a0Ventrem meum, ventrem meum doleo;\n sensus cordis mei turbati sunt in me.\n Non tacebo, quoniam vocem buccin\u00e6 audivit anima mea,\n clamorem pr\u00e6lii.\n20\u00a0Contritio super contritionem vocata est,\n et vastata est omnis terra:\n repente vastata sunt tabernacula mea;\n subito pelles me\u00e6.\n21\u00a0Usquequo videbo fugientem;\n audiam vocem buccin\u00e6?\n22\u00a0Quia stultus populus meus me non cognovit:\n filii insipientes sunt et vecordes:\n sapientes sunt ut faciant mala,\n bene autem facere nescierunt.\n23\u00a0Aspexi terram, et ecce vacua erat et nihili;\n et c\u00e6los, et non erat lux in eis.\n24\u00a0Vidi montes, et ecce movebantur:\n et omnes colles conturbati sunt.\n25\u00a0Intuitus sum, et non erat homo:\n et omne volatile c\u00e6li recessit.\n26\u00a0Aspexi, et ecce Carmelus desertus,\n et omnes urbes ejus destruct\u00e6 sunt a facie Domini,\n et a facie ir\u00e6 furoris ejus.\n27\u00a0H\u00e6c enim dicit Dominus:\n Deserta erit omnis terra,\n sed tamen consummationem non faciam.\n28\u00a0Lugebit terra, et m\u0153rebunt c\u00e6li desuper,\n eo quod locutus sum.\n Cogitavi, et non p\u0153nituit me,\n nec aversus sum ab eo.\n29\u00a0A voce equitis et mittentis sagittam fugit omnis civitas:\n ingressi sunt ardua, et ascenderunt rupes:\n univers\u00e6 urbes derelict\u00e6 sunt,\n et non habitat in eis homo.\n30\u00a0Tu autem vastata, quid facies?\n cum vestieris te coccino,\n cum ornata fueris monili aureo,\n et pinxeris stibio oculos tuos,\n frustra componeris:\n contempserunt te amatores tui;\n animam tuam qu\u00e6rent.\n31\u00a0Vocem enim quasi parturientis audivi,\n angustias ut puerper\u00e6:\n vox fili\u00e6 Sion intermorientis,\n expandentisque manus suas:\n V\u00e6 mihi, quia defecit anima mea propter interfectos!]","title":"Vulgate: Jeremiah: Jeremiah Chapter 4","type":"page"}