{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer006.htm","path":"bib/vul/jer006.htm","source_url":"https://sacred-texts.com/bib/vul/jer006.htm","text":"1\u00a0[Confortamini, filii Benjamin, in medio Jerusalem:\n et in Thecua clangite buccina,\n et super Bethacarem levate vexillum,\n quia malum visum est ab aquilone,\n et contritio magna.\n2\u00a0Specios\u00e6 et delicat\u00e6 assimilavi filiam Sion.\n3\u00a0Ad eam venient pastores et greges eorum;\n fixerunt in ea tentoria in circuitu:\n pascet unusquisque eos qui sub manu sua sunt.\n4\u00a0Sanctificate super eam bellum:\n consurgite, et ascendamus in meridie:\n v\u00e6 nobis, quia declinavit dies;\n quia longiores fact\u00e6 sunt umbr\u00e6 vesperi!\n5\u00a0Surgite, et ascendamus in nocte,\n et dissipemus domus ejus.\n6\u00a0Quia h\u00e6c dicit Dominus exercituum:\n C\u00e6dite lignum ejus,\n et fundite circa Jerusalem aggerem.\n H\u00e6c est civitas visitationis:\n omnis calumnia in medio ejus.\n7\u00a0Sicut frigidam fecit cisterna aquam suam,\n sic frigidam fecit malitiam suam.\n Iniquitas et vastitas audietur in ea,\n coram me semper infirmitas et plaga.\n8\u00a0Erudire, Jerusalem,\n ne forte recedat anima mea a te;\n ne forte ponam te desertam,\n terram inhabitabilem.\n9\u00a0H\u00e6c dicit Dominus exercituum:\n Usque ad racemum colligent quasi in vinea reliquias Isra\u00ebl.\n Converte manum tuam quasi vindemiator ad cartallum.\n10\u00a0Cui loquar, et quem contestabor ut audiat?\n ecce incircumcis\u00e6 aures eorum,\n et audire non possunt:\n ecce verbum Domini factum est eis in opprobrium,\n et non suscipient illud.\n11\u00a0Idcirco furore Domini plenus sum;\n laboravi sustinens.\n Effunde super parvulum foris,\n et super consilium juvenum simul:\n vir enim cum muliere capietur;\n senex cum pleno dierum.\n12\u00a0Et transibunt domus eorum ad alteros,\n agri et uxores pariter,\n quia extendam manum meam super habitantes terram, dicit Dominus:\n13\u00a0a minore quippe usque ad majorem\n omnes avariti\u00e6 student,\n et a propheta usque ad sacerdotem\n cuncti faciunt dolum.\n14\u00a0Et curabant contritionem fili\u00e6 populi mei cum ignominia,\n dicentes: Pax, pax!\n et non erat pax.\n15\u00a0Confusi sunt, quia abominationem fecerunt:\n quin potius confusione non sunt confusi,\n et erubescere nescierunt.\n Quam ob rem cadent inter ruentes:\n in tempore visitationis su\u00e6 corruent, dicit Dominus.\n16\u00a0H\u00e6c dicit Dominus:\n State super vias, et videte,\n et interrogate de semitis antiquis qu\u00e6 sit via bona,\n et ambulate in ea:\n et invenietis refrigerium animabus vestris.\n Et dixerunt: Non ambulabimus.\n17\u00a0Et constitui super vos speculatores:\n Audite vocem tub\u00e6.\n Et dixerunt: Non audiemus.\n18\u00a0Ideo audite, gentes,\n et cognosce, congregatio,\n quanta ego faciam eis.\n19\u00a0Audi, terra:\n ecce ego adducam mala super populum istum,\n fructum cogitationum ejus:\n quia verba mea non audierunt,\n et legem meam projecerunt.\n20\u00a0Ut quid mihi thus de Saba affertis,\n et calamum suave olentem de terra longinqua?\n Holocautomata vestra non sunt accepta,\n et victim\u00e6 vestr\u00e6 non placuerunt mihi.\n21\u00a0Propterea h\u00e6c dicit Dominus:\n Ecce ego dabo in populum istum ruinas:\n et ruent in eis patres et filii simul;\n vicinus et proximus peribunt.\n22\u00a0H\u00e6c dicit Dominus:\n Ecce populus venit de terra aquilonis,\n et gens magna consurget a finibus terr\u00e6.\n23\u00a0Sagittam et scutum arripiet:\n crudelis est et non miserebitur.\n Vox ejus quasi mare sonabit:\n et super equos ascendent,\n pr\u00e6parati quasi vir ad pr\u00e6lium\n adversum te, filia Sion.\n24\u00a0Audivimus famam ejus;\n dissolut\u00e6 sunt manus nostr\u00e6:\n tribulatio apprehendit nos,\n dolores ut parturientem.\n25\u00a0Nolite exire ad agros,\n et in via ne ambuletis,\n quoniam gladius inimici,\n pavor in circuitu.\n26\u00a0Filia populi mei, accingere cilicio,\n et conspergere cinere:\n luctum unigeniti fac tibi,\n planctum amarum,\n quia repente veniet vastator super nos.\n27\u00a0Probatorem dedi te in populo meo robustum:\n et scies, et probabis viam eorum.\n28\u00a0Omnes isti principes declinantes,\n ambulantes fraudulenter,\n \u00e6s et ferrum:\n universi corrupti sunt.\n29\u00a0Defecit sufflatorium;\n in igne consumptum est plumbum:\n frustra conflavit conflator,\n maliti\u00e6 enim eorum non sunt consumpt\u00e6.\n30\u00a0Argentum reprobum vocate eos,\n quia Dominus projecit illos.]","title":"Vulgate: Jeremiah: Jeremiah Chapter 6","type":"page"}