{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer007.htm","path":"bib/vul/jer007.htm","source_url":"https://sacred-texts.com/bib/vul/jer007.htm","text":"1 Verbum quod factum est ad Jeremiam a Domino, dicens:\n2\u00a0Sta in porta domus Domini, et pr\u00e6dica ibi verbum istud, et dic: [Audite verbum Domini, omnis Juda,\n qui ingredimini per portas has ut adoretis Dominum.\n3\u00a0H\u00e6c dicit Dominus exercituum, Deus Isra\u00ebl:\n Bonas facite vias vestras, et studia vestra,\n et habitabo vobiscum in loco isto.\n4\u00a0Nolite confidere in verbis mendacii, dicentes:\n Templum Domini, templum Domini, templum Domini est!\n5\u00a0Quoniam si bene direxeritis vias vestras, et studia vestra;\n si feceritis judicium inter virum et proximum ejus;\n6\u00a0adven\u00e6, et pupillo, et vidu\u00e6 non feceritis calumniam,\n nec sanguinem innocentem effuderitis in loco hoc,\n et post deos alienos non ambulaveritis in malum vobismetipsis:\n7\u00a0habitabo vobiscum in loco isto,\n in terra quam dedi patribus vestris a s\u00e6culo et usque in s\u00e6culum.\n8\u00a0Ecce vos confiditis vobis in sermonibus mendacii,\n qui non proderunt vobis:\n9\u00a0furari, occidere, adulterari,\n jurare mendaciter, libare Baalim,\n et ire post deos alienos quos ignoratis:\n10\u00a0et venistis, et stetistis coram me\n in domo hac, in qua invocatum est nomen meum,\n et dixistis: Liberati sumus,\n eo quod fecerimus omnes abominationes istas.\n11\u00a0Numquid ergo spelunca latronum facta est domus ista,\n in qua invocatum est nomen meum in oculis vestris?\n Ego, ego sum: ego vidi, dicit Dominus.\n12\u00a0Ite ad locum meum in Silo,\n ubi habitavit nomen meum a principio,\n et videte qu\u00e6 fecerim ei propter malitiam populi mei Isra\u00ebl.\n13\u00a0Et nunc, quia fecistis omnia opera h\u00e6c, dicit Dominus,\n et locutus sum ad vos mane consurgens, et loquens, et non audistis:\n et vocavi vos, et non respondistis:\n14\u00a0faciam domui huic, in qua invocatum est nomen meum,\n et in qua vos habetis fiduciam,\n et loco quem dedi vobis et patribus vestris,\n sicut feci Silo:\n15\u00a0et projiciam vos a facie mea\n sicut projeci omnes fratres vestros,\n universum semen Ephraim.\n16\u00a0Tu ergo, noli orare pro populo hoc,\n nec assumas pro eis laudem et orationem:\n et non obsistas mihi,\n quia non exaudiam te.\n17\u00a0Nonne vides quid isti faciunt in civitatibus Juda,\n et in plateis Jerusalem?\n18\u00a0Filii colligunt ligna,\n et patres succendunt ignem,\n et mulieres conspergunt adipem,\n ut faciant placentas regin\u00e6 c\u00e6li,\n et libent diis alienis,\n et me ad iracundiam provocent.\n19\u00a0Numquid me ad iracundiam provocant?\n dicit Dominus;\n nonne semetipsos in confusionem vultus sui?\n20\u00a0Ideo h\u00e6c dicit Dominus Deus:\n Ecce furor meus et indignatio mea conflatur super locum istum,\n super viros, et super jumenta,\n et super lignum regionis, et super fruges terr\u00e6:\n et succendetur, et non extinguetur.\n21\u00a0H\u00e6c dicit Dominus exercituum, Deus Isra\u00ebl:\n Holocautomata vestra addite victimis vestris,\n et comedite carnes:\n22\u00a0quia non sum locutus cum patribus vestris, et non pr\u00e6cepi eis,\n in die qua eduxi eos de terra \u00c6gypti,\n de verbo holocautomatum et victimarum:\n23\u00a0sed hoc verbum pr\u00e6cepi eis, dicens:\n Audite vocem meam,\n et ero vobis Deus,\n et vos eritis mihi populus:\n et ambulate in omni via quam mandavi vobis,\n ut bene sit vobis.\n24\u00a0Et non audierunt, nec inclinaverunt aurem suam:\n sed abierunt in voluntatibus et in pravitate cordis sui mali:\n factique sunt retrorsum, et non in ante,\n25\u00a0a die qua egressi sunt patres eorum de terra \u00c6gypti\n usque ad diem hanc.\n Et misi ad vos omnes servos meos prophetas per diem,\n consurgens diluculo, et mittens:\n26\u00a0et non audierunt me,\n nec inclinaverunt aurem suam:\n sed induraverunt cervicem suam,\n et pejus operati sunt quam patres eorum.]\n27 Et loqueris ad eos omnia verba h\u00e6c, et non audient te: et vocabis eos, et non respondebunt tibi.\n28\u00a0Et dices ad eos: [H\u00e6c est gens qu\u00e6 non audivit vocem Domini Dei sui,\n nec recepit disciplinam;\n periit fides,\n et ablata est de ore eorum.\n29\u00a0Tonde capillum tuum, et projice,\n et sume in directum planctum:\n quia projecit Dominus et reliquit generationem furoris sui;\n30\u00a0quia fecerunt filii Juda malum in oculis meis, dicit Dominus.\n Posuerunt offendicula sua in domo\n in qua invocatum est nomen meum, ut polluerent eam:\n31\u00a0et \u00e6dificaverunt excelsa Topheth,\n qu\u00e6 est in valle filii Ennom,\n ut incenderent filios suos et filias suas igni,\n qu\u00e6 non pr\u00e6cepi, nec cogitavi in corde meo.\n32\u00a0Ideo ecce dies venient, dicit Dominus,\n et non dicetur amplius Topheth, et vallis filii Ennom,\n sed vallis interfectionis:\n et sepelient in Topheth, eo quod non sit locus.\n33\u00a0Et erit morticinum populi hujus in cibos volucribus c\u00e6li et bestiis terr\u00e6,\n et non erit qui abigat.\n34\u00a0Et quiescere faciam de urbibus Juda,\n et de plateis Jerusalem,\n vocem gaudii et vocem l\u00e6titi\u00e6,\n vocem sponsi et vocem spons\u00e6:\n in desolationem enim erit terra.]","title":"Vulgate: Jeremiah: Jeremiah Chapter 7","type":"page"}