{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer012.htm","path":"bib/vul/jer012.htm","source_url":"https://sacred-texts.com/bib/vul/jer012.htm","text":"1\u00a0[Justus quidem tu es, Domine, si disputem tecum:\n verumtamen justa loquar ad te:\n Quare via impiorum prosperatur;\n bene est omnibus qui pr\u00e6varicantur et inique agunt?\n2\u00a0Plantasti eos, et radicem miserunt:\n proficiunt, et faciunt fructum:\n prope es tu ori eorum,\n et longe a renibus eorum.\n3\u00a0Et tu, Domine, nosti me, vidisti me,\n et probasti cor meum tecum.\n Congrega eos quasi gregem ad victimam,\n et sanctifica eos in die occisionis.\n4\u00a0Usquequo lugebit terra,\n et herba omnis regionis siccabitur,\n propter malitiam habitantium in ea?\n Consumptum est animal, et volucre,\n quoniam dixerunt: Non videbit novissima nostra.\n5\u00a0Si cum peditibus currens laborasti,\n quomodo contendere poteris cum equis?\n cum autem in terra pacis securus fueris,\n quid facies in superbia Jordanis?\n6\u00a0Nam et fratres tui, et domus patris tui,\n etiam ipsi pugnaverunt adversum te,\n et clamaverunt post te plena voce:\n ne credas eis,\n cum locuti fuerint tibi bona.]\n \n7\u00a0[Reliqui domum meam;\n dimisi h\u00e6reditatem meam:\n dedi dilectam animam meam in manu inimicorum ejus.\n8\u00a0Facta est mihi h\u00e6reditas mea quasi leo in silva:\n dedit contra me vocem, ideo odivi eam.\n9\u00a0Numquid avis discolor h\u00e6reditas mea mihi?\n numquid avis tincta per totum?\n Venite, congregamini, omnes besti\u00e6 terr\u00e6:\n properate ad devorandum.\n10\u00a0Pastores multi demoliti sunt vineam meam,\n conculcaverunt partem meam,\n dederunt portionem meam desiderabilem in desertum solitudinis.\n11\u00a0Posuerunt eam in dissipationem,\n luxitque super me:\n desolatione desolata est omnis terra,\n quia nullus est qui recogitet corde.\n12\u00a0Super omnes vias deserti venerunt vastatores,\n quia gladius Domini devorabit:\n ab extremo terr\u00e6 usque ad extremum ejus,\n non est pax univers\u00e6 carni.\n13\u00a0Seminaverunt triticum,\n et spinas messuerunt:\n h\u00e6reditatem acceperunt,\n et non eis proderit.\n Confundemini a fructibus vestris\n propter iram furoris Domini.\n14\u00a0H\u00e6c dicit Dominus adversum omnes vicinos meos pessimos,\n qui tangunt h\u00e6reditatem quam distribui populo meo Isra\u00ebl:\n Ecce ego evellam eos de terra sua,\n et domum Juda evellam de medio eorum.\n15\u00a0Et cum evulsero eos, convertar,\n et miserebor eorum, et reducam eos:\n virum ad h\u00e6reditatem suam,\n et virum in terram suam.\n16\u00a0Et erit: si eruditi didicerint vias populi mei,\n ut jurent in nomine meo: Vivit Dominus!\n sicut docuerunt populum meum jurare in Baal,\n \u00e6dificabuntur in medio populi mei.\n17\u00a0Quod si non audierint,\n evellam gentem illam evulsione et perditione, ait Dominus.]","title":"Vulgate: Jeremiah: Jeremiah Chapter 12","type":"page"}