{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer013.htm","path":"bib/vul/jer013.htm","source_url":"https://sacred-texts.com/bib/vul/jer013.htm","text":"1 H\u00e6c dicit Dominus ad me: Vade, et posside tibi lumbare lineum, et pones illud super lumbos tuos, et in aquam non inferes illud.\n2 Et possedi lumbare juxta verbum Domini, et posui circa lumbos meos.\n3 Et factus est sermo Domini ad me secundo, dicens:\n4 Tolle lumbare quod possedisti, quod est circa lumbos tuos: et surgens vade ad Euphraten, et absconde ibi illud in foramine petr\u00e6.\n5 Et abii, et abscondi illud in Euphrate, sicut pr\u00e6ceperat mihi Dominus.\n6 Et factum est post dies plurimos, dixit Dominus ad me: Surge, vade ad Euphraten, et tolle inde lumbare quod pr\u00e6cepi tibi ut absconderes illud ibi.\n7 Et abii ad Euphraten, et fodi, et tuli lumbare de loco ubi absconderam illud: et ecce computruerat lumbare, ita ut nulli usui aptum esset.\n8 Et factum est verbum Domini ad me, dicens:\n9\u00a0[H\u00e6c dicit Dominus:\n Sic putrescere faciam superbiam Juda,\n et superbiam Jerusalem multam:\n10\u00a0populum istum pessimum qui nolunt audire verba mea,\n et ambulant in pravitate cordis sui,\n abieruntque post deos alienos ut servirent eis et adorarent eos:\n et erunt sicut lumbare istud,\n quod nulli usui aptum est.\n11\u00a0Sicut enim adh\u00e6ret lumbare ad lumbos viri,\n sic agglutinavi mihi omnem domum Isra\u00ebl,\n et omnem domum Juda, dicit Dominus,\n ut essent mihi in populum,\n et in nomen, et in laudem, et in gloriam:\n et non audierunt.]\n \n12\u00a0Dices ergo ad eos sermonem istum: [H\u00e6c dicit Dominus Deus Isra\u00ebl:\n Omnis laguncula implebitur vino.] Et dicent ad te: [Numquid ignoramus quia omnis laguncula implebitur vino?]\n13\u00a0Et dices ad eos: [H\u00e6c dicit Dominus:\n Ecce ego implebo omnes habitatores terr\u00e6 hujus,\n et reges qui sedent de stirpe David super thronum ejus,\n et sacerdotes, et prophetas,\n et omnes habitatores Jerusalem, ebrietate.\n14\u00a0Et dispergam eos virum a fratre suo,\n et patres et filios pariter, ait Dominus.\n Non parcam, et non concedam:\n neque miserebor, ut non disperdam eos.\n15\u00a0Audite, et auribus percipite:\n nolite elevari, quia Dominus locutus est.\n16\u00a0Date Domino Deo vestro gloriam\n antequam contenebrescat,\n et antequam offendant pedes vestri ad montes caliginosos:\n exspectabitis lucem,\n et ponet eam in umbram mortis, et in caliginem.\n17\u00a0Quod si hoc non audieritis,\n in abscondito plorabit anima mea a facie superbi\u00e6:\n plorans plorabit,\n et deducet oculus meus lacrimam,\n quia captus est grex Domini.\n18\u00a0Dic regi et dominatrici:\n Humiliamini, sedete,\n quoniam descendit de capite vestro corona glori\u00e6 vestr\u00e6.\n19\u00a0Civitates austri claus\u00e6 sunt,\n et non est qui aperiat:\n translata est omnis Juda transmigratione perfecta.\n20\u00a0Levate oculos vestros et videte,\n qui venitis ab aquilone:\n ubi est grex qui datus est tibi,\n pecus inclytum tuum?\n21\u00a0Quid dices cum visitaverit te?\n tu enim docuisti eos adversum te,\n et erudisti in caput tuum.\n Numquid non dolores apprehendent te,\n quasi mulierem parturientem?\n22\u00a0Quod si dixeris in corde tuo: Quare venerunt mihi h\u00e6c?\n propter multitudinem iniquitatis tu\u00e6\n revelata sunt verecundiora tua,\n pollut\u00e6 sunt plant\u00e6 tu\u00e6.\n23\u00a0Si mutare potest \u00c6thiops pellem suam,\n aut pardus varietates suas,\n et vos poteritis benefacere,\n cum didiceritis malum.\n24\u00a0Et disseminabo eos quasi stipulam\n qu\u00e6 vento raptatur in deserto.\n25\u00a0H\u00e6c sors tua,\n parsque mensur\u00e6 tu\u00e6 a me, dicit Dominus,\n quia oblita es mei,\n et confisa es in mendacio.\n26\u00a0Unde et ego nudavi femora tua contra faciem tuam,\n et apparuit ignominia tua:\n27\u00a0adulteria tua, et hinnitus tuus,\n scelus fornicationis tu\u00e6:\n super colles in agro vidi abominationes tuas.\n V\u00e6 tibi, Jerusalem!\n non mundaberis post me: usquequo adhuc?]","title":"Vulgate: Jeremiah: Jeremiah Chapter 13","type":"page"}