{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer015.htm","path":"bib/vul/jer015.htm","source_url":"https://sacred-texts.com/bib/vul/jer015.htm","text":"1\u00a0Et dixit Dominus ad me: [Si steterit Moyses et Samuel coram me,\n non est anima mea ad populum istum:\n ejice illos a facie mea, et egrediantur.\n2\u00a0Quod si dixerint ad te: Quo egrediemur?\n dices ad eos: H\u00e6c dicit Dominus:\n Qui ad mortem, ad mortem,\n et qui ad gladium, ad gladium,\n et qui ad famem, ad famem,\n et qui ad captivitatem, ad captivitatem.\n3\u00a0Et visitabo super eos quatuor species, dicit Dominus:\n gladium ad occisionem,\n et canes ad lacerandum,\n et volatilia c\u00e6li et bestias terr\u00e6\n ad devorandum et dissipandum.\n4\u00a0Et dabo eos in fervorem universis regnis terr\u00e6,\n propter Manassen filium Ezechi\u00e6 regis Juda,\n super omnibus qu\u00e6 fecit in Jerusalem.\n5\u00a0Quis enim miserebitur tui, Jerusalem,\n aut quis contristabitur pro te?\n aut quis ibit ad rogandum pro pace tua?\n6\u00a0Tu reliquisti me, dicit Dominus;\n retrorsum abiisti:\n et extendam manum meam super te, et interficiam te:\n laboravi rogans.\n7\u00a0Et dispergam eos ventilabro in portis terr\u00e6:\n interfeci et disperdidi populum meum,\n et tamen a viis suis non sunt reversi.\n8\u00a0Multiplicat\u00e6 sunt mihi vidu\u00e6 ejus super arenam maris:\n induxi eis super matrem adolescentis vastatorem meridie:\n misi super civitates repente terrorem.\n9\u00a0Infirmata est qu\u00e6 peperit septem;\n defecit anima ejus:\n occidit ei sol cum adhuc esset dies:\n confusa est, et erubuit:\n et residuos ejus in gladium dabo\n in conspectu inimicorum eorum, ait Dominus.]\n \n10\u00a0[V\u00e6 mihi, mater mea! quare genuisti me,\n virum rix\u00e6, virum discordi\u00e6 in universa terra?\n Non f\u0153neravi, nec f\u0153neravit mihi quisquam:\n omnes maledicunt mihi.\n11\u00a0Dicit Dominus: Si non reliqui\u00e6 tu\u00e6 in bonum,\n si non occurri tibi in tempore afflictionis,\n et in tempore tribulationis adversus inimicum.\n12\u00a0Numquid f\u0153derabitur ferrum ferro ab aquilone, et \u00e6s?\n13\u00a0Divitias tuas et thesauros tuos in direptionem dabo gratis,\n in omnibus peccatis tuis, et in omnibus terminis tuis.\n14\u00a0Et adducam inimicos tuos de terra quam nescis,\n quia ignis succensus est in furore meo:\n super vos ardebit.\n15\u00a0Tu scis, Domine: recordare mei, et visita me,\n et tuere me ab his qui persequuntur me.\n Noli in patientia tua suscipere me:\n scito quoniam sustinui propter te opprobrium.\n16\u00a0Inventi sunt sermones tui, et comedi eos:\n et factum est mihi verbum tuum in gaudium\n et in l\u00e6titiam cordis mei,\n quoniam invocatum est nomen tuum super me,\n Domine Deus exercituum.\n17\u00a0Non sedi in concilio ludentium,\n et gloriatus sum a facie manus tu\u00e6:\n solus sedebam, quoniam comminatione replesti me.\n18\u00a0Quare factus est dolor meus perpetuus,\n et plaga mea desperabilis renuit curari?\n facta est mihi quasi mendacium aquarum infidelium.\n19\u00a0Propter hoc h\u00e6c dicit Dominus:\n Si converteris, convertam te,\n et ante faciem meam stabis:\n et si separaveris pretiosum a vili,\n quasi os meum eris:\n convertentur ipsi ad te,\n et tu non converteris ad eos.\n20\u00a0Et dabo te populo huic in murum \u00e6reum fortem:\n et bellabunt adversum te, et non pr\u00e6valebunt,\n quia ego tecum sum ut salvem te, et eruam te, dicit Dominus:\n21\u00a0et liberabo te de manu pessimorum,\n et redimam te de manu fortium.]","title":"Vulgate: Jeremiah: Jeremiah Chapter 15","type":"page"}