{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer017.htm","path":"bib/vul/jer017.htm","source_url":"https://sacred-texts.com/bib/vul/jer017.htm","text":"1\u00a0[Peccatum Juda scriptum est stylo ferreo\n in ungue adamantino,\n exaratum super latitudinem cordis eorum,\n et in cornibus ararum eorum.\n2\u00a0Cum recordati fuerint filii eorum ararum suarum,\n et lucorum suorum,\n lignorumque frondentium,\n in montibus excelsis,\n3\u00a0sacrificantes in agro:\n fortitudinem tuam, et omnes thesauros tuos in direptionem dabo;\n excelsa tua propter peccata in universis finibus tuis.\n4\u00a0Et relinqueris sola ab h\u00e6reditate tua, quam dedi tibi,\n et servire te faciam inimicis tuis in terra quam ignoras:\n quoniam ignem succendisti in furore meo:\n usque in \u00e6ternum ardebit.]\n \n5\u00a0[H\u00e6c dicit Dominus:\n Maledictus homo qui confidit in homine,\n et ponit carnem brachium suum,\n et a Domino recedit cor ejus.\n6\u00a0Erit enim quasi myric\u00e6 in deserto,\n et non videbit cum venerit bonum:\n sed habitabit in siccitate in deserto,\n in terra salsuginis et inhabitabili.\n7\u00a0Benedictus vir qui confidit in Domino,\n et erit Dominus fiducia ejus.\n8\u00a0Et erit quasi lignum quod transplantatur super aquas,\n quod ad humorem mittit radices suas,\n et non timebit cum venerit \u00e6stus:\n et erit folium ejus viride,\n et in tempore siccitatis non erit sollicitum,\n nec aliquando desinet facere fructum.\n9\u00a0Pravum est cor omnium, et inscrutabile:\n quis cognoscet illud?\n10\u00a0Ego Dominus scrutans cor,\n et probans renes:\n qui do unicuique juxta viam suam,\n et juxta fructum adinventionum suarum.\n11\u00a0Perdix fovit qu\u00e6 non peperit:\n fecit divitias, et non in judicio:\n in dimidio dierum suorum derelinquet eas,\n et in novissimo suo erit insipiens.\n12\u00a0Solium glori\u00e6 altitudinis a principio,\n locus sanctificationis nostr\u00e6.\n13\u00a0Exspectatio Isra\u00ebl, Domine,\n omnes qui te derelinquunt confundentur:\n recedentes a te, in terra scribentur,\n quoniam dereliquerunt venam aquarum viventium Dominum.\n14\u00a0Sana me, Domine, et sanabor:\n salvum me fac, et salvus ero:\n quoniam laus mea tu es.\n15\u00a0Ecce ipsi dicunt ad me:\n Ubi est verbum Domini? veniat:\n16\u00a0et ego non sum turbatus, te pastorem sequens:\n et diem hominis non desideravi, tu scis:\n quod egressum est de labiis meis, rectum in conspectu tuo fuit.\n17\u00a0Non sis tu mihi formidini:\n spes mea tu in die afflictionis.\n18\u00a0Confundantur qui me persequuntur,\n et non confundar ego:\n paveant illi,\n et non paveam ego:\n induc super eos diem afflictionis,\n et duplici contritione contere eos.]\n \n19 H\u00e6c dicit Dominus ad me: Vade, et sta in porta filiorum populi, per quam ingrediuntur reges Juda, et egrediuntur, et in cunctis portis Jerusalem:\n20\u00a0et dices ad eos: [Audite verbum Domini,\n reges Juda, et omnis Juda,\n cunctique habitatores Jerusalem,\n qui ingredimini per portas istas.\n21\u00a0H\u00e6c dicit Dominus:\n Custodite animas vestras,\n et nolite portare pondera in die sabbati,\n nec inferatis per portas Jerusalem:\n22\u00a0et nolite ejicere onera de domibus vestris in die sabbati,\n et omne opus non facietis:\n sanctificate diem sabbati,\n sicut pr\u00e6cepi patribus vestris.\n23\u00a0Et non audierunt, nec inclinaverunt aurem suam:\n sed induraverunt cervicem suam, ne audirent me,\n et ne acciperent disciplinam.\n24\u00a0Et erit: si audieritis me, dicit Dominus,\n ut non inferatis onera per portas civitatis hujus in die sabbati:\n et si sanctificaveritis diem sabbati,\n ne faciatis in eo omne opus:\n25\u00a0ingredientur per portas civitatis hujus reges et principes,\n sedentes super solium David,\n et ascendentes in curribus et equis,\n ipsi et principes eorum,\n viri Juda, et habitatores Jerusalem:\n et habitabitur civitas h\u00e6c in sempiternum.\n26\u00a0Et venient de civitatibus Juda,\n et de circuitu Jerusalem,\n et de terra Benjamin,\n et de campestribus, et de montuosis, et ab austro,\n portantes holocaustum, et victimam,\n et sacrificium, et thus,\n et inferent oblationem in domum Domini.\n27\u00a0Si autem non audieritis me\n ut sanctificetis diem sabbati,\n et ne portetis onus,\n et ne inferatis per portas Jerusalem in die sabbati,\n succendam ignem in portis ejus,\n et devorabit domos Jerusalem,\n et non extinguetur.]","title":"Vulgate: Jeremiah: Jeremiah Chapter 17","type":"page"}