{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer018.htm","path":"bib/vul/jer018.htm","source_url":"https://sacred-texts.com/bib/vul/jer018.htm","text":"1 Verbum quod factum est ad Jeremiam a Domino, dicens:\n2 Surge, et descende in domum figuli, et ibi audies verba mea.\n3 Et descendi in domum figuli, et ecce ipse faciebat opus super rotam.\n4 Et dissipatum est vas quod ipse faciebat e luto manibus suis: conversusque fecit illud vas alterum, sicut placuerat in oculis ejus ut faceret.\n5 Et factum est verbum Domini ad me, dicens:\n6\u00a0[Numquid sicut figulus iste,\n non potero vobis facere, domus Isra\u00ebl? ait Dominus:\n ecce sicut lutum in manu figuli,\n sic vos in manu mea, domus Isra\u00ebl.\n7\u00a0Repente loquar adversum gentem et adversus regnum,\n ut eradicem, et destruam, et disperdam illud:\n8\u00a0si p\u0153nitentiam egerit gens illa a malo suo\n quod locutus sum adversus eam,\n agam et ego p\u0153nitentiam super malo\n quod cogitavi ut facerem ei.\n9\u00a0Et subito loquar de gente et de regno,\n ut \u00e6dificem et plantem illud.\n10\u00a0Si fecerit malum in oculis meis,\n ut non audiat vocem meam,\n p\u0153nitentiam agam super bono quod locutus sum ut facerem ei.\n11\u00a0Nunc ergo dic viro Juda, et habitatoribus Jerusalem, dicens:\n H\u00e6c dicit Dominus:\n Ecce ego fingo contra vos malum,\n et cogito contra vos cogitationem:\n revertatur unusquisque a via sua mala,\n et dirigite vias vestras et studia vestra.\n12\u00a0Qui dixerunt: Desperavimus:\n post cogitationes enim nostras ibimus,\n et unusquisque pravitatem cordis sui mali faciemus.\n13\u00a0Ideo h\u00e6c dicit Dominus:\n Interrogate gentes:\n Quis audivit talia horribilia,\n qu\u00e6 fecit nimis virgo Isra\u00ebl?\n14\u00a0Numquid deficiet de petra agri nix Libani?\n aut evelli possunt aqu\u00e6 erumpentes frigid\u00e6, et defluentes?\n15\u00a0Quia oblitus est mei populus meus,\n frustra libantes,\n et impingentes in viis suis,\n in semitis s\u00e6culi,\n ut ambularent per eas in itinere non trito,\n16\u00a0ut fieret terra eorum in desolationem,\n et in sibilum sempiternum:\n omnis qui pr\u00e6terierit per eam obstupescet,\n et movebit caput suum.\n17\u00a0Sicut ventus urens dispergam eos coram inimico:\n dorsum, et non faciem, ostendam eis in die perditionis eorum.]\n \n18\u00a0Et dixerunt: [Venite, et cogitemus contra Jeremiam cogitationes:\n non enim peribit lex a sacerdote,\n neque consilium a sapiente,\n nec sermo a propheta:\n venite, et percutiamus eum lingua,\n et non attendamus ad universos sermones ejus.]\n19\u00a0[Attende, Domine, ad me,\n et audi vocem adversariorum meorum.\n20\u00a0Numquid redditur pro bono malum,\n quia foderunt foveam anim\u00e6 me\u00e6?\n Recordare quod steterim in conspectu tuo\n ut loquerer pro eis bonum,\n et averterem indignationem tuam ab eis.\n21\u00a0Propterea da filios eorum in famem,\n et deduc eos in manus gladii:\n fiant uxores eorum absque liberis, et vidu\u00e6:\n et viri earum interficiantur morte:\n juvenes eorum confodiantur gladio in pr\u00e6lio:\n22\u00a0audiatur clamor de domibus eorum:\n adduces enim super eos latronem repente,\n quia foderunt foveam ut caperent me,\n et laqueos absconderunt pedibus meis.\n23\u00a0Tu autem, Domine, scis omne consilium eorum\n adversum me in mortem:\n ne propitieris iniquitati eorum,\n et peccatum eorum a facie tua non deleatur:\n fiant corruentes in conspectu tuo;\n in tempore furoris tui abutere eis.]","title":"Vulgate: Jeremiah: Jeremiah Chapter 18","type":"page"}