{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer019.htm","path":"bib/vul/jer019.htm","source_url":"https://sacred-texts.com/bib/vul/jer019.htm","text":"1 H\u00e6c dicit Dominus: Vade, et accipe lagunculam figuli testeam a senioribus populi et a senioribus sacerdotum,\n2 et egredere ad vallem filii Ennom, qu\u00e6 est juxta introitum port\u00e6 fictilis: et pr\u00e6dicabis ibi verba qu\u00e6 ego loquar ad te.\n3\u00a0Et dices: [Audite verbum Domini,\n reges Juda, et habitatores Jerusalem.\n H\u00e6c dicit Dominus exercituum, Deus Isra\u00ebl:\n Ecce ego inducam afflictionem super locum istum,\n ita ut omnis qui audierit illam, tinniant aures ejus,\n4\u00a0eo quod dereliquerint me,\n et alienum fecerint locum istum,\n et libaverunt in eo diis alienis quos nescierunt,\n ipsi et patres eorum, et reges Juda:\n et repleverunt locum istum sanguine innocentum,\n5\u00a0et \u00e6dificaverunt excelsa Baalim,\n ad comburendos filios suos igni in holocaustum Baalim:\n qu\u00e6 non pr\u00e6cepi, nec locutus sum,\n nec ascenderunt in cor meum.\n6\u00a0Propterea ecce dies veniunt, dicit Dominus,\n et non vocabitur amplius locus iste Topheth,\n et vallis filii Ennom,\n sed vallis occisionis.\n7\u00a0Et dissipabo consilium Juda et Jerusalem in loco isto,\n et subvertam eos gladio in conspectu inimicorum suorum,\n et in manu qu\u00e6rentium animas eorum:\n et dabo cadavera eorum escam volatilibus c\u00e6li et bestiis terr\u00e6.\n8\u00a0Et ponam civitatem hanc in stuporem, et in sibilum:\n omnis qui pr\u00e6terierit per eam obstupescet,\n et sibilabit super universa plaga ejus.\n9\u00a0Et cibabo eos carnibus filiorum suorum et carnibus filiarum suarum:\n et unusquisque carnem amici sui comedet in obsidione,\n et in angustia in qua concludent eos inimici eorum,\n et qui qu\u00e6runt animas eorum.]\n10 Et conteres lagunculam in oculis virorum qui ibunt tecum,\n11\u00a0et dices ad eos: [H\u00e6c dicit Dominus exercituum:\n Sic conteram populum istum, et civitatem istam,\n sicut conteritur vas figuli,\n quod non potest ultra instaurari:\n et in Topheth sepelientur,\n eo quod non sit alius locus ad sepeliendum.\n12\u00a0Sic faciam loco huic, ait Dominus,\n et habitatoribus ejus,\n et ponam civitatem istam sicut Topheth.\n13\u00a0Et erunt domus Jerusalem,\n et domus regum Juda,\n sicut locus Topheth, immund\u00e6,\n omnes domus in quarum domatibus sacrificaverunt omni militi\u00e6 c\u00e6li,\n et libaverunt libamina diis alienis.]\n \n14 Venit autem Jeremias de Topheth, quo miserat eum Dominus ad prophetandum, et stetit in atrio domus Domini, et dixit ad omnem populum:\n15 H\u00e6c dicit Dominus exercituum, Deus Isra\u00ebl: Ecce ego inducam super civitatem hanc, et super omnes urbes ejus, universa mala qu\u00e6 locutus sum adversum eam, quoniam induraverunt cervicem suam ut non audirent sermones meos.","title":"Vulgate: Jeremiah: Jeremiah Chapter 19","type":"page"}