{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer020.htm","path":"bib/vul/jer020.htm","source_url":"https://sacred-texts.com/bib/vul/jer020.htm","text":"1 Et audivit Phassur filius Emmer, sacerdos, qui constitutus erat princeps in domo Domini, Jeremiam prophetantem sermones istos.\n2 Et percussit Phassur Jeremiam prophetam, et misit eum in nervum quod erat in porta Benjamin superiori, in domo Domini.\n3 Cumque illuxisset in crastinum, eduxit Phassur Jeremiam de nervo, et dixit ad eum Jeremias: Non Phassur vocavit Dominus nomen tuum, sed Pavorem undique.\n4\u00a0Quia h\u00e6c dicit Dominus: [Ecce ego dabo te in pavorem,\n te et omnes amicos tuos:\n et corruent gladio inimicorum suorum,\n et oculi tui videbunt:\n et omnem Judam dabo in manum regis Babylonis,\n et traducet eos in Babylonem,\n et percutiet eos gladio.\n5\u00a0Et dabo universam substantiam civitatis hujus,\n et omnem laborem ejus, omneque pretium,\n et cunctos thesauros regum Juda\n dabo in manu inimicorum eorum:\n et diripient eos, et tollent,\n et ducent in Babylonem.\n6\u00a0Tu autem, Phassur, et omnes habitatores domus tu\u00e6,\n ibitis in captivitatem:\n et in Babylonem venies,\n et ibi morieris, ibique sepelieris\n tu, et omnes amici tui,\n quibus prophetasti mendacium.]\n \n7\u00a0[Seduxisti me, Domine, et seductus sum:\n fortior me fuisti, et invaluisti:\n factus sum in derisum tota die;\n omnes subsannant me.\n8\u00a0Quia jam olim loquor,\n vociferans iniquitatem, et vastitatem clamito:\n et factus est mihi sermo Domini in opprobrium,\n et in derisum tota die.\n9\u00a0Et dixi: Non recordabor ejus,\n neque loquar ultra in nomine illius:\n et factus est in corde meo quasi ignis ex\u00e6stuans,\n claususque in ossibus meis,\n et defeci, ferre non sustinens.\n10\u00a0Audivi enim contumelias multorum,\n et terrorem in circuitu:\n Persequimini, et persequamur eum,\n ab omnibus viris qui erant pacifici mei,\n et custodientes latus meum:\n si quomodo decipiatur, et pr\u00e6valeamus adversus eum,\n et consequamur ultionem ex eo.\n11\u00a0Dominus autem mecum est, quasi bellator fortis:\n idcirco qui persequuntur me cadent,\n et infirmi erunt:\n confundentur vehementer,\n quia non intellexerunt opprobrium sempiternum,\n quod numquam delebitur.\n12\u00a0Et tu, Domine exercituum, probator justi,\n qui vides renes et cor,\n videam, qu\u00e6so, ultionem tuam ex eis:\n tibi enim revelavi causam meam.\n13\u00a0Cantate Domino,\n laudate Dominum,\n quia liberavit animam pauperis de manu malorum.\n14\u00a0Maledicta dies in qua natus sum!\n dies in qua peperit me mater mea\n non sit benedicta!\n15\u00a0Maledictus vir qui annuntiavit patri meo,\n dicens: Natus est tibi puer masculus,\n et quasi gaudio l\u00e6tificavit eum!\n16\u00a0Sit homo ille ut sunt civitates qu\u00e6 subvertit Dominus,\n et non p\u0153nituit eum:\n audiat clamorem mane,\n et ululatum in tempore meridiano,\n17\u00a0qui non me interfecit a vulva,\n ut fieret mihi mater mea sepulchrum,\n et vulva ejus conceptus \u00e6ternus!\n18\u00a0Quare de vulva egressus sum,\n ut viderem laborem et dolorem,\n et consumerentur in confusione dies mei?]","title":"Vulgate: Jeremiah: Jeremiah Chapter 20","type":"page"}