{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer022.htm","path":"bib/vul/jer022.htm","source_url":"https://sacred-texts.com/bib/vul/jer022.htm","text":"1 H\u00e6c dicit Dominus: Descende in domum regis Juda, et loqueris ibi verbum hoc,\n2\u00a0et dices: [Audi verbum Domini, rex Juda,\n qui sedes super solium David:\n tu et servi tui, et populus tuus,\n qui ingredimini per portas istas.\n3\u00a0H\u00e6c dicit Dominus:\n Facite judicium et justitiam,\n et liberate vi oppressum de manu calumniatoris:\n et advenam, et pupillum, et viduam\n nolite contristare, neque opprimatis inique,\n et sanguinem innocentem ne effundatis in loco isto.\n4\u00a0Si enim facientes feceritis verbum istud,\n ingredientur per portas domus hujus\n reges sedentes de genere David super thronum ejus,\n et ascendentes currus et equos,\n ipsi, et servi, et populus eorum.\n5\u00a0Quod si non audieritis verba h\u00e6c:\n in memetipso juravi, dicit Dominus,\n quia in solitudinem erit domus h\u00e6c.\n6\u00a0Quia h\u00e6c dicit Dominus super domum regis Juda:\n Galaad, tu mihi caput Libani,\n si non posuero te solitudinem, urbes inhabitabiles!\n7\u00a0Et sanctificabo super te, interficientem virum et arma ejus:\n et succident electas cedros tuas,\n et pr\u00e6cipitabunt in ignem.\n8\u00a0Et pertransibunt gentes mult\u00e6 per civitatem hanc,\n et dicet unusquisque proximo suo:\n Quare fecit Dominus sic civitati huic grandi?\n9\u00a0Et respondebunt:\n Eo quod dereliquerint pactum Domini Dei sui,\n et adoraverint deos alienos, et servierint eis.\n10\u00a0Nolite flere mortuum,\n neque lugeatis super eum fletu:\n plangite eum qui egreditur,\n quia non revertetur ultra,\n nec videbit terram nativitatis su\u00e6.\n11\u00a0Quia h\u00e6c dicit Dominus ad Sellum,\n filium Josi\u00e6, regem Juda,\n qui regnavit pro Josia patre suo,\n qui egressus est de loco isto:\n Non revertetur huc amplius,\n12\u00a0sed in loco ad quem transtuli eum, ibi morietur,\n et terram istam non videbit amplius.\n13\u00a0V\u00e6 qui \u00e6dificat domum suam in injustitia,\n et c\u0153nacula sua non in judicio:\n amicum suum opprimet frustra,\n et mercedem ejus non reddet ei:\n14\u00a0qui dicit: \u00c6dificabo mihi domum latam,\n et c\u0153nacula spatiosa:\n qui aperit sibi fenestras et facit laquearia cedrina,\n pingitque sinopide.\n15\u00a0Numquid regnabis quoniam confers te cedro?\n pater tuus numquid non comedit et bibit,\n et fecit judicium et justitiam tunc cum bene erat ei?\n16\u00a0Judicavit causam pauperis et egeni in bonum suum:\n numquid non ideo quia cognovit me? dicit Dominus.\n17\u00a0Tui vero oculi et cor ad avaritiam,\n et ad sanguinem innocentem fundendum,\n et ad calumniam, et ad cursum mali operis.\n18\u00a0Propterea h\u00e6c dicit Dominus ad Joakim,\n filium Josi\u00e6, regem Juda:\n Non plangent eum: V\u00e6 frater! et v\u00e6 soror!\n non concrepabunt ei: V\u00e6 domine! et v\u00e6 inclyte!\n19\u00a0Sepultura asini sepelietur,\n putrefactus et projectus extra portas Jerusalem.]\n \n20\u00a0[Ascende Libanum, et clama,\n et in Basan da vocem tuam:\n et clama ad transeuntes,\n quia contriti sunt omnes amatores tui.\n21\u00a0Locutus sum ad te in abundantia tua,\n et dixisti: Non audiam:\n h\u00e6c est via tua ab adolescentia tua,\n quia non audisti vocem meam.\n22\u00a0Omnes pastores tuos pascet ventus,\n et amatores tui in captivitatem ibunt:\n et tunc confunderis,\n et erubesces ab omni malitia tua.\n23\u00a0Qu\u00e6 sedes in Libano,\n et nidificas in cedris,\n quomodo congemuisti cum venissent tibi dolores,\n quasi dolores parturientis?\n24\u00a0Vivo ego, dicit Dominus,\n quia si fuerit Jechonias filius Joakim regis Juda\n annulus in manu dextera mea,\n inde evellam eum,\n25\u00a0et dabo te in manu qu\u00e6rentium animam tuam,\n et in manu quorum tu formidas faciem,\n et in manu Nabuchodonosor regis Babylonis,\n et in manu Chald\u00e6orum:\n26\u00a0et mittam te, et matrem tuam qu\u00e6 genuit te,\n in terram alienam, in qua nati non estis,\n ibique moriemini.\n27\u00a0Et in terram ad quam ipsi levant animam suam ut revertantur illuc,\n non revertentur.\n28\u00a0Numquid vas fictile atque contritum\n vir iste Jechonias?\n numquid vas absque omni voluptate?\n quare abjecti sunt ipse et semen ejus,\n et projecti in terram quam ignoraverunt?\n29\u00a0Terra, terra, terra, audi sermonem Domini.\n30\u00a0H\u00e6c dicit Dominus:\n Scribe virum istum sterilem,\n virum qui in diebus suis non prosperabitur:\n nec enim erit de semine ejus vir\n qui sedeat super solium David,\n et potestatem habeat ultra in Juda.]","title":"Vulgate: Jeremiah: Jeremiah Chapter 22","type":"page"}