{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer023.htm","path":"bib/vul/jer023.htm","source_url":"https://sacred-texts.com/bib/vul/jer023.htm","text":"1\u00a0[V\u00e6 pastoribus qui disperdunt et dilacerant\n gregem pascu\u00e6 me\u00e6! dicit Dominus.\n2\u00a0Ideo h\u00e6c dicit Dominus Deus Isra\u00ebl\n ad pastores qui pascunt populum meum:\n Vos dispersistis gregem meum,\n et ejecistis eos, et non visitastis eos:\n ecce ego visitabo super vos\n malitiam studiorum vestrorum, ait Dominus.\n3\u00a0Et ego congregabo reliquias gregis mei\n de omnibus terris ad quas ejecero eos illuc:\n et convertam eos ad rura sua,\n et crescent et multiplicabuntur.\n4\u00a0Et suscitabo super eos pastores, et pascent eos:\n non formidabunt ultra, et non pavebunt,\n et nullus qu\u00e6retur ex numero, dicit Dominus.]\n \n5\u00a0[Ecce dies veniunt, dicit Dominus,\n et suscitabo David germen justum:\n et regnabit rex, et sapiens erit,\n et faciet judicium et justitiam in terra.\n6\u00a0In diebus illis salvabitur Juda,\n et Isra\u00ebl habitabit confidenter:\n et hoc est nomen quod vocabunt eum:\n Dominus justus noster.\n7\u00a0Propter hoc ecce dies veniunt, dicit Dominus,\n et non dicent ultra: Vivit Dominus,\n qui eduxit filios Isra\u00ebl de terra \u00c6gypti,\n8\u00a0sed: Vivit Dominus,\n qui eduxit et adduxit semen domus Isra\u00ebl de terra aquilonis,\n et de cunctis terris ad quas ejeceram eos illuc,\n et habitabunt in terra sua.]\n \n9\u00a0Ad prophetas: [Contritum est cor meum in medio mei;\n contremuerunt omnia ossa mea:\n factus sum quasi vir ebrius,\n et quasi homo madidus a vino,\n a facie Domini,\n et a facie verborum sanctorum ejus.\n10\u00a0Quia adulteris repleta est terra,\n quia a facie maledictionis luxit terra,\n arefacta sunt arva deserti:\n factus est cursus eorum malus,\n et fortitudo eorum dissimilis.\n11\u00a0Propheta namque et sacerdos polluti sunt,\n et in domo mea inveni malum eorum, ait Dominus.\n12\u00a0Idcirco via eorum erit quasi lubricum in tenebris:\n impellentur enim, et corruent in ea:\n afferam enim super eos mala,\n annum visitationis eorum, ait Dominus.\n13\u00a0Et in prophetis Samari\u00e6 vidi fatuitatem:\n prophetabant in Baal,\n et decipiebant populum meum Isra\u00ebl.\n14\u00a0Et in prophetis Jerusalem vidi similitudinem adulterantium,\n et iter mendacii:\n et confortaverunt manus pessimorum,\n ut non converteretur unusquisque a malitia sua:\n facti sunt mihi omnes ut Sodoma,\n et habitatores ejus quasi Gomorrha.\n15\u00a0Propterea h\u00e6c dicit Dominus exercituum ad prophetas:\n Ecce ego cibabo eos absinthio,\n et potabo eos felle:\n a prophetis enim Jerusalem egressa est pollutio\n super omnem terram.\n16\u00a0H\u00e6c dicit Dominus exercituum:\n Nolite audire verba prophetarum\n qui prophetant vobis, et decipiunt vos:\n visionem cordis sui loquuntur,\n non de ore Domini.\n17\u00a0Dicunt his qui blasphemant me:\n Locutus est Dominus: Pax erit vobis:\n et omni qui ambulat in pravitate cordis sui dixerunt:\n Non veniet super vos malum.\n18\u00a0Quis enim affuit in consilio Domini,\n et vidit, et audivit sermonem ejus?\n quis consideravit verbum illius, et audivit?\n19\u00a0Ecce turbo Dominic\u00e6 indignationis egredietur,\n et tempestas erumpens super caput impiorum veniet.\n20\u00a0Non revertetur furor Domini,\n usque dum faciat et usque dum compleat cogitationem cordis sui:\n in novissimis diebus intelligetis consilium ejus.\n21\u00a0Non mittebam prophetas,\n et ipsi currebant:\n non loquebar ad eos,\n et ipsi prophetabant.\n22\u00a0Si stetissent in consilio meo,\n et nota fecissent verba mea populo meo,\n avertissem utique eos a via sua mala,\n et a cogitationibus suis pessimis.\n23\u00a0Putasne Deus e vicino ego sum, dicit Dominus,\n et non Deus de longe?\n24\u00a0Si occultabitur vir in absconditis,\n et ego non videbo eum? dicit Dominus.\n Numquid non c\u00e6lum et terram ego impleo? dicit Dominus.\n25\u00a0Audivi qu\u00e6 dixerunt prophet\u00e6\n prophetantes in nomine meo mendacium,\n atque dicentes: Somniavi, somniavi.\n26\u00a0Usquequo istud est in corde prophetarum vaticinantium mendacium,\n et prophetantium seductiones cordis sui?\n27\u00a0Qui volunt facere ut obliviscatur populus meus nominis mei,\n propter somnia eorum qu\u00e6 narrat unusquisque ad proximum suum,\n sicut obliti sunt patres eorum nominis mei propter Baal?\n28\u00a0Propheta qui habet somnium,\n narret somnium:\n et qui habet sermonem meum,\n loquatur sermonem meum vere.\n Quid paleis ad triticum? dicit Dominus.\n29\u00a0Numquid non verba mea sunt quasi ignis, dicit Dominus,\n et quasi malleus conterens petram?\n30\u00a0Propterea ecce ego ad prophetas, ait Dominus,\n qui furantur verba mea unusquisque a proximo suo.\n31\u00a0Ecce ego ad prophetas, ait Dominus,\n qui assumunt linguas suas, et aiunt: Dicit Dominus.\n32\u00a0Ecce ego ad prophetas somniantes mendacium, ait Dominus,\n qui narraverunt ea, et seduxerunt populum meum\n in mendacio suo et in miraculis suis,\n cum ego non misissem eos, nec mandassem eis:\n qui nihil profuerunt populo huic, dicit Dominus.\n33\u00a0Si igitur interrogaverit te populus iste,\n vel propheta, aut sacerdos, dicens:\n Quod est onus Domini?\n dices ad eos: Vos estis onus:\n projiciam quippe vos, dicit Dominus.\n34\u00a0Et propheta, et sacerdos, et populus\n qui dicit: Onus Domini:\n visitabo super virum illum et super domum ejus.\n35\u00a0H\u00e6c dicetis unusquisque ad proximum,\n et ad fratrem suum:\n Quid respondit Dominus?\n et quid locutus est Dominus?\n36\u00a0Et onus Domini ultra non memorabitur:\n quia onus erit unicuique sermo suus,\n et pervertistis verba Dei viventis,\n Domini exercituum, Dei nostri.\n37\u00a0H\u00e6c dices ad prophetam:\n Quid respondit tibi Dominus?\n et quid locutus est Dominus?\n38\u00a0Si autem onus Domini dixeritis,\n propter hoc h\u00e6c dicit Dominus:\n Quia dixistis sermonem istum: Onus Domini,\n et misi ad vos dicens: Nolite dicere: Onus Domini:\n39\u00a0propterea ecce ego tollam vos portans,\n et derelinquam vos,\n et civitatem quam dedi vobis et patribus vestris,\n a facie mea:\n40\u00a0et dabo vos in opprobrium sempiternum,\n et in ignominiam \u00e6ternam,\n qu\u00e6 numquam oblivione delebitur.]","title":"Vulgate: Jeremiah: Jeremiah Chapter 23","type":"page"}