{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer025.htm","path":"bib/vul/jer025.htm","source_url":"https://sacred-texts.com/bib/vul/jer025.htm","text":"1 Verbum quod factum est ad Jeremiam, de omni populo Juda, in anno quarto Joakim filii Josi\u00e6 regis Juda (ipse est annus primus Nabuchodonosor regis Babylonis),\n2 quod locutus est Jeremias propheta ad omnem populum Juda, et ad universos habitatores Jerusalem, dicens:\n3 A tertiodecimo anno Josi\u00e6 filii Amon regis Juda, usque ad diem hanc, iste tertius et vigesimus annus, factum est verbum Domini ad me, et locutus sum ad vos, de nocte consurgens et loquens, et non audistis.\n4 Et misit Dominus ad vos omnes servos suos prophetas, consurgens diluculo, mittensque: et non audistis, neque inclinastis aures vestras ut audiretis,\n5 cum diceret: Revertimini unusquisque a via sua mala, et a pessimis cogitationibus vestris, et habitabitis in terra quam dedit Dominus vobis et patribus vestris, a s\u00e6culo et usque in s\u00e6culum:\n6 et nolite ire post deos alienos, ut serviatis eis, adoretisque eos: neque me ad iracundiam provocetis in operibus manuum vestrarum, et non affligam vos.\n7 Et non audistis me, dicit Dominus, ut me ad iracundiam provocaretis in operibus manuum vestrarum, in malum vestrum.\n8 Propterea h\u00e6c dicit Dominus exercituum: Pro eo quod non audistis verba mea,\n9 ecce ego mittam et assumam universas cognationes aquilonis, ait Dominus, et Nabuchodonosor regem Babylonis servum meum, et adducam eos super terram istam, et super habitatores ejus, et super omnes nationes qu\u00e6 in circuitu illius sunt: et interficiam eos, et ponam eos in stuporem et in sibilum, et in solitudines sempiternas.\n10 Perdamque ex eis vocem gaudii et vocem l\u00e6titi\u00e6, vocem sponsi et vocem spons\u00e6, vocem mol\u00e6 et lumen lucern\u00e6.\n11 Et erit universa terra h\u00e6c in solitudinem, et in stuporem: et servient omnes gentes ist\u00e6 regi Babylonis septuaginta annis.\n12 Cumque impleti fuerint septuaginta anni, visitabo super regem Babylonis et super gentem illam, dicit Dominus, iniquitatem eorum, et super terram Chald\u00e6orum, et ponam illam in solitudines sempiternas.\n13 Et adducam super terram illam omnia verba mea, qu\u00e6 locutus sum contra eam, omne quod scriptum est in libro isto, qu\u00e6cumque prophetavit Jeremias adversum omnes gentes:\n14\u00a0quia servierunt eis, cum essent gentes mult\u00e6, et reges magni: et reddam eis secundum opera eorum, et secundum facta manuum suarum.\n \n15 Quia sic dicit Dominus exercituum, Deus Isra\u00ebl: Sume calicem vini furoris hujus de manu mea, et propinabis de illo cunctis gentibus ad quas ego mittam te.\n16 Et bibent, et turbabuntur et insanient a facie gladii quem ego mittam inter eos.\n17 Et accepi calicem de manu Domini, et propinavi cunctis gentibus ad quas misit me Dominus,\n18 Jerusalem, et civitatibus Juda, et regibus ejus, et principibus ejus, ut darem eos in solitudinem, et in stuporem, et in sibilum, et in maledictionem, sicut est dies ista:\n19 Pharaoni regi \u00c6gypti, et servis ejus, et principibus ejus, et omni populo ejus:\n20 et universis generaliter: cunctis regibus terr\u00e6 Ausitidis, et cunctis regibus terr\u00e6 Philisthiim, et Ascaloni, et Gaz\u00e6, et Accaron, et reliquiis Azoti:\n21 et Idum\u00e6\u00e6, et Moab, et filiis Ammon:\n22 et cunctis regibus Tyri, et universis regibus Sidonis, et regibus terr\u00e6 insularum qui sunt trans mare:\n23 et Dedan, et Thema, et Buz, et universis qui attonsi sunt in comam:\n24 et cunctis regibus Arabi\u00e6, et cunctis regibus occidentis, qui habitant in deserto:\n25 et cunctis regibus Zambri, et cunctis regibus Elam, et cunctis regibus Medorum:\n26 cunctis quoque regibus aquilonis, de prope et de longe, unicuique contra fratrem suum: et omnibus regnis terr\u00e6 qu\u00e6 super faciem ejus sunt: et rex Sesach bibet post eos.\n27 Et dices ad eos: H\u00e6c dicit Dominus exercituum, Deus Isra\u00ebl: Bibite, et inebriamini, et vomite: et cadite, neque surgatis a facie gladii quem ego mittam inter vos.\n28 Cumque noluerint accipere calicem de manu tua ut bibant, dices ad eos: H\u00e6c dicit Dominus exercituum: Bibentes bibetis:\n29 quia ecce in civitate in qua invocatum est nomen meum ego incipiam affligere, et vos quasi innocentes et immunes eritis? non eritis immunes: gladium enim ego voco super omnes habitatores terr\u00e6, dicit Dominus exercituum.\n30\u00a0Et tu prophetabis ad eos omnia verba h\u00e6c, et dices ad illos: [Dominus de excelso rugiet,\n et de habitaculo sancto suo dabit vocem suam:\n rugiens rugiet super decorem suum:\n celeuma quasi calcantium concinetur\n adversus omnes habitatores terr\u00e6.\n31\u00a0Pervenit sonitus usque ad extrema terr\u00e6,\n quia judicium Domino cum gentibus:\n judicatur ipse cum omni carne.\n Impios tradidi gladio, dicit Dominus.\n32\u00a0H\u00e6c dicit Dominus exercituum:\n Ecce afflictio egredietur de gente in gentem,\n et turbo magnus egredietur a summitatibus terr\u00e6.\n33\u00a0Et erunt interfecti Domini in die illa,\n a summo terr\u00e6 usque ad summum ejus:\n non plangentur, et non colligentur, neque sepelientur:\n in sterquilinium super faciem terr\u00e6 jacebunt.\n34\u00a0Ululate, pastores, et clamate,\n et aspergite vos cinere, optimates gregis:\n quia completi sunt dies vestri ut interficiamini,\n et dissipationes vestr\u00e6:\n et cadetis quasi vasa pretiosa.\n35\u00a0Et peribit fuga a pastoribus,\n et salvatio ab optimatibus gregis.\n36\u00a0Vox clamoris pastorum, et ululatus optimatum gregis,\n quia vastavit Dominus pascua eorum:\n37\u00a0et conticuerunt arva pacis a facie ir\u00e6 furoris Domini.\n38\u00a0Dereliquit quasi leo umbraculum suum,\n quia facta est terra eorum in desolationem\n a facie ir\u00e6 columb\u00e6,\n et a facie ir\u00e6 furoris Domini.]","title":"Vulgate: Jeremiah: Jeremiah Chapter 25","type":"page"}