{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer027.htm","path":"bib/vul/jer027.htm","source_url":"https://sacred-texts.com/bib/vul/jer027.htm","text":"1 In principio regni Joakim filii Josi\u00e6 regis Juda, factum est verbum istud ad Jeremiam a Domino, dicens:\n2 H\u00e6c dicit Dominus ad me: Fac tibi vincula et catenas, et pones eas in collo tuo,\n3 et mittes eas ad regem Edom, et ad regem Moab, et ad regem filiorum Ammon, et ad regem Tyri, et ad regem Sidonis, in manu nuntiorum qui venerunt Jerusalem ad Sedeciam regem Juda.\n4 Et pr\u00e6cipies eis ut ad dominos suos loquantur: H\u00e6c dicit Dominus exercituum, Deus Isra\u00ebl: H\u00e6c dicetis ad dominos vestros:\n5 Ego feci terram, et homines, et jumenta qu\u00e6 sunt super faciem terr\u00e6, in fortitudine mea magna, et in brachio meo extento, et dedi eam ei qui placuit in oculis meis.\n6 Et nunc itaque ego dedi omnes terras istas in manu Nabuchodonosor regis Babylonis servi mei: insuper et bestias agri dedi ei, ut serviant illi:\n7 et servient ei omnes gentes, et filio ejus, et filio filii ejus, donec veniat tempus terr\u00e6 ejus et ipsius: et servient ei gentes mult\u00e6 et reges magni.\n8 Gens autem et regnum quod non servierit Nabuchodonosor regi Babylonis, et quicumque non curvaverit collum suum sub jugo regis Babylonis, in gladio, et in fame, et in peste visitabo super gentem illam, ait Dominus, donec consumam eos in manu ejus.\n9 Vos ergo nolite audire prophetas vestros, et divinos, et somniatores, et augures, et maleficos, qui dicunt vobis: Non servietis regi Babylonis:\n10 quia mendacium prophetant vobis, ut longe vos faciant de terra vestra, et ejiciant vos, et pereatis.\n11 Porro gens qu\u00e6 subjecerit cervicem suam sub jugo regis Babylonis, et servierit ei, dimittam eam in terra sua, dicit Dominus, et colet eam, et habitabit in ea.\n12 Et ad Sedeciam regem Juda locutus sum secundum omnia verba h\u00e6c, dicens: Subjicite colla vestra sub jugo regis Babylonis, et servite ei et populo ejus, et vivetis.\n13 Quare moriemini, tu et populus tuus, gladio, et fame, et peste, sicut locutus est Dominus ad gentem qu\u00e6 servire noluerit regi Babylonis?\n14 Nolite audire verba prophetarum dicentium vobis: Non servietis regi Babylonis: quia mendacium ipsi loquuntur vobis:\n15 quia non misi eos, ait Dominus, et ipsi prophetant in nomine meo mendaciter, ut ejiciant vos, et pereatis, tam vos quam prophet\u00e6 qui vaticinantur vobis.\n16 Et ad sacerdotes, et ad populum istum, locutus sum, dicens: H\u00e6c dicit Dominus: Nolite audire verba prophetarum vestrorum, qui prophetant vobis, dicentes: Ecce vasa Domini revertentur de Babylone nunc cito: mendacium enim prophetant vobis.\n17 Nolite ergo audire eos: sed servite regi Babylonis, ut vivatis: quare datur h\u00e6c civitas in solitudinem?\n18 Et si prophet\u00e6 sunt, et est verbum Domini in eis, occurrant Domino exercituum, ut non veniant vasa qu\u00e6 derelicta fuerant in domo Domini, et in domo regis Juda, et in Jerusalem, in Babylonem.\n19 Quia h\u00e6c dicit Dominus exercituum ad columnas, et ad mare, et ad bases, et ad reliqua vasorum qu\u00e6 remanserunt in civitate hac,\n20 qu\u00e6 non tulit Nabuchodonosor rex Babylonis cum transferret Jechoniam filium Joakim regem Juda de Jerusalem in Babylonem, et omnes optimates Juda et Jerusalem:\n21 quia h\u00e6c dicit Dominus exercituum, Deus Isra\u00ebl, ad vasa qu\u00e6 derelicta sunt in domo Domini, et in domo regis Juda et Jerusalem:\n22 In Babylonem transferentur, et ibi erunt usque ad diem visitationis su\u00e6, dicit Dominus, et afferri faciam ea, et restitui in loco isto.","title":"Vulgate: Jeremiah: Jeremiah Chapter 27","type":"page"}