{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer031.htm","path":"bib/vul/jer031.htm","source_url":"https://sacred-texts.com/bib/vul/jer031.htm","text":"1\u00a0[In tempore illo, dicit Dominus,\n ero Deus universis cognationibus Isra\u00ebl,\n et ipsi erunt mihi in populum.\n2\u00a0H\u00e6c dicit Dominus:\n Invenit gratiam in deserto populus qui remanserat a gladio:\n vadet ad requiem suam Isra\u00ebl.\n3\u00a0Longe Dominus apparuit mihi.\n Et in caritate perpetua dilexi te:\n ideo attraxi te, miserans.\n4\u00a0Rursumque \u00e6dificabo te, et \u00e6dificaberis, virgo Isra\u00ebl:\n adhuc ornaberis tympanis tuis,\n et egredieris in choro ludentium.\n5\u00a0Adhuc plantabis vineas in montibus Samari\u00e6:\n plantabunt plantantes,\n et donec tempus veniat, non vindemiabunt.\n6\u00a0Quia erit dies in qua clamabunt custodes in monte Ephraim:\n Surgite, et ascendamus in Sion ad Dominum Deum nostrum.\n7\u00a0Quia h\u00e6c dicit Dominus:\n Exsultate in l\u00e6titia, Jacob,\n et hinnite contra caput gentium:\n personate, et canite, et dicite:\n Salva, Domine, populum tuum, reliquias Isra\u00ebl.\n8\u00a0Ecce ego adducam eos de terra aquilonis,\n et congregabo eos ab extremis terr\u00e6:\n inter quos erunt c\u00e6cus et claudus,\n pr\u00e6gnans et pariens simul,\n c\u0153tus magnus revertentium huc.\n9\u00a0In fletu venient,\n et in misericordia reducam eos:\n et adducam eos per torrentes aquarum in via recta,\n et non impingent in ea,\n quia factus sum Isra\u00ebli pater,\n et Ephraim primogenitus meus est.\n10\u00a0Audite verbum Domini, gentes,\n et annuntiate in insulis qu\u00e6 procul sunt,\n et dicite: Qui dispersit Isra\u00ebl congregabit eum,\n et custodiet eum sicut pastor gregem suum.\n11\u00a0Redemit enim Dominus Jacob,\n et liberavit eum de manu potentioris.\n12\u00a0Et venient, et laudabunt in monte Sion:\n et confluent ad bona Domini,\n super frumento, et vino, et oleo,\n et f\u0153tu pecorum et armentorum:\n eritque anima eorum quasi hortus irriguus,\n et ultra non esurient.\n13\u00a0Tunc l\u00e6tabitur virgo in choro,\n juvenes et senes simul:\n et convertam luctum eorum in gaudium,\n et consolabor eos, et l\u00e6tificabo a dolore suo.\n14\u00a0Et inebriabo animam sacerdotum pinguedine,\n et populus meus bonis meis adimplebitur, ait Dominus.\n15\u00a0H\u00e6c dicit Dominus:\n Vox in excelso audita est lamentationis:\n luctus, et fletus Rachel plorantis filios suos,\n et nolentis consolari super eis,\n quia non sunt.\n16\u00a0H\u00e6c dicit Dominus:\n Quiescat vox tua a ploratu,\n et oculi tui a lacrimis,\n quia est merces operi tuo, ait Dominus,\n et revertentur de terra inimici:\n17\u00a0et est spes novissimis tuis, ait Dominus,\n et revertentur filii ad terminos suos.\n18\u00a0Audiens audivi Ephraim transmigrantem:\n Castigasti me, et eruditus sum,\n quasi juvenculus indomitus:\n converte me, et convertar,\n quia tu Dominus Deus meus.\n19\u00a0Postquam enim convertisti me, egi p\u0153nitentiam:\n et postquam ostendisti mihi, percussi femur meum.\n Confusus sum, et erubui,\n quoniam sustinui opprobrium adolescenti\u00e6 me\u00e6.\n20\u00a0Si filius honorabilis mihi Ephraim,\n si puer delicatus!\n quia ex quo locutus sum de eo,\n adhuc recordabor ejus.\n Idcirco conturbata sunt viscera mea super eum:\n miserans miserebor ejus, ait Dominus.\n21\u00a0Statue tibi speculam;\n pone tibi amaritudines;\n dirige cor tuum in viam rectam in qua ambulasti:\n revertere, virgo Isra\u00ebl,\n revertere ad civitates tuas istas.\n22\u00a0Usquequo deliciis dissolveris, filia vaga?\n quia creavit Dominus novum super terram:\n femina circumdabit virum.\n23\u00a0H\u00e6c dicit Dominus exercituum, Deus Isra\u00ebl:\n Adhuc dicent verbum istud\n in terra Juda et in urbibus ejus,\n cum convertero captivitatem eorum:\n Benedicat tibi Dominus, pulchritudo justiti\u00e6, mons sanctus:\n24\u00a0et habitabunt in eo Judas et omnes civitates ejus simul,\n agricol\u00e6 et minantes greges.\n25\u00a0Quia inebriavi animam lassam,\n et omnem animam esurientem saturavi.\n26\u00a0Ideo quasi de somno suscitatus sum:\n et vidi, et somnus meus dulcis mihi.\n27\u00a0Ecce dies veniunt, dicit Dominus,\n et seminabo domum Isra\u00ebl et domum Juda\n semine hominum et semine jumentorum.\n28\u00a0Et sicut vigilavi super eos\n ut evellerem, et demolirer, et dissiparem,\n et disperderem, et affligerem,\n sic vigilabo super eos\n ut \u00e6dificem et plantem, ait Dominus.\n29\u00a0In diebus illis non dicent ultra:\n Patres comederunt uvam acerbam,\n et dentes filiorum obstupuerunt.\n30\u00a0Sed unusquisque in iniquitate sua morietur:\n omnis homo qui comederit uvam acerbam,\n obstupescent dentes ejus.\n31\u00a0Ecce dies venient, dicit Dominus,\n et feriam domui Isra\u00ebl et domui Juda f\u0153dus novum,\n32\u00a0non secundum pactum quod pepigi cum patribus eorum\n in die qua apprehendi manum eorum\n ut educerem eos de terra \u00c6gypti,\n pactum quod irritum fecerunt:\n et ego dominatus sum eorum, dicit Dominus.\n33\u00a0Sed hoc erit pactum quod feriam cum domo Isra\u00ebl\n post dies illos, dicit Dominus:\n dabo legem meam in visceribus eorum,\n et in corde eorum scribam eam,\n et ero eis in Deum,\n et ipsi erunt mihi in populum:\n34\u00a0et non docebit ultra vir proximum suum\n et vir fratrem suum,\n dicens: Cognosce Dominum:\n omnes enim cognoscent me,\n a minimo eorum usque ad maximum, ait Dominus:\n quia propitiabor iniquitati eorum,\n et peccati eorum non memorabor amplius.\n35\u00a0H\u00e6c dicit Dominus qui dat solem in lumine diei,\n ordinem lun\u00e6 et stellarum in lumine noctis:\n qui turbat mare, et sonant fluctus ejus:\n Dominus exercituum nomen illi:\n36\u00a0Si defecerint leges ist\u00e6 coram me, dicit Dominus,\n tunc et semen Isra\u00ebl deficiet,\n ut non sit gens coram me cunctis diebus.\n37\u00a0H\u00e6c dicit Dominus:\n Si mensurari potuerint c\u00e6li sursum,\n et investigari fundamenta terr\u00e6 deorsum,\n et ego abjiciam universum semen Isra\u00ebl,\n propter omnia qu\u00e6 fecerunt, dicit Dominus.\n38\u00a0Ecce dies veniunt, dicit Dominus,\n et \u00e6dificabitur civitas Domino,\n a turre Hananeel usque ad portam anguli.\n39\u00a0Et exibit ultra norma mensur\u00e6\n in conspectu ejus super collem Gareb,\n et circuibit Goatha,\n40\u00a0et omnem vallem cadaverum, et cineris,\n et universam regionem mortis\n usque ad torrentem Cedron,\n et usque ad angulum port\u00e6 equorum orientalis,\n Sanctum Domini:\n non evelletur, et non destruetur ultra in perpetuum.]","title":"Vulgate: Jeremiah: Jeremiah Chapter 31","type":"page"}