{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer033.htm","path":"bib/vul/jer033.htm","source_url":"https://sacred-texts.com/bib/vul/jer033.htm","text":"1 Et factum est verbum Domini ad Jeremiam secundo, cum adhuc clausus esset in atrio carceris, dicens:\n2\u00a0[H\u00e6c dicit Dominus, qui facturus est,\n et formaturus illud, et paraturus:\n Dominus nomen ejus:\n3\u00a0Clama ad me, et exaudiam te,\n et annuntiabo tibi grandia et firma qu\u00e6 nescis.\n4\u00a0Quia h\u00e6c dicit Dominus Deus Isra\u00ebl\n ad domos urbis hujus,\n et ad domos regis Juda, qu\u00e6 destruct\u00e6 sunt,\n et ad munitiones, et ad gladium\n5\u00a0venientium ut dimicent cum Chald\u00e6is,\n et impleant eas cadaveribus hominum\n quos percussi in furore meo et in indignatione mea,\n abscondens faciem meam a civitate hac,\n propter omnem malitiam eorum:\n6\u00a0Ecce ego obducam eis cicatricem et sanitatem,\n et curabo eos, et revelabo illis deprecationem pacis et veritatis.\n7\u00a0Et convertam conversionem Juda et conversionem Jerusalem,\n et \u00e6dificabo eos sicut a principio.\n8\u00a0Et emundabo illos ab omni iniquitate sua\n in qua peccaverunt mihi,\n et propitius ero cunctis iniquitatibus eorum,\n in quibus dereliquerunt mihi et spreverunt me.\n9\u00a0Et erit mihi in nomen, et in gaudium,\n et in laudem, et in exsultationem\n cunctis gentibus terr\u00e6,\n qu\u00e6 audierint omnia bona qu\u00e6 ego facturus sum eis:\n et pavebunt et turbabuntur in universis bonis,\n et in omni pace quam ego faciam eis.\n10\u00a0H\u00e6c dicit Dominus:\n Adhuc audietur in loco isto\n quem vos dicitis esse desertum,\n eo quod non sit homo nec jumentum\n in civitatibus Juda, et foris Jerusalem,\n qu\u00e6 desolat\u00e6 sunt, absque homine,\n et absque habitatore, et absque pecore,\n11\u00a0vox gaudii et vox l\u00e6titi\u00e6,\n vox sponsi et vox spons\u00e6,\n vox dicentium: Confitemini Domino exercituum,\n quoniam bonus Dominus,\n quoniam in \u00e6ternum misericordia ejus:\n et portantium vota in domum Domini:\n reducam enim conversionem terr\u00e6\n sicut a principio, dicit Dominus.\n12\u00a0H\u00e6c dicit Dominus exercituum:\n Adhuc erit in loco isto deserto,\n absque homine et absque jumento,\n et in cunctis civitatibus ejus,\n habitaculum pastorum accubantium gregum.\n13\u00a0In civitatibus montuosis,\n et in civitatibus campestribus,\n et in civitatibus qu\u00e6 ad austrum sunt,\n et in terra Benjamin, et in circuitu Jerusalem,\n et in civitatibus Juda,\n adhuc transibunt greges ad manum numerantis, ait Dominus.]\n \n14\u00a0[Ecce dies veniunt, dicit Dominus,\n et suscitabo verbum bonum quod locutus sum\n ad domum Isra\u00ebl et ad domum Juda.\n15\u00a0In diebus illis et in tempore illo\n germinare faciam David germen justiti\u00e6,\n et faciet judicium et justitiam in terra:\n16\u00a0in diebus illis salvabitur Juda,\n et Jerusalem habitabit confidenter:\n et hoc est nomen quod vocabunt eum:\n Dominus justus noster.\n17\u00a0Quia h\u00e6c dicit Dominus:\n Non interibit de David vir qui sedeat super thronum domus Isra\u00ebl:\n18\u00a0et de sacerdotibus et de Levitis non interibit vir a facie mea,\n qui offerat holocautomata,\n et incendat sacrificum,\n et c\u00e6dat victimas omnibus diebus.]\n19 Et factum est verbum Domini ad Jeremiam, dicens:\n20\u00a0[H\u00e6c dicit Dominus:\n Si irritum potest fieri pactum meum cum die,\n et pactum meum cum nocte,\n ut non sit dies et nox in tempore suo,\n21\u00a0et pactum meum irritum esse poterit cum David servo meo,\n ut non sit ex eo filius qui regnet in throno ejus,\n et Levit\u00e6 et sacerdotes ministri mei.\n22\u00a0Sicuti enumerari non possunt stell\u00e6 c\u00e6li,\n et metiri arena maris,\n sic multiplicabo semen David servi mei,\n et Levitas ministros meos.]\n23 Et factum est verbum Domini ad Jeremiam, dicens:\n24\u00a0[Numquid non vidisti quid populus hic locutus sit, dicens:\n Du\u00e6 cognationes quas elegerat Dominus abject\u00e6 sunt?\n et populum meum despexerunt,\n eo quod non sit ultra gens coram eis.\n25\u00a0H\u00e6c dicit Dominus:\n Si pactum meum inter diem et noctem,\n et leges c\u00e6lo et terr\u00e6 non posui,\n26\u00a0equidem et semen Jacob et David servi mei projiciam,\n ut non assumam de semine ejus\n principes seminis Abraham, Isaac, et Jacob:\n reducam enim conversionem eorum, et miserebor eis.]","title":"Vulgate: Jeremiah: Jeremiah Chapter 33","type":"page"}