{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer034.htm","path":"bib/vul/jer034.htm","source_url":"https://sacred-texts.com/bib/vul/jer034.htm","text":"1 Verbum quod factum est ad Jeremiam a Domino quando Nabuchodonosor rex Babylonis, et omnis exercitus ejus, universaque regna terr\u00e6 qu\u00e6 erant sub potestate manus ejus, et omnes populi, bellabant contra Jerusalem, et contra omnes urbes ejus, dicens:\n2 H\u00e6c dicit Dominus Deus Isra\u00ebl: Vade, et loquere ad Sedeciam regem Juda, et dices ad eum: H\u00e6c dicit Dominus: Ecce ego tradam civitatem hanc in manus regis Babylonis, et succendet eam igni:\n3 et tu non effugies de manu ejus, sed comprehensione capieris, et in manu ejus traderis: et oculi tui oculos regis Babylonis videbunt, et os ejus cum ore tuo loquetur, et Babylonem introibis.\n4 Attamen audi verbum Domini, Sedecia, rex Juda: H\u00e6c dicit Dominus ad te: Non morieris in gladio,\n5 sed in pace morieris: et secundum combustiones patrum tuorum, regum priorum qui fuerunt ante te, sic comburent te: et: V\u00e6 domine, plangent te: quia verbum ego locutus sum, dicit Dominus.\n6 Et locutus est Jeremias propheta ad Sedeciam regem Juda universa verba h\u00e6c in Jerusalem.\n7\u00a0Et exercitus regis Babylonis pugnabat contra Jerusalem, et contra omnes civitates Juda qu\u00e6 reliqu\u00e6 erant, contra Lachis et contra Azecha: h\u00e6 enim supererant de civitatibus Juda, urbes munit\u00e6.\n \n8 Verbum quod factum est ad Jeremiam a Domino, postquam percussit rex Sedecias f\u0153dus cum omni populo in Jerusalem, pr\u00e6dicans\n9 ut dimitteret unusquisque servum suum et unusquisque ancillam suam, Hebr\u00e6um et Hebr\u00e6am, liberos, et nequaquam dominarentur eis, id est, in Jud\u00e6o et fratre suo.\n10 Audierunt ergo omnes principes et universus populus qui inierant pactum ut dimitteret unusquisque servum suum et unusquisque ancillam suam liberos, et ultra non dominarentur eis: audierunt igitur, et dimiserunt.\n11 Et conversi sunt deinceps: et retraxerunt servos et ancillas suas quos dimiserant liberos, et subjugaverunt in famulos et famulas.\n12 Et factum est verbum Domini ad Jeremiam a Domino, dicens:\n13 H\u00e6c dicit Dominus Deus Isra\u00ebl: Ego percussi f\u0153dus cum patribus vestris in die qua eduxi eos de terra \u00c6gypti, de domo servitutis, dicens:\n14 Cum completi fuerint septem anni, dimittat unusquisque fratrem suum Hebr\u00e6um, qui venditus est ei: et serviet tibi sex annis, et dimittes eum a te liberum: et non audierunt patres vestri me, nec inclinaverunt aurem suam.\n15 Et conversi estis vos hodie, et fecistis quod rectum est in oculis meis, ut pr\u00e6dicaretis libertatem unusquisque ad amicum suum: et inistis pactum in conspectu meo, in domo in qua invocatum est nomen meum super eam:\n16 et reversi estis, et commaculastis nomen meum, et reduxistis unusquisque servum suum et unusquisque ancillam suam quos dimiseratis ut essent liberi et su\u00e6 potestatis, et subjugastis eos ut sint vobis servi et ancill\u00e6.\n17 Propterea h\u00e6c dicit Dominus: Vos non audistis me, ut pr\u00e6dicaretis libertatem unusquisque fratri suo et unusquisque amico suo: ecce ego pr\u00e6dico vobis libertatem, ait Dominus, ad gladium, ad pestem, et ad famem, et dabo vos in commotionem cunctis regnis terr\u00e6.\n18 Et dabo viros qui pr\u00e6varicantur f\u0153dus meum, et non observaverunt verba f\u0153deris quibus assensi sunt in conspectu meo, vitulum quem conciderunt in duas partes, et transierunt inter divisiones ejus,\n19 principes Juda et principes Jerusalem, eunuchi et sacerdotes, et omnis populus terr\u00e6, qui transierunt inter divisiones vituli:\n20 et dabo eos in manus inimicorum suorum, et in manus qu\u00e6rentium animam eorum, et erit morticinum eorum in escam volatilibus c\u00e6li et bestiis terr\u00e6.\n21 Et Sedeciam regem Juda, et principes ejus, dabo in manus inimicorum suorum, et in manus qu\u00e6rentium animas eorum, et in manus exercituum regis Babylonis, qui recesserunt a vobis.\n22 Ecce ego pr\u00e6cipio, dicit Dominus, et reducam eos in civitatem hanc, et pr\u00e6liabuntur adversus eam, et capient eam, et incendent igni: et civitates Juda dabo in solitudinem, eo quod non sit habitator.","title":"Vulgate: Jeremiah: Jeremiah Chapter 34","type":"page"}