{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer035.htm","path":"bib/vul/jer035.htm","source_url":"https://sacred-texts.com/bib/vul/jer035.htm","text":"1 Verbum quod factum est ad Jeremiam a Domino in diebus Joakim filii Josi\u00e6 regis Juda, dicens:\n2 Vade ad domum Rechabitarum, et loquere eis, et introduces eos in domum Domini, in unam exedram thesaurorum, et dabis eis bibere vinum.\n3 Et assumpsi Jezoniam filium Jeremi\u00e6 filii Habsani\u00e6, et fratres ejus, et omnes filios ejus, et universam domum Rechabitarum,\n4 et introduxi eos in domum Domini, ad gazophylacium filiorum Hanan filii Jegedeli\u00e6 hominis Dei, quod erat juxta gazophylacium principum, super thesaurum Maasi\u00e6 filii Sellum, qui erat custos vestibuli:\n5 et posui coram filiis domus Rechabitarum scyphos plenos vino, et calices, et dixi ad eos: Bibite vinum.\n6 Qui responderunt Non bibemus vinum, quia Jonadab filius Rechab, pater noster, pr\u00e6cepit nobis, dicens: Non bibetis vinum, vos et filii vestri, usque in sempiternum:\n7 et domum non \u00e6dificabitis, et sementem non seretis, et vineas non plantabitis, nec habebitis: sed in tabernaculis habitabitis cunctis diebus vestris, ut vivatis diebus multis super faciem terr\u00e6 in qua vos peregrinamini.\n8 Obedivimus ergo voci Jonadab filii Rechab, patris nostri, in omnibus qu\u00e6 pr\u00e6cepit nobis, ita ut non biberemus vinum cunctis diebus nostris, nos, et mulieres nostr\u00e6, filii, et fili\u00e6 nostr\u00e6,\n9 et non \u00e6dificaremus domos ad habitandum: et vineam, et agrum, et sementem non habuimus:\n10 sed habitavimus in tabernaculis, et obedientes fuimus juxta omnia qu\u00e6 pr\u00e6cepit nobis Jonadab pater noster.\n11 Cum autem ascendisset Nabuchodonosor rex Babylonis ad terram nostram, diximus: Venite, et ingrediamur Jerusalem a facie exercitus Chald\u00e6orum, et a facie exercitus Syri\u00e6: et mansimus in Jerusalem.\n12 Et factum est verbum Domini ad Jeremiam, dicens:\n13 H\u00e6c dicit Dominus exercituum, Deus Isra\u00ebl: Vade, et dic viris Juda et habitatoribus Jerusalem: Numquid non recipietis disciplinam, ut obediatis verbis meis? dicit Dominus.\n14 Pr\u00e6valuerunt sermones Jonadab filii Rechab quos pr\u00e6cepit filiis suis ut non biberent vinum, et non biberunt usque ad diem hanc, quia obedierunt pr\u00e6cepto patris sui: ego autem locutus sum ad vos, de mane consurgens et loquens, et non obedistis mihi.\n15 Misique ad vos omnes servos meos prophetas, consurgens diluculo mittensque, et dicens: Convertimini unusquisque a via sua pessima, et bona facite studia vestra: et nolite sequi deos alienos, neque colatis eos, et habitabitis in terra quam dedi vobis et patribus vestris: et non inclinastis aurem vestram, neque audistis me.\n16 Firmaverunt igitur filii Jonadab filii Rechab pr\u00e6ceptum patris sui quod pr\u00e6ceperat eis: populus autem iste non obedivit mihi.\n17 Idcirco h\u00e6c dicit Dominus exercituum, Deus Isra\u00ebl: Ecce ego adducam super Judam et super omnes habitatores Jerusalem universam afflictionem quam locutus sum adversum illos, eo quod locutus sum ad illos, et non audierunt; vocavi illos, et non responderunt mihi.\n18 Domui autem Rechabitarum dixit Jeremias: H\u00e6c dicit Dominus exercituum, Deus Isra\u00ebl: Pro eo quod obedistis pr\u00e6cepto Jonadab patris vestri, et custodistis omnia mandata ejus, et fecistis universa qu\u00e6 pr\u00e6cepit vobis,\n19 propterea h\u00e6c dicit Dominus exercituum, Deus Isra\u00ebl: Non deficiet vir de stirpe Jonadab filii Rechab, stans in conspectu meo cunctis diebus.","title":"Vulgate: Jeremiah: Jeremiah Chapter 35","type":"page"}