{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer036.htm","path":"bib/vul/jer036.htm","source_url":"https://sacred-texts.com/bib/vul/jer036.htm","text":"1 Et factum est in anno quarto Joakim filii Josi\u00e6 regis Juda, factum est verbum hoc ad Jeremiam a Domino, dicens:\n2 Tolle volumen libri, et scribes in eo omnia verba qu\u00e6 locutus sum tibi adversum Isra\u00ebl et Judam, et adversum omnes gentes, a die qua locutus sum ad te ex diebus Josi\u00e6 usque ad diem hanc:\n3 si forte, audiente domo Juda universa mala qu\u00e6 ego cogito facere eis, revertatur unusquisque a via sua pessima, et propitius ero iniquitati et peccato eorum.\n4 Vocavit ergo Jeremias Baruch filium Neri\u00e6: et scripsit Baruch ex ore Jeremi\u00e6 omnes sermones Domini quos locutus est ad eum, in volumine libri:\n5 et pr\u00e6cepit Jeremias Baruch, dicens: Ego clausus sum, nec valeo ingredi domum Domini.\n6 Ingredere ergo tu, et lege de volumine in quo scripsisti ex ore meo verba Domini, audiente populo in domo Domini, in die jejunii: insuper et audiente universo Juda qui veniunt de civitatibus suis, leges eis,\n7 si forte cadat oratio eorum in conspectu Domini, et revertatur unusquisque a via sua pessima: quoniam magnus furor et indignatio est quam locutus est Dominus adversus populum hunc.\n8 Et fecit Baruch filius Neri\u00e6 juxta omnia qu\u00e6 pr\u00e6ceperat ei Jeremias propheta, legens ex volumine sermones Domini in domo Domini.\n9 Factum est autem in anno quinto Joakim filii Josi\u00e6 regis Juda, in mense nono: pr\u00e6dicaverunt jejunium in conspectu Domini omni populo in Jerusalem, et univers\u00e6 multitudini qu\u00e6 confluxerat de civitatibus Juda in Jerusalem.\n10 Legitque Baruch ex volumine sermones Jeremi\u00e6 in domo Domini, in gazophylacio Gamari\u00e6 filii Saphan scrib\u00e6, in vestibulo superiori, in introitu port\u00e6 nov\u00e6 domus Domini, audiente omni populo.\n11 Cumque audisset Mich\u00e6as filius Gamari\u00e6 filii Saphan omnes sermones Domini ex libro,\n12 descendit in domum regis, ad gazophylacium scrib\u00e6, et ecce ibi omnes principes sedebant: Elisama scriba, et Dalaias filius Semei\u00e6, et Elnathan filius Achobor, et Gamarias filius Saphan, et Sedecias filius Hanani\u00e6, et universi principes:\n13 et nuntiavit eis Mich\u00e6as omnia verba qu\u00e6 audivit, legente Baruch ex volumine in auribus populi.\n14 Miserunt itaque omnes principes ad Baruch Judi filium Nathani\u00e6 filii Selemi\u00e6 filii Chusi, dicentes: Volumen ex quo legisti, audiente populo, sume in manu tua, et veni. Tulit ergo Baruch filius Neri\u00e6 volumen in manu sua, et venit ad eos:\n15 et dixerunt ad eum: Sede, et lege h\u00e6c in auribus nostris. Et legit Baruch in auribus eorum.\n16 Igitur cum audissent omnia verba, obstupuerunt unusquisque ad proximum suum, et dixerunt ad Baruch: Nuntiare debemus regi omnes sermones istos.\n17 Et interrogaverunt eum, dicentes: Indica nobis quomodo scripsisti omnes sermones istos ex ore ejus.\n18 Dixit autem eis Baruch: Ex ore suo loquebatur quasi legens ad me omnes sermones istos, et ego scribebam in volumine atramento.\n19 Et dixerunt principes ad Baruch: Vade, et abscondere, tu et Jeremias, et nemo sciat ubi sitis.\n20 Et ingressi sunt ad regem in atrium: porro volumen commendaverunt in gazophylacio Elisam\u00e6 scrib\u00e6, et nuntiaverunt, audiente rege, omnes sermones.\n21 Misitque rex Judi ut sumeret volumen: qui tollens illud de gazophylacio Elisam\u00e6 scrib\u00e6, legit, audiente rege et universis principibus qui stabant circa regem.\n22 Rex autem sedebat in domo hiemali, in mense nono, et posita erat arula coram eo plena prunis.\n23 Cumque legisset Judi tres pagellas vel quatuor, scidit illud scalpello scrib\u00e6, et projecit in ignem qui erat super arulam, donec consumeretur omne volumen igni qui erat in arula.\n24 Et non timuerunt, neque sciderunt vestimenta sua, rex et omnes servi ejus qui audierunt universos sermones istos.\n25 Verumtamen Elnathan, et Dalaias, et Gamarias, contradixerunt regi, ne combureret librum: et non audivit eos.\n26\u00a0Et pr\u00e6cepit rex Jeremiel filio Amelech, et Sarai\u00e6 filio Ezriel, et Selemi\u00e6 filio Abdeel, ut comprehenderent Baruch scribam, et Jeremiam prophetam: abscondit autem eos Dominus.\n \n27 Et factum est verbum Domini ad Jeremiam prophetam, postquam combusserat rex volumen et sermones quos scripserat Baruch ex ore Jeremi\u00e6, dicens:\n28 Rursum tolle volumen aliud, et scribe in eo omnes sermones priores qui erant in primo volumine, quod combussit Joakim rex Juda.\n29 Et ad Joakim regem Juda dices: H\u00e6c dicit Dominus: Tu combussisti volumen illud, dicens: Quare scripsisti in eo annuntians: Festinus veniet rex Babylonis, et vastabit terram hanc, et cessare faciet ex illa hominem et jumentum?\n30 Propterea h\u00e6c dicit Dominus contra Joakim regem Juda: Non erit ex eo qui sedeat super solium David: et cadaver ejus projicietur ad \u00e6stum per diem, et ad gelu per noctem.\n31 Et visitabo contra eum, et contra semen ejus, et contra servos ejus, iniquitates suas: et adducam super eos, et super habitatores Jerusalem, et super viros Juda, omne malum quod locutus sum ad eos, et non audierunt.\n32 Jeremias autem tulit volumen aliud, et dedit illud Baruch filio Neri\u00e6 scrib\u00e6: qui scripsit in eo ex ore Jeremi\u00e6 omnes sermones libri quem combusserat Joakim rex Juda igni: et insuper additi sunt sermones multo plures quam antea fuerant.","title":"Vulgate: Jeremiah: Jeremiah Chapter 36","type":"page"}