{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer039.htm","path":"bib/vul/jer039.htm","source_url":"https://sacred-texts.com/bib/vul/jer039.htm","text":"1 Anno nono Sedeci\u00e6 regis Juda, mense decimo, venit Nabuchodonosor rex Babylonis, et omnis exercitus ejus, ad Jerusalem, et obsidebant eam.\n2 Undecimo autem anno Sedeci\u00e6, mense quarto, quinta mensis, aperta est civitas:\n3 et ingressi sunt omnes principes regis Babylonis, et sederunt in porta media: Neregel, Sereser, Semegarnabu, Sarsachim, Rabsares, Neregel, Sereser, Rebmag, et omnes reliqui principes regis Babylonis.\n4 Cumque vidisset eos Sedecias rex Juda, et omnes viri bellatores, fugerunt: et egressi sunt nocte de civitate per viam horti regis, et per portam qu\u00e6 erat inter duos muros, et egressi sunt ad viam deserti.\n5 Persecutus est autem eos exercitus Chald\u00e6orum, et comprehenderunt Sedeciam in campo solitudinis Jerichontin\u00e6, et captum adduxerunt ad Nabuchodonosor regem Babylonis, in Reblatha, qu\u00e6 est in terra Emath: et locutus est ad eum judicia.\n6 Et occidit rex Babylonis filios Sedeci\u00e6 in Reblatha, in oculis ejus: et omnes nobiles Juda occidit rex Babylonis.\n7 Oculos quoque Sedeci\u00e6 eruit, et vinxit eum compedibus ut duceretur in Babylonem.\n8 Domum quoque regis et domum vulgi succenderunt Chald\u00e6i igni, et murum Jerusalem subverterunt.\n9 Et reliquias populi qui remanserant in civitate, et perfugas qui transfugerant ad eum, et superfluos vulgi qui remanserant, transtulit Nabuzardan, magister militum, in Babylonem.\n10 Et de plebe pauperum, qui nihil penitus habebant, dimisit Nabuzardan magister militum in terra Juda, et dedit eis vineas et cisternas in die illa.\n11 Pr\u00e6ceperat autem Nabuchodonosor rex Babylonis de Jeremia Nabuzardan magistro militum, dicens:\n12 Tolle illum, et pone super eum oculos tuos, nihilque ei mali facias: sed ut voluerit, sic facias ei.\n13 Misit ergo Nabuzardan princeps militi\u00e6, et Nabusezban, et Rabsares, et Neregel, et Sereser, et Rebmag, et omnes optimates regis Babylonis,\n14 miserunt, et tulerunt Jeremiam de vestibulo carceris, et tradiderunt eum Godoli\u00e6 filio Ahicam filii Saphan, ut intraret in domum, et habitaret in populo.\n15 Ad Jeremiam autem factus fuerat sermo Domini, cum clausus esset in vestibulo carceris, dicens:\n16 Vade, et dic Abdemelech \u00c6thiopi, dicens: H\u00e6c dicit Dominus exercituum, Deus Isra\u00ebl: Ecce ego inducam sermones meos super civitatem hanc in malum, et non in bonum, et erunt in conspectu tuo in die illa.\n17 Et liberabo te in die illa, ait Dominus, et non traderis in manus virorum quos tu formidas:\n18 sed eruens liberabo te, et gladio non cades, sed erit tibi anima tua in salutem, quia in me habuisti fiduciam, ait Dominus.","title":"Vulgate: Jeremiah: Jeremiah Chapter 39","type":"page"}