{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer044.htm","path":"bib/vul/jer044.htm","source_url":"https://sacred-texts.com/bib/vul/jer044.htm","text":"1 Verbum quod factum est per Jeremiam ad omnes Jud\u00e6os qui habitabant in terra \u00c6gypti, habitantes in Magdalo, et in Taphnis, et in Memphis, et in terra Phatures, dicens:\n2 H\u00e6c dicit Dominus exercituum, Deus Isra\u00ebl: Vos vidistis omne malum istud quod adduxi super Jerusalem, et super omnes urbes Juda: et ecce desert\u00e6 sunt hodie, et non est in eis habitator,\n3 propter malitiam quam fecerunt ut me ad iracundiam provocarent, et irent ut sacrificarent, et colerent deos alienos quos nesciebant, et illi, et vos, et patres vestri.\n4 Et misi ad vos omnes servos meos prophetas, de nocte consurgens, mittensque et dicens: Nolite facere verbum abominationis hujuscemodi, quam odivi.\n5 Et non audierunt, nec inclinaverunt aurem suam, ut converterentur a malis suis, et non sacrificarent diis alienis.\n6 Et conflata est indignatio mea et furor meus, et succensa est in civitatibus Juda, et in plateis Jerusalem: et vers\u00e6 sunt in solitudinem et vastitatem secundum diem hanc.\n7 Et nunc h\u00e6c dicit Dominus exercituum, Deus Isra\u00ebl: Quare vos facitis malum grande hoc contra animas vestras, ut intereat ex vobis vir et mulier, parvulus et lactens, de medio Jud\u00e6, nec relinquatur vobis quidquam residuum:\n8 provocantes me in operibus manuum vestrarum, sacrificando diis alienis in terra \u00c6gypti, in quam ingressi estis ut habitetis ibi: et dispereatis, et sitis in maledictionem et in opprobrium cunctis gentibus terr\u00e6?\n9 Numquid obliti estis mala patrum vestrorum, et mala regum Juda, et mala uxorum ejus, et mala vestra, et mala uxorum vestrarum, qu\u00e6 fecerunt in terra Juda, et in regionibus Jerusalem?\n10 Non sunt mundati usque ad diem hanc: et non timuerunt, et non ambulaverunt in lege Domini, et in pr\u00e6ceptis meis qu\u00e6 dedi coram vobis et coram patribus vestris.\n11 Ideo h\u00e6c dicit Dominus exercituum, Deus Isra\u00ebl: Ecce ego ponam faciem meam in vobis in malum: et disperdam omnem Judam.\n12 Et assumam reliquias Jud\u00e6, qui posuerunt facies suas ut ingrederentur terram \u00c6gypti, et habitarent ibi, et consumentur omnes in terra \u00c6gypti: cadent in gladio, et in fame, et consumentur a minimo usque ad maximum: in gladio et in fame morientur, et erunt in jusjurandum, et in miraculum, et in maledictionem, et in opprobrium.\n13 Et visitabo super habitatores terr\u00e6 \u00c6gypti sicut visitavi super Jerusalem, in gladio, et fame, et peste:\n14\u00a0et non erit qui effugiat, et sit residuus de reliquiis Jud\u00e6orum qui vadunt ut peregrinentur in terra \u00c6gypti, et revertantur in terram Juda, ad quam ipsi elevant animas suas ut revertantur, et habitent ibi: non revertentur, nisi qui fugerint.\n \n15 Responderunt autem Jeremi\u00e6 omnes viri scientes quod sacrificarent uxores eorum diis alienis, et univers\u00e6 mulieres quarum stabat multitudo grandis, et omnis populus habitantium in terra \u00c6gypti in Phatures, dicentes:\n16 Sermonem quem locutus es ad nos in nomine Domini, non audiemus ex te:\n17 sed facientes faciemus omne verbum quod egredietur de ore nostro, ut sacrificemus regin\u00e6 c\u00e6li, et libemus ei libamina, sicut fecimus nos et patres nostri, reges nostri et principes nostri, in urbibus Juda, et in plateis Jerusalem: et saturati sumus panibus, et bene nobis erat, malumque non vidimus.\n18 Ex eo autem tempore quo cessavimus sacrificare regin\u00e6 c\u00e6li, et libare ei libamina, indigemus omnibus, et gladio et fame consumpti sumus.\n19\u00a0Quod si nos sacrificamus regin\u00e6 c\u00e6li, et libamus ei libamina, numquid sine viris nostris fecimus ei placentas ad colendum eam, et libandum ei libamina?\n \n20 Et dixit Jeremias ad omnem populum, adversum viros, et adversum mulieres, et adversum universam plebem, qui responderant ei verbum, dicens:\n21 Numquid non sacrificium quod sacrificastis in civitatibus Juda, et in plateis Jerusalem, vos et patres vestri, reges vestri, et principes vestri, et populus terr\u00e6, horum recordatus est Dominus, et ascendit super cor ejus?\n22 Et non poterat Dominus ultra portare propter malitiam studiorum vestrorum, et propter abominationes quas fecistis: et facta est terra vestra in desolationem, et in stuporem, et in maledictum, eo quod non sit habitator, sicut est dies h\u00e6c.\n23 Propterea quod sacrificaveritis idolis, et peccaveritis Domino, et non audieritis vocem Domini, et in lege, et in pr\u00e6ceptis, et in testimoniis ejus non ambulaveritis, idcirco evenerunt vobis mala h\u00e6c, sicut est dies h\u00e6c.\n24 Dixit autem Jeremias ad omnem populum, et ad universas mulieres: Audite verbum Domini, omnis Juda qui estis in terra \u00c6gypti.\n25 H\u00e6c inquit Dominus exercituum, Deus Isra\u00ebl, dicens: Vos et uxores vestr\u00e6 locuti estis ore vestro, et manibus vestris implestis, dicentes: Faciamus vota nostra qu\u00e6 vovimus, ut sacrificemus regin\u00e6 c\u00e6li, et libemus ei libamina. Implestis vota vestra, et opere perpetrastis ea.\n26 Ideo audite verbum Domini, omnis Juda qui habitatis in terra \u00c6gypti: Ecce ego juravi in nomine meo magno, ait Dominus, quia nequaquam ultra vocabitur nomen meum ex ore omnis viri Jud\u00e6i, dicentis: Vivit Dominus Deus, in omni terra \u00c6gypti.\n27 Ecce ego vigilabo super eos in malum, et non in bonum: et consumentur omnes viri Juda qui sunt in terra \u00c6gypti gladio et fame, donec penitus consumantur.\n28 Et qui fugerint gladium, revertentur de terra \u00c6gypti in terram Juda viri pauci: et scient omnes reliqui\u00e6 Juda, ingredientium terram \u00c6gypti ut habitent ibi, cujus sermo compleatur, meus an illorum.\n29 Et hoc vobis signum, ait Dominus, quod visitem ego super vos in loco isto, ut sciatis quia vere complebuntur sermones mei contra vos in malum:\n30 h\u00e6c dicit Dominus: Ecce ego tradam Pharaonem Ephree regem \u00c6gypti in manu inimicorum ejus, et in manu qu\u00e6rentium animam illius, sicut tradidi Sedeciam regem Juda in manu Nabuchodonosor regis Babylonis inimici sui, et qu\u00e6rentis animam ejus.","title":"Vulgate: Jeremiah: Jeremiah Chapter 44","type":"page"}