{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer045.htm","path":"bib/vul/jer045.htm","source_url":"https://sacred-texts.com/bib/vul/jer045.htm","text":"1 Verbum quod locutus est Jeremias propheta ad Baruch filium Neri\u00e6, cum scripsisset verba h\u00e6c in libro ex ore Jeremi\u00e6, anno quarto Joakim filii Josi\u00e6 regis Juda, dicens:\n2 H\u00e6c dicit Dominus Deus Isra\u00ebl ad te, Baruch:\n3 Dixisti: V\u00e6 misero mihi! quoniam addidit Dominus dolorem dolori meo: laboravi in gemitu meo, et requiem non inveni.\n4 H\u00e6c dicit Dominus: Sic dices ad eum: Ecce quos \u00e6dificavi, ego destruo, et quos plantavi, ego evello, et universam terram hanc:\n5 et tu qu\u00e6ris tibi grandia? noli qu\u00e6rere, quia ecce ego adducam malum super omnem carnem, ait Dominus, et dabo tibi animam tuam in salutem in omnibus locis ad qu\u00e6cumque perrexeris.","title":"Vulgate: Jeremiah: Jeremiah Chapter 45","type":"page"}