{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer047.htm","path":"bib/vul/jer047.htm","source_url":"https://sacred-texts.com/bib/vul/jer047.htm","text":"1 Quod factum est verbum Domini ad Jeremiam prophetam contra Pal\u00e6stinos, antequam percuteret Pharao Gazam.\n2\u00a0[H\u00e6c dicit Dominus:\n Ecce aqu\u00e6 ascendunt ab aquilone,\n et erunt quasi torrens inundans,\n et operient terram et plenitudinem ejus,\n urbem et habitatores ejus.\n Clamabunt homines,\n et ululabunt omnes habitatores terr\u00e6,\n3\u00a0a strepitu pomp\u00e6 armorum, et bellatorum ejus,\n a commotione quadrigarum ejus, et multitudine rotarum illius.\n Non respexerunt patres filios manibus dissolutis,\n4\u00a0pro adventu diei in quo vastabuntur omnes Philisthiim,\n et dissipabitur Tyrus et Sidon\n cum omnibus reliquis auxiliis suis:\n depopulatus est enim Dominus Pal\u00e6stinos,\n reliquias insul\u00e6 Cappadoci\u00e6.\n5\u00a0Venit calvitium super Gazam;\n conticuit Ascalon, et reliqui\u00e6 vallis earum:\n usquequo concideris?\n6\u00a0O mucro Domini, usquequo non quiesces?\n ingredere in vaginam tuam,\n refrigerare, et sile.\n7\u00a0Quomodo quiescet,\n cum Dominus pr\u00e6ceperit ei adversus Ascalonem,\n et adversus maritimas ejus regiones,\n ibique condixerit illi?]","title":"Vulgate: Jeremiah: Jeremiah Chapter 47","type":"page"}