{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer049.htm","path":"bib/vul/jer049.htm","source_url":"https://sacred-texts.com/bib/vul/jer049.htm","text":"1\u00a0Ad filios Ammon. [H\u00e6c dicit Dominus:\n Numquid non filii sunt Isra\u00ebl,\n aut h\u00e6res non est ei?\n cur igitur h\u00e6reditate possedit Melchom Gad,\n et populus ejus in urbibus ejus habitavit?\n2\u00a0Ideo dies veniunt, dicit Dominus,\n et auditum faciam super Rabbath filiorum Ammon fremitum pr\u00e6lii,\n et erit in tumultum dissipata,\n fili\u00e6que ejus igni succendentur,\n et possidebit Isra\u00ebl possessores suos, ait Dominus.\n3\u00a0Ulula, Hesebon, quoniam vastata est Hai;\n clamate, fili\u00e6 Rabbath:\n accingite vos ciliciis,\n plangite et circuite per sepes,\n quoniam Melchom in transmigrationem ducetur,\n sacerdotes ejus et principes ejus simul.\n4\u00a0Quid gloriaris in vallibus?\n defluxit vallis tua, filia delicata,\n qu\u00e6 confidebas in thesauris tuis,\n et dicebas: Quis veniet ad me?\n5\u00a0Ecce ego inducam super te terrorem,\n ait Dominus Deus exercituum,\n ab omnibus qui sunt in circuitu tuo:\n et dispergemini singuli a conspectu vestro,\n nec erit qui congreget fugientes.\n6\u00a0Et post h\u00e6c reverti faciam\n captivos filiorum Ammon, ait Dominus.]\n \n7\u00a0Ad Idum\u00e6am. [H\u00e6c dicit Dominus exercituum:\n Numquid non ultra est sapientia in Theman?\n periit consilium a filiis;\n inutilis facta est sapientia eorum.\n8\u00a0Fugite, et terga vertite;\n descendite in voraginem, habitatores Dedan:\n quoniam perditionem Esau adduxi super eum,\n tempus visitationis ejus.\n9\u00a0Si vindemiatores venissent super te,\n non reliquissent racemum:\n si fures in nocte rapuissent quod sufficeret sibi.\n10\u00a0Ego vero discooperui Esau:\n revelavi abscondita ejus,\n et celari non poterit:\n vastatum est semen ejus,\n et fratres ejus, et vicini ejus, et non erit.\n11\u00a0Relinque pupillos tuos: ego faciam eos vivere:\n et vidu\u00e6 tu\u00e6 in me sperabunt.\n12\u00a0Quia h\u00e6c dicit Dominus:\n Ecce quibus non erat judicium ut biberent calicem,\n bibentes bibent:\n et tu, quasi innocens relinqueris?\n non eris innocens, sed bibens bibes.\n13\u00a0Quia per memetipsum juravi, dicit Dominus,\n quod in solitudinem, et in opprobrium,\n et in desertum, et in maledictionem erit Bosra,\n et omnes civitates ejus erunt in solitudines sempiternas.\n14\u00a0Auditum audivi a Domino,\n et legatus ad gentes missus est:\n Congregamini, et venite contra eam,\n et consurgamus in pr\u00e6lium.\n15\u00a0Ecce enim parvulum dedi te in gentibus,\n contemptibilem inter homines.\n16\u00a0Arrogantia tua decepit te,\n et superbia cordis tui,\n qui habitas in cavernis petr\u00e6,\n et apprehendere niteris altitudinem collis:\n cum exaltaveris quasi aquila nidum tuum,\n inde detraham te, dicit Dominus.\n17\u00a0Et erit Idum\u00e6a deserta:\n omnis qui transibit per eam stupebit,\n et sibilabit super omnes plagas ejus.\n18\u00a0Sicut subversa est Sodoma et Gomorrha,\n et vicin\u00e6 ejus, ait Dominus:\n non habitabit ibi vir,\n et non incolet eam filius hominis.\n19\u00a0Ecce quasi leo ascendet\n de superbia Jordanis ad pulchritudinem robustam,\n quia subito currere faciam eum ad illam.\n Et quis erit electus, quem pr\u00e6ponam ei?\n quis enim similis mei?\n et quis sustinebit me?\n et quis est iste pastor, qui resistat vultui meo?\n20\u00a0Propterea audite consilium Domini quod iniit de Edom,\n et cogitationes ejus quas cogitavit de habitatoribus Theman:\n si non dejecerint eos parvuli gregis,\n nisi dissipaverint cum eis habitaculum eorum.\n21\u00a0A voce ruin\u00e6 eorum commota est terra;\n clamor in mari Rubro auditus est vocis ejus.\n22\u00a0Ecce quasi aquila ascendet,\n et avolabit, et expandet alas suas super Bosran:\n et erit cor fortium Idum\u00e6\u00e6 in die illa\n quasi cor mulieris parturientis.]\n \n23\u00a0Ad Damascum. [Confusa est Emath et Arphad,\n quia auditum pessimum audierunt:\n turbati sunt in mari;\n pr\u00e6 sollicitudine quiescere non potuit.\n24\u00a0Dissoluta est Damascus,\n versa est in fugam:\n tremor apprehendit eam,\n angustia et dolores tenuerunt eam quasi parturientem.\n25\u00a0Quomodo dereliquerunt civitatem laudabilem,\n urbem l\u00e6titi\u00e6?\n26\u00a0Ideo cadent juvenes ejus in plateis ejus,\n et omnes viri pr\u00e6lii conticescent in die illa,\n ait Dominus exercituum.\n27\u00a0Et succendam ignem in muro Damasci,\n et devorabit m\u0153nia Benadad.]\n \n28\u00a0Ad Cedar, et ad regna Asor, qu\u00e6 percussit Nabuchodonosor rex Babylonis. [H\u00e6c dicit Dominus:\n Surgite, et ascendite ad Cedar,\n et vastate filios orientis.\n29\u00a0Tabernacula eorum, et greges eorum capient:\n pelles eorum, et omnia vasa eorum,\n et camelos eorum tollent sibi,\n et vocabunt super eos formidinem in circuitu.\n30\u00a0Fugite, abite vehementer, in voraginibus sedete,\n qui habitatis Asor, ait Dominus:\n iniit enim contra vos Nabuchodonosor rex Babylonis consilium,\n et cogitavit adversum vos cogitationes.\n31\u00a0Consurgite, et ascendite ad gentem quietam,\n et habitantem confidenter, ait Dominus:\n non ostia, nec vectes eis: soli habitant.\n32\u00a0Et erunt cameli eorum in direptionem,\n et multitudo jumentorum in pr\u00e6dam:\n et dispergam eos in omnem ventum,\n qui sunt attonsi in comam,\n et ex omni confinio eorum adducam interitum super eos, ait Dominus.\n33\u00a0Et erit Asor in habitaculum draconum,\n deserta usque in \u00e6ternum:\n non manebit ibi vir,\n nec incolet eam filius hominis.]\n \n34 Quod facum est verbum Domini ad Jeremiam prophetam adversus \u00c6lam, in principio regni Sedeci\u00e6 regis Juda, dicens:\n35\u00a0[H\u00e6c dicit Dominus exercituum:\n Ecce ego confringam arcum \u00c6lam,\n et summam fortitudinem eorum:\n36\u00a0et inducam super \u00c6lam quatuor ventos a quatuor plagis c\u00e6li,\n et ventilabo eos in omnes ventos istos,\n et non erit gens ad quam non perveniant profugi \u00c6lam.\n37\u00a0Et pavere faciam \u00c6lam coram inimicis suis,\n et in conspectu qu\u00e6rentium animam eorum:\n et adducam super eos malum,\n iram furoris mei, dicit Dominus,\n et mittam post eos gladium donec consumam eos.\n38\u00a0Et ponam solium meum in \u00c6lam,\n et perdam inde reges et principes, ait Dominus.\n39\u00a0In novissimis autem diebus\n reverti faciam captivos \u00c6lam, dicit Dominus.]","title":"Vulgate: Jeremiah: Jeremiah Chapter 49","type":"page"}