{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer050.htm","path":"bib/vul/jer050.htm","source_url":"https://sacred-texts.com/bib/vul/jer050.htm","text":"1 Verbum quod locutus est Dominus de Babylone et de terra Chald\u00e6orum, in manu Jeremi\u00e6 prophet\u00e6.\n2\u00a0[Annuntiate in gentibus, et auditum facite:\n levate signum, pr\u00e6dicate, et nolite celare:\n dicite: Capta est Babylon,\n confusus est Bel, victus est Merodach,\n confusa sunt sculptilia ejus,\n superata sunt idola eorum.\n3\u00a0Quoniam ascendit contra eam gens ab aquilone,\n qu\u00e6 ponet terram ejus in solitudinem,\n et non erit qui habitet in ea ab homine usque ad pecus:\n et moti sunt, et abierunt.\n4\u00a0In diebus illis, et in tempore illo, ait Dominus,\n venient filii Isra\u00ebl ipsi et filii Juda simul:\n ambulantes et flentes properabunt,\n et Dominum Deum suum qu\u00e6rent:\n5\u00a0in Sion interrogabunt viam, huc facies eorum:\n venient, et apponentur ad Dominum f\u0153dere sempiterno,\n quod nulla oblivione delebitur.\n6\u00a0Grex perditus factus est populus meus:\n pastores eorum seduxerunt eos,\n feceruntque vagari in montibus:\n de monte in collem transierunt;\n obliti sunt cubilis sui.\n7\u00a0Omnes qui invenerunt comederunt eos,\n et hostes eorum dixerunt: Non peccavimus:\n pro eo quod peccaverunt Domino decori justiti\u00e6,\n et exspectationi patrum eorum Domino.\n8\u00a0Recedite de medio Babylonis,\n et de terra Chald\u00e6orum egredimini,\n et estote quasi h\u00e6di ante gregem.\n9\u00a0Quoniam ecce ego suscito,\n et adducam in Babylonem\n congregationem gentium magnarum de terra aquilonis,\n et pr\u00e6parabuntur adversus eam, et inde capietur:\n sagitta ejus quasi viri fortis interfectoris:\n non revertetur vacua.\n10\u00a0Et erit Chald\u00e6a in pr\u00e6dam:\n omnes vastantes eam replebuntur, ait Dominus.\n11\u00a0Quoniam exsultatis, et magna loquimini,\n diripientes h\u00e6reditatem meam:\n quoniam effusi estis sicut vituli super herbam,\n et mugistis sicut tauri:\n12\u00a0confusa est mater vestra nimis,\n et ad\u00e6quata pulveri, qu\u00e6 genuit vos:\n ecce novissima erit in gentibus,\n deserta, invia, et arens.\n13\u00a0Ab ira Domini non habitabitur,\n sed redigetur tota in solitudinem:\n omnis qui transibit per Babylonem stupebit,\n et sibilabit super universis plagis ejus.\n14\u00a0Pr\u00e6paramini contra Babylonem per circuitum,\n omnes qui tenditis arcum:\n debellate eam, non parcatis jaculis,\n quia Domino peccavit.\n15\u00a0Clamate adversus eam,\n ubique dedit manum:\n ceciderunt fundamenta ejus,\n destructi sunt muri ejus,\n quoniam ultio Domini est:\n ultionem accipite de ea:\n sicut fecit, facite ei.\n16\u00a0Disperdite satorem de Babylone,\n et tenentem falcem in tempore messis:\n a facie gladii columb\u00e6\n unusquisque ad populum suum convertetur,\n et singuli ad terram suam fugient.\n17\u00a0Grex dispersus Isra\u00ebl:\n leones ejecerunt eum.\n Primus comedit eum rex Assur:\n iste novissimus exossavit eum\n Nabuchodonosor rex Babylonis.\n18\u00a0Propterea h\u00e6c dicit Dominus exercituum, Deus Isra\u00ebl:\n Ecce ego visitabo regem Babylonis et terram ejus,\n sicut visitavi regem Assur:\n19\u00a0et reducam Isra\u00ebl ad habitaculum suum:\n et pascetur Carmelum et Basan,\n et in monte Ephraim et Galaad saturabitur anima ejus.\n20\u00a0In diebus illis, et in tempore illo, ait Dominus,\n qu\u00e6retur iniquitas Isra\u00ebl, et non erit,\n et peccatum Juda, et non invenietur:\n quoniam propitius ero eis quos reliquero.\n21\u00a0Super terram dominantium ascende,\n et super habitatores ejus visita:\n dissipa, et interfice qu\u00e6 post eos sunt, ait Dominus,\n et fac juxta omnia qu\u00e6 pr\u00e6cepi tibi.\n22\u00a0Vox belli in terra, et contritio magna.\n23\u00a0Quomodo confractus est et contritus malleus univers\u00e6 terr\u00e6?\n quomodo versa est in desertum Babylon in gentibus?\n24\u00a0Illaqueavi te, et capta es, Babylon,\n et nesciebas:\n inventa es et apprehensa,\n quoniam Dominum provocasti.\n25\u00a0Aperuit Dominus thesaurum suum,\n et protulit vasa ir\u00e6 su\u00e6,\n quoniam opus est Domino Deo exercituum,\n in terra Chald\u00e6orum.\n26\u00a0Venite ad eam ab extremis finibus;\n aperite ut exeant qui conculcent eam:\n tollite de via lapides, et redigite in acervos:\n et interficite eam, nec sit quidquam reliquum.\n27\u00a0Dissipate universos fortes ejus:\n descendant in occisionem:\n v\u00e6 eis, quia venit dies eorum,\n tempus visitationis eorum!\n28\u00a0Vox fugientium,\n et eorum qui evaserunt de terra Babylonis,\n ut annuntient in Sion ultionem Domini Dei nostri,\n ultionem templi ejus.\n29\u00a0Annuntiate in Babylonem plurimis,\n omnibus qui tendunt arcum:\n consistite adversus eam per gyrum,\n et nullus evadat:\n reddite ei secundum opus suum:\n juxta omnia qu\u00e6 fecit, facite illi,\n quia contra Dominum erecta est,\n adversum Sanctum Isra\u00ebl.\n30\u00a0Idcirco cadent juvenes ejus in plateis ejus,\n et omnes viri bellatores ejus conticescent in die illa,\n ait Dominus.\n31\u00a0Ecce ego ad te, superbe!\n dicit Dominus Deus exercituum:\n quia venit dies tuus,\n tempus visitationis tu\u00e6.\n32\u00a0Et cadet superbus, et corruet,\n et non erit qui suscitet eum:\n et succendam ignem in urbibus ejus,\n et devorabit omnia in circuitu ejus.\n33\u00a0H\u00e6c dicit Dominus exercituum:\n Calumniam sustinent filii Isra\u00ebl,\n et filii Juda simul:\n omnes qui ceperunt eos, tenent:\n nolunt dimittere eos.\n34\u00a0Redemptor eorum fortis,\n Dominus exercituum nomen ejus:\n judicio defendet causam eorum,\n ut exterreat terram,\n et commoveat habitatores Babylonis.\n35\u00a0Gladius ad Chald\u00e6os, ait Dominus,\n et ad habitatores Babylonis,\n et ad principes, et ad sapientes ejus.\n36\u00a0Gladius ad divinos ejus, qui stulti erunt:\n gladius ad fortes illius, qui timebunt.\n37\u00a0Gladius ad equos ejus, et ad currus ejus,\n et ad omne vulgus quod est in medio ejus:\n et erunt quasi mulieres:\n gladius ad thesauros ejus, qui diripientur.\n38\u00a0Siccitas super aquas ejus erit, et arescent,\n quia terra sculptilium est, et in portentis gloriantur.\n39\u00a0Propterea habitabunt dracones cum faunis ficariis,\n et habitabunt in ea struthiones:\n et non inhabitabitur ultra usque in sempiternum,\n nec exstruetur usque ad generationem et generationem.\n40\u00a0Sicut subvertit Dominus Sodomam et Gomorrham,\n et vicinas ejus, ait Dominus,\n non habitabit ibi vir,\n et non incolet eam filius hominis.\n41\u00a0Ecce populus venit ab aquilone,\n et gens magna, et reges multi\n consurgent a finibus terr\u00e6.\n42\u00a0Arcum et scutum apprehendent:\n crudeles sunt, et immisericordes:\n vox eorum quasi mare sonabit,\n et super equos ascendent,\n sicut vir paratus ad pr\u00e6lium contra te, filia Babylon.\n43\u00a0Audivit rex Babylonis famam eorum,\n et dissolut\u00e6 sunt manus ejus:\n angustia apprehendit eum,\n dolor quasi parturientem.\n44\u00a0Ecce quasi leo ascendet,\n de superbia Jordanis ad pulchritudinem robustam,\n quia subito currere faciam eum ad illam.\n Et quis erit electus, quem pr\u00e6ponam ei?\n quis est enim similis mei?\n et quis sustinebit me?\n et quis est iste pastor, qui resistat vultui meo?\n45\u00a0Propterea audite consilium Domini\n quod mente concepit adversum Babylonem,\n et cogitationes ejus\n quas cogitavit super terram Chald\u00e6orum:\n nisi detraxerint eos parvuli gregum,\n nisi dissipatum fuerit cum ipsis habitaculum eorum.\n46\u00a0A voce captivitatis Babylonis commota est terra,\n et clamor inter gentes auditus est.]","title":"Vulgate: Jeremiah: Jeremiah Chapter 50","type":"page"}