{"collection":"Bible & Christianity","html_url":"https://unchartedknowledge.5gfusion.net/browse/bib/vul/jer051.htm","path":"bib/vul/jer051.htm","source_url":"https://sacred-texts.com/bib/vul/jer051.htm","text":"1\u00a0[H\u00e6c dicit Dominus:\n Ecce ego suscitabo super Babylonem et super habitatores ejus,\n qui cor suum levaverunt contra me,\n quasi ventum pestilentem:\n2\u00a0et mittam in Babylonem ventilatores,\n et ventilabunt eam et demolientur terram ejus,\n quoniam venerunt super eam undique in die afflictionis ejus.\n3\u00a0Non tendat qui tendit arcum suum,\n et non ascendat loricatus:\n nolite parcere juvenibus ejus;\n interficite omnem militiam ejus.\n4\u00a0Et cadent interfecti in terra Chald\u00e6orum,\n et vulnerati in regionibus ejus.\n5\u00a0Quoniam non fuit viduatus Isra\u00ebl et Juda\n a Deo suo, Domino exercituum,\n terra autem eorum repleta est delicto\n a Sancto Isra\u00ebl.\n6\u00a0Fugite de medio Babylonis,\n et salvet unusquisque animam suam:\n nolite tacere super iniquitatem ejus,\n quoniam tempus ultionis est a Domino:\n vicissitudinem ipse retribuet ei.\n7\u00a0Calix aureus Babylon in manu Domini,\n inebrians omnem terram:\n de vino ejus biberunt gentes,\n et ideo commot\u00e6 sunt.\n8\u00a0Subito cecidit Babylon, et contrita est.\n Ululate super eam:\n tollite resinam ad dolorem ejus,\n si forte sanetur.\n9\u00a0Curavimus Babylonem, et non est sanata:\n derelinquamus eam, et eamus unusquisque in terram suam:\n quoniam pervenit usque ad c\u00e6los judicium ejus,\n et elevatum est usque ad nubes.\n10\u00a0Protulit Dominus justitias nostras:\n venite, et narremus in Sion opus Domini Dei nostri.\n11\u00a0Acuite sagittas, implete pharetras:\n suscitavit Dominus spiritum regum Medorum:\n et contra Babylonem mens ejus est ut perdat eam,\n quoniam ultio Domini est,\n ultio templi sui.\n12\u00a0Super muros Babylonis levate signum,\n augete custodiam, levate custodes,\n pr\u00e6parate insidias:\n quia cogitavit Dominus,\n et fecit qu\u00e6cumque locutus est contra habitatores Babylonis.\n13\u00a0Qu\u00e6 habitas super aquas multas,\n locuples in thesauris:\n venit finis tuus, pedalis pr\u00e6cisionis tu\u00e6.\n14\u00a0Juravit Dominus exercituum per animam suam:\n Quoniam replebo te hominibus quasi brucho,\n et super te celeuma cantabitur.\n15\u00a0Qui fecit terram in fortitudine sua,\n pr\u00e6paravit orbem in sapientia sua,\n et prudentia sua extendit c\u00e6los.\n16\u00a0Dante eo vocem, multiplicantur aqu\u00e6 in c\u00e6lo:\n qui levat nubes ab extremo terr\u00e6,\n fulgura in pluviam fecit,\n et produxit ventum de thesauris suis.\n17\u00a0Stultus factus est omnis homo a scientia;\n confusus est omnis conflator in sculptili:\n quia mendax est conflatio eorum,\n nec est spiritus in eis.\n18\u00a0Vana sunt opera, et risu digna:\n in tempore visitationis su\u00e6 peribunt.\n19\u00a0Non sicut h\u00e6c, pars Jacob,\n quia qui fecit omnia ipse est:\n et Isra\u00ebl sceptrum h\u00e6reditatis ejus:\n Dominus exercituum nomen ejus.\n20\u00a0Collidis tu mihi vasa belli:\n et ego collidam in te gentes,\n et disperdam in te regna:\n21\u00a0et collidam in te equum et equitem ejus:\n et collidam in te currum et ascensorem ejus:\n22\u00a0et collidam in te virum et mulierem:\n et collidam in te senem et puerum:\n et collidam in te juvenem et virginem:\n23\u00a0et collidam in te pastorem et gregem ejus:\n et collidam in te agricolam et jugales ejus:\n et collidam in te duces et magistratus:\n24\u00a0et reddam Babyloni, et cunctis habitatoribus Chald\u00e6\u00e6,\n omne malum suum quod fecerunt in Sion,\n in oculis vestris, ait Dominus.\n25\u00a0Ecce ego ad te, mons pestifer, ait Dominus,\n qui corrumpis universam terram:\n et extendam manum meam super te,\n et evolvam te de petris,\n et dabo te in montem combustionis:\n26\u00a0et non tollent de te lapidem in angulum,\n et lapidem in fundamenta:\n sed perditus in \u00e6ternum eris, ait Dominus.\n27\u00a0Levate signum in terra,\n clangite buccina in gentibus,\n sanctificate super eam gentes,\n annuntiate contra illam regibus Ararat, Menni, et Ascenez:\n numerate contra eam Taphsar,\n adducite equum quasi bruchum aculeatum.\n28\u00a0Sanctificate contra eam gentes,\n reges Medi\u00e6, duces ejus, et universos magistratus ejus,\n cunctamque terram potestatis ejus.\n29\u00a0Et commovebitur terra et conturbabitur,\n quia evigilabit contra Babylonem cogitatio Domini,\n ut ponat terram Babylonis desertam et inhabitabilem.\n30\u00a0Cessaverunt fortes Babylonis a pr\u00e6lio;\n habitaverunt in pr\u00e6sidiis:\n devoratum est robur eorum,\n et facti sunt quasi mulieres:\n incensa sunt tabernacula ejus,\n contriti sunt vectes ejus.\n31\u00a0Currens obviam currenti veniet,\n et nuntius obvius nuntianti,\n ut annuntiet regi Babylonis\n quia capta est civitas ejus a summo usque ad summum.\n32\u00a0Et vada pr\u00e6occupata sunt,\n et paludes incens\u00e6 sunt igni,\n et viri bellatores conturbati sunt.\n33\u00a0Quia h\u00e6c dicit Dominus exercituum, Deus Isra\u00ebl:\n Filia Babylonis quasi area,\n tempus tritur\u00e6 ejus:\n adhuc modicum, et veniet tempus messionis ejus.\n34\u00a0Comedit me, devoravit me Nabuchodonosor rex Babylonis:\n reddidit me quasi vas inane,\n absorbuit me quasi draco,\n replevit ventrem suum teneritudine mea, et ejecit me.\n35\u00a0Iniquitas adversum me\n et caro mea super Babylonem,\n dicit habitatio Sion:\n et sanguis meus super habitatores Chald\u00e6\u00e6, dicit Jerusalem.\n36\u00a0Propterea h\u00e6c dicit Dominus:\n Ecce ego judicabo causam tuam,\n et ulciscar ultionem tuam:\n et desertum faciam mare ejus,\n et siccabo venam ejus.\n37\u00a0Et erit Babylon in tumulos,\n habitatio draconum, stupor et sibilus,\n eo quod non sit habitator.\n38\u00a0Simul ut leones rugient;\n excutient comas veluti catuli leonum.\n39\u00a0In calore eorum ponam potus eorum,\n et inebriabo eos ut sopiantur,\n et dormiant somnum sempiternum,\n et non consurgant, dicit Dominus.\n40\u00a0Deducam eos quasi agnos ad victimam,\n et quasi arietes cum h\u00e6dis.\n41\u00a0Quomodo capta est Sesach,\n et comprehensa est inclyta univers\u00e6 terr\u00e6!\n quomodo facta est in stuporem Babylon inter gentes!\n42\u00a0Ascendit super Babylonem mare:\n multitudine fluctuum ejus operta est.\n43\u00a0Fact\u00e6 sunt civitates ejus in stuporem,\n terra inhabitabilis et deserta,\n terra in qua nullus habitet,\n nec transeat per eam filius hominis.\n44\u00a0Et visitabo super Bel in Babylone,\n et ejiciam quod absorbuerat de ore ejus:\n et non confluent ad eum ultra gentes,\n siquidem et murus Babylonis corruet.\n45\u00a0Egredimini de medio ejus, populus meus,\n ut salvet unusquisque animam suam ab ira furoris Domini,\n46\u00a0et ne forte mollescat cor vestrum,\n et timeatis auditum qui audietur in terra:\n et veniet in anno auditio,\n et post hunc annum auditio,\n et iniquitas in terra,\n et dominator super dominatorem.\n47\u00a0Propterea ecce dies veniunt,\n et visitabo super sculptilia Babylonis,\n et omnis terra ejus confundetur,\n et universi interfecti ejus cadent in medio ejus.\n48\u00a0Et laudabunt super Babylonem c\u00e6li et terra,\n et omnia qu\u00e6 in eis sunt:\n quia ab aquilone venient ei pr\u00e6dones, ait Dominus.\n49\u00a0Et quomodo fecit Babylon,\n ut caderent occisi in Isra\u00ebl,\n sic de Babylone\n cadent occisi in universa terra.\n50\u00a0Qui fugistis gladium, venite,\n nolite stare:\n recordamini procul Domini,\n et Jerusalem ascendat super cor vestrum.\n51\u00a0Confusi sumus, quoniam audivimus opprobrium:\n operuit ignominia facies nostras,\n quia venerunt alieni super sanctificationem domus Domini.\n52\u00a0Propterea ecce dies veniunt, ait Dominus,\n et visitabo super sculptilia ejus,\n et in omni terra ejus mugiet vulneratus.\n53\u00a0Si ascenderit Babylon in c\u00e6lum,\n et firmaverit in excelso robur suum,\n a me venient vastatores ejus, ait Dominus.\n54\u00a0Vox clamoris de Babylone,\n et contritio magna de terra Chald\u00e6orum:\n55\u00a0quoniam vastavit Dominus Babylonem,\n et perdidit ex ea vocem magnam:\n et sonabunt fluctus eorum quasi aqu\u00e6 mult\u00e6;\n dedit sonitum vox eorum:\n56\u00a0quia venit super eam, id est super Babylonem, pr\u00e6do,\n et apprehensi sunt fortes ejus,\n et emarcuit arcus eorum,\n quia fortis ultor Dominus reddens retribuet.\n57\u00a0Et inebriabo principes ejus, et sapientes ejus,\n et duces ejus, et magistratus ejus, et fortes ejus:\n et dormient somnum sempiternum,\n et non expergiscentur, ait Rex\n (Dominus exercituum nomen ejus).\n58\u00a0H\u00e6c dicit Dominus exercituum:\n Murus Babylonis ille latissimus suffossione suffodietur,\n et port\u00e6 ejus excels\u00e6 igni comburentur,\n et labores populorum ad nihilum,\n et gentium in ignem erunt, et disperibunt.]\n \n59 Verbum quod pr\u00e6cepit Jeremias propheta Sarai\u00e6 filio Neri\u00e6 filii Maasi\u00e6, cum pergeret cum Sedecia rege in Babylonem, in anno quarto regni ejus: Saraias autem erat princeps propheti\u00e6.\n60 Et scripsit Jeremias omne malum quod venturum erat super Babylonem, in libro uno: omnia verba h\u00e6c qu\u00e6 scripta sunt contra Babylonem.\n61 Et dixit Jeremias ad Saraiam: Cum veneris in Babylonem, et videris, et legeris omnia verba h\u00e6c,\n62 dices: Domine, tu locutus es contra locum istum, ut disperderes eum, ne sit qui in eo habitet, ab homine usque ad pecus, et ut sit perpetua solitudo.\n63 Cumque compleveris legere librum istum, ligabis ad eum lapidem, et projicies illum in medium Euphraten,\n64 et dices: Sic submergetur Babylon, et non consurget a facie afflictionis quam ego adduco super eam, et dissolvetur. Hucusque verba Jeremi\u00e6.","title":"Vulgate: Jeremiah: Jeremiah Chapter 51","type":"page"}