{"collection":"Bible & Christianity","html_url":"https://unchartedknowledge.5gfusion.net/browse/bib/vul/job003.htm","path":"bib/vul/job003.htm","source_url":"https://sacred-texts.com/bib/vul/job003.htm","text":"1 Post h\u00e6c aperuit Job os suum, et maledixit diei suo,\n2 et locutus est:\n3\u00a0[Pereat dies in qua natus sum,\n et nox in qua dictum est: Conceptus est homo.\n4\u00a0Dies ille vertatur in tenebras:\n non requirat eum Deus desuper,\n et non illustretur lumine.\n5\u00a0Obscurent eum tenebr\u00e6 et umbra mortis;\n occupet eum caligo,\n et involvatur amaritudine.\n6\u00a0Noctem illam tenebrosus turbo possideat;\n non computetur in diebus anni,\n nec numeretur in mensibus.\n7\u00a0Sit nox illa solitaria,\n nec laude digna.\n8\u00a0Maledicant ei qui maledicunt diei,\n qui parati sunt suscitare Leviathan.\n9\u00a0Obtenebrentur stell\u00e6 caligine ejus;\n expectet lucem, et non videat,\n nec ortum surgentis auror\u00e6.\n10\u00a0Quia non conclusit ostia ventris qui portavit me,\n nec abstulit mala ab oculis meis.\n11\u00a0Quare non in vulva mortuus sum?\n egressus ex utero non statim perii?\n12\u00a0Quare exceptus genibus?\n cur lactatus uberibus?\n13\u00a0Nunc enim dormiens silerem,\n et somno meo requiescerem\n14\u00a0cum regibus et consulibus terr\u00e6,\n qui \u00e6dificant sibi solitudines;\n15\u00a0aut cum principibus qui possident aurum,\n et replent domos suas argento;\n16\u00a0aut sicut abortivum absconditum non subsisterem,\n vel qui concepti non viderunt lucem.\n17\u00a0Ibi impii cessaverunt a tumultu,\n et ibi requieverunt fessi robore.\n18\u00a0Et quondam vincti pariter sine molestia,\n non audierunt vocem exactoris.\n19\u00a0Parvus et magnus ibi sunt,\n et servus liber a domino suo.\n20\u00a0Quare misero data est lux,\n et vita his qui in amaritudine anim\u00e6 sunt:\n21\u00a0qui expectant mortem, et non venit,\n quasi effodientes thesaurum;\n22\u00a0gaudentque vehementer\n cum invenerint sepulchrum?\n23\u00a0viro cujus abscondita est via\n et circumdedit eum Deus tenebris?\n24\u00a0Antequam comedam, suspiro;\n et tamquam inundantes aqu\u00e6, sic rugitus meus:\n25\u00a0quia timor quem timebam evenit mihi,\n et quod verebar accidit.\n26\u00a0Nonne dissimulavi? nonne silui? nonne quievi?\n et venit super me indignatio.]","title":"Vulgate: Job: Job Chapter 3","type":"page"}