{"collection":"Bible & Christianity","html_url":"https://unchartedknowledge.5gfusion.net/browse/bib/vul/job005.htm","path":"bib/vul/job005.htm","source_url":"https://sacred-texts.com/bib/vul/job005.htm","text":"1\u00a0[Voca ergo, si est qui tibi respondeat,\n et ad aliquem sanctorum convertere.\n2\u00a0Vere stultum interficit iracundia,\n et parvulum occidit invidia.\n3\u00a0Ego vidi stultum firma radice,\n et maledixi pulchritudini ejus statim.\n4\u00a0Longe fient filii ejus a salute,\n et conterentur in porta,\n et non erit qui eruat.\n5\u00a0Cujus messem famelicus comedet,\n et ipsum rapiet armatus,\n et bibent sitientes divitias ejus.\n6\u00a0Nihil in terra sine causa fit,\n et de humo non oritur dolor.\n7\u00a0Homo nascitur ad laborem,\n et avis ad volatum.\n8\u00a0Quam ob rem ego deprecabor Dominum,\n et ad Deum ponam eloquium meum:\n9\u00a0qui facit magna et inscrutabilia,\n et mirabilia absque numero;\n10\u00a0qui dat pluviam super faciem terr\u00e6,\n et irrigat aquis universa;\n11\u00a0qui ponit humiles in sublime,\n et m\u0153rentes erigit sospitate;\n12\u00a0qui dissipat cogitationes malignorum,\n ne possint implere manus eorum quod c\u0153perant;\n13\u00a0qui apprehendit sapientes in astutia eorum,\n et consilium pravorum dissipat.\n14\u00a0Per diem incurrent tenebras,\n et quasi in nocte, sic palpabunt in meridie.\n15\u00a0Porro salvum faciet egenum a gladio oris eorum,\n et de manu violenti pauperem.\n16\u00a0Et erit egeno spes;\n iniquitas autem contrahet os suum.\n17\u00a0Beatus homo qui corripitur a Deo:\n increpationem ergo Domini ne reprobes:\n18\u00a0quia ipse vulnerat, et medetur;\n percutit, et manus ejus sanabunt.\n19\u00a0In sex tribulationibus liberabit te,\n et in septima non tangent te malum.\n20\u00a0In fame eruet te de morte,\n et in bello de manu gladii.\n21\u00a0A flagello lingu\u00e6 absconderis,\n et non timebis calamitatem cum venerit.\n22\u00a0In vastitate et fame ridebis,\n et bestias terr\u00e6 non formidabis.\n23\u00a0Sed cum lapidibus regionum pactum tuum,\n et besti\u00e6 terr\u00e6 pacific\u00e6 erunt tibi.\n24\u00a0Et scies quod pacem habeat tabernaculum tuum;\n et visitans speciem tuam, non peccabis.\n25\u00a0Scies quoque quoniam multiplex erit semen tuum,\n et progenies tua quasi herba terr\u00e6.\n26\u00a0Ingredieris in abundantia sepulchrum,\n sicut infertur acervus tritici in tempore suo.\n27\u00a0Ecce hoc, ut investigavimus, ita est:\n quod auditum, mente pertracta.]","title":"Vulgate: Job: Job Chapter 5","type":"page"}