{"collection":"Bible & Christianity","html_url":"https://unchartedknowledge.5gfusion.net/browse/bib/vul/job009.htm","path":"bib/vul/job009.htm","source_url":"https://sacred-texts.com/bib/vul/job009.htm","text":"1 Et respondens Job, ait:\n2\u00a0[Vere scio quod ita sit,\n et quod non justificetur homo compositus Deo.\n3\u00a0Si voluerit contendere cum eo,\n non poterit ei respondere unum pro mille.\n4\u00a0Sapiens corde est, et fortis robore:\n quis restitit ei, et pacem habuit?\n5\u00a0Qui transtulit montes, et nescierunt\n hi quos subvertit in furore suo.\n6\u00a0Qui commovet terram de loco suo,\n et column\u00e6 ejus concutiuntur.\n7\u00a0Qui pr\u00e6cipit soli, et non oritur,\n et stellas claudit quasi sub signaculo.\n8\u00a0Qui extendit c\u00e6los solus,\n et graditur super fluctus maris.\n9\u00a0Qui facit Arcturum et Oriona,\n et Hyadas et interiora austri.\n10\u00a0Qui facit magna, et incomprehensibilia,\n et mirabilia, quorum non est numerus.\n11\u00a0Si venerit ad me, non videbo eum;\n si abierit, non intelligam.\n12\u00a0Si repente interroget, quis respondebit ei?\n vel quis dicere potest: Cur ita facis?\n13\u00a0Deus, cujus ir\u00e6 nemo resistere potest,\n et sub quo curvantur qui portant orbem.\n14\u00a0Quantus ergo sum ego, ut respondeam ei,\n et loquar verbis meis cum eo?\n15\u00a0qui etiam si habuero quippiam justum, non respondebo:\n sed meum judicem deprecabor.\n16\u00a0Et cum invocantem exaudierit me,\n non credo quod audierit vocem meam.\n17\u00a0In turbine enim conteret me,\n et multiplicabit vulnera mea, etiam sine causa.\n18\u00a0Non concedit requiescere spiritum meum,\n et implet me amaritudinibus.\n19\u00a0Si fortitudo qu\u00e6ritur, robustissimus est;\n si \u00e6quitas judicii, nemo audet pro me testimonium dicere.\n20\u00a0Si justificare me voluero, os meum condemnabit me;\n si innocentem ostendero, pravum me comprobabit.\n21\u00a0Etiam si simplex fuero, hoc ipsum ignorabit anima mea,\n et t\u00e6debit me vit\u00e6 me\u00e6.\n22\u00a0Unum est quod locutus sum:\n et innocentem et impium ipse consumit.\n23\u00a0Si flagellat, occidat semel,\n et non de p\u0153nis innocentum rideat.\n24\u00a0Terra data est in manus impii;\n vultum judicum ejus operit.\n Quod si non ille est, quis ergo est?\n25\u00a0Dies mei velociores fuerunt cursore;\n fugerunt, et non viderunt bonum.\n26\u00a0Pertransierunt quasi naves poma portantes;\n sicut aquila volans ad escam.\n27\u00a0Cum dixero: Nequaquam ita loquar:\n commuto faciem meam, et dolore torqueor.\n28\u00a0Verebar omnia opera mea,\n sciens quod non parceres delinquenti.\n29\u00a0Si autem et sic impius sum,\n quare frustra laboravi?\n30\u00a0Si lotus fuero quasi aquis nivis,\n et fulserint velut mundissim\u00e6 manus me\u00e6,\n31\u00a0tamen sordibus intinges me,\n et abominabuntur me vestimenta mea.\n32\u00a0Neque enim viro qui similis mei est, respondebo;\n nec qui mecum in judicio ex \u00e6quo possit audiri.\n33\u00a0Non est qui utrumque valeat arguere,\n et ponere manum suam in ambobus.\n34\u00a0Auferat a me virgam suam,\n et pavor ejus non me terreat.\n35\u00a0Loquar, et non timebo eum;\n neque enim possum metuens respondere.]","title":"Vulgate: Job: Job Chapter 9","type":"page"}