{"collection":"Bible & Christianity","html_url":"https://unchartedknowledge.5gfusion.net/browse/bib/vul/job017.htm","path":"bib/vul/job017.htm","source_url":"https://sacred-texts.com/bib/vul/job017.htm","text":"1\u00a0[Spiritus meus attenuabitur;\n dies mei breviabuntur:\n et solum mihi superest sepulchrum.\n2\u00a0Non peccavi,\n et in amaritudinibus moratur oculus meus.\n3\u00a0Libera me, Domine, et pone me juxta te,\n et cujusvis manus pugnet contra me.\n4\u00a0Cor eorum longe fecisti a disciplina:\n propterea non exaltabuntur.\n5\u00a0Pr\u00e6dam pollicetur sociis,\n et oculi filiorum ejus deficient.\n6\u00a0Posuit me quasi in proverbium vulgi,\n et exemplum sum coram eis.\n7\u00a0Caligavit ab indignatione oculus meus,\n et membra mea quasi in nihilum redacta sunt.\n8\u00a0Stupebunt justi super hoc,\n et innocens contra hypocritam suscitabitur.\n9\u00a0Et tenebit justus viam suam,\n et mundis manibus addet fortitudinem.\n10\u00a0Igitur omnes vos convertimini, et venite,\n et non inveniam in vobis ullum sapientem.\n11\u00a0Dies mei transierunt;\n cogitationes me\u00e6 dissipat\u00e6 sunt,\n torquentes cor meum.\n12\u00a0Noctem verterunt in diem,\n et rursum post tenebras spero lucem.\n13\u00a0Si sustinuero, infernus domus mea est,\n et in tenebris stravi lectulum meum.\n14\u00a0Putredini dixi: Pater meus es;\n Mater mea, et soror mea, vermibus.\n15\u00a0Ubi est ergo nunc pr\u00e6stolatio mea?\n et patientiam meam quis considerat?\n16\u00a0In profundissimum infernum descendent omnia mea:\n putasne saltem ibi erit requies mihi?]","title":"Vulgate: Job: Job Chapter 17","type":"page"}