{"collection":"Bible & Christianity","html_url":"https://unchartedknowledge.5gfusion.net/browse/bib/vul/job018.htm","path":"bib/vul/job018.htm","source_url":"https://sacred-texts.com/bib/vul/job018.htm","text":"1 Respondens autem Baldad Suhites, dixit:\n2\u00a0[Usque ad quem finem verba jactabitis?\n intelligite prius, et sic loquamur.\n3\u00a0Quare reputati sumus ut jumenta,\n et sorduimus coram vobis?\n4\u00a0Qui perdis animam tuam in furore tuo,\n numquid propter te derelinquetur terra,\n et transferentur rupes de loco suo?\n5\u00a0Nonne lux impii extinguetur,\n nec splendebit flamma ignis ejus?\n6\u00a0Lux obtenebrescet in tabernaculo illius,\n et lucerna qu\u00e6 super eum est extinguetur.\n7\u00a0Arctabuntur gressus virtutis ejus,\n et pr\u00e6cipitabit eum consilium suum.\n8\u00a0Immisit enim in rete pedes suos,\n et in maculis ejus ambulat.\n9\u00a0Tenebitur planta illius laqueo,\n et exardescet contra eum sitis.\n10\u00a0Abscondita est in terra pedica ejus,\n et decipula illius super semitam.\n11\u00a0Undique terrebunt eum formidines,\n et involvent pedes ejus.\n12\u00a0Attenuetur fame robur ejus,\n et inedia invadat costas illius.\n13\u00a0Devoret pulchritudinem cutis ejus;\n consumat brachia illius primogenita mors.\n14\u00a0Avellatur de tabernaculo suo fiducia ejus,\n et calcet super eum, quasi rex, interitus.\n15\u00a0Habitent in tabernaculo illius socii ejus qui non est;\n aspergatur in tabernaculo ejus sulphur.\n16\u00a0Deorsum radices ejus siccentur:\n sursum autem atteratur messis ejus.\n17\u00a0Memoria illius pereat de terra,\n et non celebretur nomen ejus in plateis.\n18\u00a0Expellet eum de luce in tenebras,\n et de orbe transferet eum.\n19\u00a0Non erit semen ejus, neque progenies in populo suo,\n nec ull\u00e6 reliqui\u00e6 in regionibus ejus.\n20\u00a0In die ejus stupebunt novissimi,\n et primos invadet horror.\n21\u00a0H\u00e6c sunt ergo tabernacula iniqui,\n et iste locus ejus qui ignorat Deum.]","title":"Vulgate: Job: Job Chapter 18","type":"page"}