{"collection":"Bible & Christianity","html_url":"https://unchartedknowledge.5gfusion.net/browse/bib/vul/job019.htm","path":"bib/vul/job019.htm","source_url":"https://sacred-texts.com/bib/vul/job019.htm","text":"1 Respondens autem Job, dixit:\n2\u00a0[Usquequo affligitis animam meam,\n et atteritis me sermonibus?\n3\u00a0En decies confunditis me,\n et non erubescitis opprimentes me.\n4\u00a0Nempe etsi ignoravi,\n mecum erit ignorantia mea.\n5\u00a0At vos contra me erigimini,\n et arguitis me opprobriis meis.\n6\u00a0Saltem nunc intelligite quia Deus non \u00e6quo judicio afflixerit me,\n et flagellis suis me cinxerit.\n7\u00a0Ecce clamabo, vim patiens, et nemo audiet;\n vociferabor, et non est qui judicet.\n8\u00a0Semitam meam circumsepsit, et transire non possum:\n et in calle meo tenebras posuit.\n9\u00a0Spoliavit me gloria mea,\n et abstulit coronam de capite meo.\n10\u00a0Destruxit me undique, et pereo:\n et quasi evuls\u00e6 arbori abstulit spem meam.\n11\u00a0Iratus est contra me furor ejus,\n et sic me habuit quasi hostem suum.\n12\u00a0Simul venerunt latrones ejus,\n et fecerunt sibi viam per me,\n et obsederunt in gyro tabernaculum meum.\n13\u00a0Fratres meos longe fecit a me,\n et noti mei quasi alieni recesserunt a me.\n14\u00a0Dereliquerunt me propinqui mei,\n et qui me noverant obliti sunt mei.\n15\u00a0Inquilini domus me\u00e6 et ancill\u00e6 me\u00e6 sicut alienum habuerunt me,\n et quasi peregrinus fui in oculis eorum.\n16\u00a0Servum meum vocavi, et non respondit:\n ore proprio deprecabar illum.\n17\u00a0Halitum meum exhorruit uxor mea,\n et orabam filios uteri mei.\n18\u00a0Stulti quoque despiciebant me:\n et cum ab eis recessissem, detrahebant mihi.\n19\u00a0Abominati sunt me quondam consiliarii mei,\n et quem maxime diligebam, aversatus est me.\n20\u00a0Pelli me\u00e6, consumptis carnibus, adh\u00e6sit os meum,\n et derelicta sunt tantummodo labia circa dentes meos.\n21\u00a0Miseremini mei, miseremini mei saltem vos, amici mei,\n quia manus Domini tetigit me.\n22\u00a0Quare persequimini me sicut Deus,\n et carnibus meis saturamini?\n23\u00a0Quis mihi tribuat ut scribantur sermones mei?\n quis mihi det ut exarentur in libro\n24\u00a0stylo ferreo et plumbi lamina,\n vel celte sculpantur in silice?\n25\u00a0Scio enim quod redemptor meus vivit,\n et in novissimo die de terra surrecturus sum:\n26\u00a0et rursum circumdabor pelle mea,\n et in carne mea videbo Deum meum:\n27\u00a0quem visurus sum ego ipse,\n et oculi mei conspecturi sunt, et non alius:\n reposita est h\u00e6c spes mea in sinu meo.\n28\u00a0Quare ergo nunc dicitis: Persequamur eum,\n et radicem verbi inveniamus contra eum?\n29\u00a0Fugite ergo a facie gladii,\n quoniam ultor iniquitatum gladius est:\n et scitote esse judicium.]","title":"Vulgate: Job: Job Chapter 19","type":"page"}