{"collection":"Bible & Christianity","html_url":"https://unchartedknowledge.5gfusion.net/browse/bib/vul/job026.htm","path":"bib/vul/job026.htm","source_url":"https://sacred-texts.com/bib/vul/job026.htm","text":"1 Respondens autem Job dixit:\n2\u00a0[Cujus adjutor es? numquid imbecillis?\n et sustentas brachium ejus qui non est fortis?\n3\u00a0Cui dedisti consilium?\n forsitan illi qui non habet sapientiam:\n et prudentiam tuam ostendisti plurimam.\n4\u00a0Quem docere voluisti?\n nonne eum qui fecit spiramentum?\n5\u00a0Ecce gigantes gemunt sub aquis,\n et qui habitant cum eis.\n6\u00a0Nudus est infernus coram illo,\n et nullum est operimentum perditioni.\n7\u00a0Qui extendit aquilonem super vacuum,\n et appendit terram super nihilum.\n8\u00a0Qui ligat aquas in nubibus suis,\n ut non erumpant pariter deorsum.\n9\u00a0Qui tenet vultum solii sui,\n et expandit super illud nebulam suam.\n10\u00a0Terminum circumdedit aquis,\n usque dum finiantur lux et tenebr\u00e6.\n11\u00a0Column\u00e6 c\u00e6li contremiscunt,\n et pavent ad nutum ejus.\n12\u00a0In fortitudine illius repente maria congregata sunt,\n et prudentia ejus percussit superbum.\n13\u00a0Spiritus ejus ornavit c\u00e6los,\n et obstetricante manu ejus, eductus est coluber tortuosus.\n14\u00a0Ecce h\u00e6c ex parte dicta sunt viarum ejus:\n et cum vix parvam stillam sermonis ejus audierimus,\n quis poterit tonitruum magnitudinis illius intueri?]","title":"Vulgate: Job: Job Chapter 26","type":"page"}