{"collection":"Bible & Christianity","html_url":"https://unchartedknowledge.5gfusion.net/browse/bib/vul/job028.htm","path":"bib/vul/job028.htm","source_url":"https://sacred-texts.com/bib/vul/job028.htm","text":"1\u00a0[Habet argentum venarum suarum principia,\n et auro locus est in quo conflatur.\n2\u00a0Ferrum de terra tollitur,\n et lapis solutus calore in \u00e6s vertitur.\n3\u00a0Tempus posuit tenebris,\n et universorum finem ipse considerat:\n lapidem quoque caliginis et umbram mortis.\n4\u00a0Dividit torrens a populo peregrinante\n eos quos oblitus est pes egentis hominis, et invios.\n5\u00a0Terra de qua oriebatur panis,\n in loco suo igni subversa est.\n6\u00a0Locus sapphiri lapides ejus,\n et gleb\u00e6 illius aurum.\n7\u00a0Semitam ignoravit avis,\n nec intuitus est eam oculus vulturis.\n8\u00a0Non calcaverunt eam filii institorum,\n nec pertransivit per eam le\u00e6na.\n9\u00a0Ad silicem extendit manum suam:\n subvertit a radicibus montes.\n10\u00a0In petris rivos excidit,\n et omne pretiosum vidit oculus ejus.\n11\u00a0Profunda quoque fluviorum scrutatus est,\n et abscondita in lucem produxit.\n12\u00a0Sapientia vero ubi invenitur?\n et quis est locus intelligenti\u00e6?\n13\u00a0Nescit homo pretium ejus,\n nec invenitur in terra suaviter viventium.\n14\u00a0Abyssus dicit: Non est in me,\n et mare loquitur: Non est mecum.\n15\u00a0Non dabitur aurum obrizum pro ea,\n nec appendetur argentum in commutatione ejus.\n16\u00a0Non conferetur tinctis Indi\u00e6 coloribus,\n nec lapidi sardonycho pretiosissimo vel sapphiro.\n17\u00a0Non ad\u00e6quabitur ei aurum vel vitrum,\n nec commutabuntur pro ea vasa auri.\n18\u00a0Excelsa et eminentia non memorabuntur comparatione ejus:\n trahitur autem sapientia de occultis.\n19\u00a0Non ad\u00e6quabitur ei topazius de \u00c6thiopia,\n nec tinctur\u00e6 mundissim\u00e6 componetur.\n20\u00a0Unde ergo sapientia venit?\n et quis est locus intelligenti\u00e6?\n21\u00a0Abscondita est ab oculis omnium viventium:\n volucres quoque c\u00e6li latet.\n22\u00a0Perditio et mors dixerunt:\n Auribus nostris audivimus famam ejus.\n23\u00a0Deus intelligit viam ejus,\n et ipse novit locum illius.\n24\u00a0Ipse enim fines mundi intuetur,\n et omnia qu\u00e6 sub c\u00e6lo sunt respicit.\n25\u00a0Qui fecit ventis pondus,\n et aquas appendit in mensura.\n26\u00a0Quando ponebat pluviis legem,\n et viam procellis sonantibus:\n27\u00a0tunc vidit illam et enarravit,\n et pr\u00e6paravit, et investigavit.\n28\u00a0Et dixit homini: Ecce timor Domini, ipsa est sapientia;\n et recedere a malo, intelligentia.]","title":"Vulgate: Job: Job Chapter 28","type":"page"}