{"collection":"Bible & Christianity","html_url":"https://unchartedknowledge.5gfusion.net/browse/bib/vul/job031.htm","path":"bib/vul/job031.htm","source_url":"https://sacred-texts.com/bib/vul/job031.htm","text":"1\u00a0[Pepigi f\u0153dus cum oculis meis,\n ut ne cogitarem quidem de virgine.\n2\u00a0Quam enim partem haberet in me Deus desuper,\n et h\u00e6reditatem Omnipotens de excelsis?\n3\u00a0Numquid non perditio est iniquo,\n et alienatio operantibus injustitiam?\n4\u00a0Nonne ipse considerat vias meas,\n et cunctos gressus meos dinumerat?\n5\u00a0Si ambulavi in vanitate,\n et festinavit in dolo pes meus,\n6\u00a0appendat me in statera justa,\n et sciat Deus simplicitatem meam.\n7\u00a0Si declinavit gressus meus de via,\n et si secutum est oculos meos cor meum,\n et si manibus meis adh\u00e6sit macula,\n8\u00a0seram, et alius comedat,\n et progenies mea eradicetur.\n9\u00a0Si deceptum est cor meum super muliere,\n et si ad ostium amici mei insidiatus sum,\n10\u00a0scortum alterius sit uxor mea,\n et super illam incurventur alii.\n11\u00a0Hoc enim nefas est,\n et iniquitas maxima.\n12\u00a0Ignis est usque ad perditionem devorans,\n et omnia eradicans genimina.\n13\u00a0Si contempsi subire judicium cum servo meo et ancilla mea,\n cum disceptarent adversum me:\n14\u00a0quid enim faciam cum surrexerit ad judicandum Deus?\n et cum qu\u00e6sierit, quid respondebo illi?\n15\u00a0Numquid non in utero fecit me, qui et illum operatus est,\n et formavit me in vulva unus?\n16\u00a0Si negavi quod volebant pauperibus,\n et oculos vidu\u00e6 expectare feci;\n17\u00a0si comedi buccellam meam solus,\n et non comedit pupillus ex ea\n18\u00a0(quia ab infantia mea crevit mecum miseratio,\n et de utero matris me\u00e6 egressa est mecum);\n19\u00a0si despexi pereuntem, eo quod non habuerit indumentum,\n et absque operimento pauperem;\n20\u00a0si non benedixerunt mihi latera ejus,\n et de velleribus ovium mearum calefactus est;\n21\u00a0si levavi super pupillum manum meam,\n etiam cum viderem me in porta superiorem:\n22\u00a0humerus meus a junctura sua cadat,\n et brachium meum cum suis ossibus confringatur.\n23\u00a0Semper enim quasi tumentes super me fluctus timui Deum,\n et pondus ejus ferre non potui.\n24\u00a0Si putavi aurum robur meum,\n et obrizo dixi: Fiducia mea;\n25\u00a0si l\u00e6tatus sum super multis divitiis meis,\n et quia plurima reperit manus mea;\n26\u00a0si vidi solem cum fulgeret,\n et lunam incedentem clare,\n27\u00a0et l\u00e6tatum est in abscondito cor meum,\n et osculatus sum manum meam ore meo:\n28\u00a0qu\u00e6 est iniquitas maxima,\n et negatio contra Deum altissimum.\n29\u00a0Si gavisus sum ad ruinam ejus qui me oderat,\n et exsultavi quod invenisset eum malum:\n30\u00a0non enim dedi ad peccandum guttur meum,\n ut expeterem maledicens animam ejus.\n31\u00a0Si non dixerunt viri tabernaculi mei:\n Quis det de carnibus ejus, ut saturemur?\n32\u00a0foris non mansit peregrinus:\n ostium meum viatori patuit.\n33\u00a0Si abscondi quasi homo peccatum meum,\n et celavi in sinu meo iniquitatem meam;\n34\u00a0si expavi ad multitudinem nimiam,\n et despectio propinquorum terruit me:\n et non magis tacui, nec egressus sum ostium.\n35\u00a0Quis mihi tribuat auditorem,\n ut desiderium meum audiat Omnipotens,\n et librum scribat ipse qui judicat,\n36\u00a0ut in humero meo portem illum,\n et circumdem illum quasi coronam mihi?\n37\u00a0Per singulos gradus meos pronuntiabo illum,\n et quasi principi offeram eum.\n38\u00a0Si adversum me terra mea clamat,\n et cum ipsa sulci ejus deflent:\n39\u00a0si fructus ejus comedi absque pecunia,\n et animam agricolarum ejus afflixi:\n40\u00a0pro frumento oriatur mihi tribulus,\n et pro hordeo spina.] Finita sunt verba Job.","title":"Vulgate: Job: Job Chapter 31","type":"page"}