{"collection":"Bible & Christianity","html_url":"https://unchartedknowledge.5gfusion.net/browse/bib/vul/job034.htm","path":"bib/vul/job034.htm","source_url":"https://sacred-texts.com/bib/vul/job034.htm","text":"1 Pronuntians itaque Eliu, etiam h\u00e6c locutus est:\n2\u00a0[Audite, sapientes, verba mea:\n et eruditi, auscultate me.\n3\u00a0Auris enim verba probat,\n et guttur escas gustu dijudicat.\n4\u00a0Judicium eligamus nobis,\n et inter nos videamus quid sit melius.\n5\u00a0Quia dixit Job: Justus sum,\n et Deus subvertit judicium meum.\n6\u00a0In judicando enim me mendacium est:\n violenta sagitta mea absque ullo peccato.\n7\u00a0Quis est vir ut est Job,\n qui bibit subsannationem quasi aquam:\n8\u00a0qui graditur cum operantibus iniquitatem,\n et ambulat cum viris impiis?\n9\u00a0Dixit enim: Non placebit vir Deo,\n etiam si cucurrerit cum eo.\n10\u00a0Ideo, viri cordati, audite me:\n absit a Deo impietas,\n et ab Omnipotente iniquitas.\n11\u00a0Opus enim hominis reddet ei,\n et juxta vias singulorum restituet eis.\n12\u00a0Vere enim Deus non condemnabit frustra,\n nec Omnipotens subvertet judicium.\n13\u00a0Quem constituit alium super terram?\n aut quem posuit super orbem quem fabricatus est?\n14\u00a0Si direxerit ad eum cor suum,\n spiritum illius et flatum ad se trahet.\n15\u00a0Deficiet omnis caro simul,\n et homo in cinerem revertetur.\n16\u00a0Si habes ergo intellectum, audi quod dicitur,\n et ausculta vocem eloquii mei:\n17\u00a0numquid qui non amat judicium sanari potest?\n et quomodo tu eum qui justus est in tantum condemnas?\n18\u00a0Qui dicit regi: Apostata;\n qui vocat duces impios;\n19\u00a0qui non accipit personas principum,\n nec cognovit tyrannum cum disceptaret contra pauperem:\n opus enim manuum ejus sunt universi.\n20\u00a0Subito morientur, et in media nocte turbabuntur populi:\n et pertransibunt, et auferent violentum absque manu.\n21\u00a0Oculi enim ejus super vias hominum,\n et omnes gressus eorum considerat.\n22\u00a0Non sunt tenebr\u00e6, et non est umbra mortis,\n ut abscondantur ibi qui operantur iniquitatem,\n23\u00a0neque enim ultra in hominis potestate est,\n ut veniat ad Deum in judicium.\n24\u00a0Conteret multos, et innumerabiles,\n et stare faciet alios pro eis.\n25\u00a0Novit enim opera eorum,\n et idcirco inducet noctem, et conterentur.\n26\u00a0Quasi impios percussit eos\n in loco videntium:\n27\u00a0qui quasi de industria recesserunt ab eo,\n et omnes vias ejus intelligere noluerunt:\n28\u00a0ut pervenire facerent ad eum clamorem egeni,\n et audiret vocem pauperum.\n29\u00a0Ipso enim concedente pacem, quis est qui condemnet?\n ex quo absconderit vultum, quis est qui contempletur eum,\n et super gentes, et super omnes homines?\n30\u00a0Qui regnare facit hominem hypocritam\n propter peccata populi.\n31\u00a0Quia ergo ego locutus sum ad Deum,\n te quoque non prohibebo.\n32\u00a0Si erravi, tu doce me;\n si iniquitatem locutus sum, ultra non addam.\n33\u00a0Numquid a te Deus expetit eam, quia displicuit tibi?\n tu enim c\u0153pisti loqui, et non ego:\n quod si quid nosti melius, loquere.\n34\u00a0Viri intelligentes loquantur mihi,\n et vir sapiens audiat me.\n35\u00a0Job autem stulte locutus est,\n et verba illius non sonant disciplinam.\n36\u00a0Pater mi, probetur Job usque ad finem:\n ne desinas ab homine iniquitatis:\n37\u00a0quia addit super peccata sua blasphemiam,\n inter nos interim constringatur:\n et tunc ad judicium provocet sermonibus suis Deum.]","title":"Vulgate: Job: Job Chapter 34","type":"page"}