{"collection":"Bible & Christianity","html_url":"https://unchartedknowledge.5gfusion.net/browse/bib/vul/job037.htm","path":"bib/vul/job037.htm","source_url":"https://sacred-texts.com/bib/vul/job037.htm","text":"1\u00a0[Super hoc expavit cor meum,\n et emotum est de loco suo.\n2\u00a0Audite auditionem in terrore vocis ejus,\n et sonum de ore illius procedentem.\n3\u00a0Subter omnes c\u00e6los ipse considerat,\n et lumen illius super terminos terr\u00e6.\n4\u00a0Post eum rugiet sonitus;\n tonabit voce magnitudinis su\u00e6:\n et non investigabitur, cum audita fuerit vox ejus.\n5\u00a0Tonabit Deus in voce sua mirabiliter,\n qui facit magna et inscrutabilia;\n6\u00a0qui pr\u00e6cipit nivi ut descendat in terram,\n et hiemis pluviis, et imbri fortitudinis su\u00e6;\n7\u00a0qui in manu omnium hominum signat,\n ut noverint singuli opera sua.\n8\u00a0Ingredietur bestia latibulum,\n et in antro suo morabitur.\n9\u00a0Ab interioribus egredietur tempestas,\n et ab Arcturo frigus.\n10\u00a0Flante Deo, concrescit gelu,\n et rursum latissim\u00e6 funduntur aqu\u00e6.\n11\u00a0Frumentum desiderat nubes,\n et nubes spargunt lumen suum.\n12\u00a0Qu\u00e6 lustrant per circuitum,\n quocumque eas voluntas gubernantis duxerit,\n ad omne quod pr\u00e6ceperit illis super faciem orbis terrarum:\n13\u00a0sive in una tribu, sive in terra sua,\n sive in quocumque loco misericordi\u00e6 su\u00e6\n eas jusserit inveniri.\n14\u00a0Ausculta h\u00e6c, Job:\n sta, et considera mirabilia Dei.\n15\u00a0Numquid scis quando pr\u00e6ceperit Deus pluviis,\n ut ostenderent lucem nubium ejus?\n16\u00a0Numquid nosti semitas nubium magnas,\n et perfectas scientias?\n17\u00a0Nonne vestimenta tua calida sunt,\n cum perflata fuerit terra austro?\n18\u00a0Tu forsitan cum eo fabricatus es c\u00e6los,\n qui solidissimi quasi \u00e6re fusi sunt.\n19\u00a0Ostende nobis quid dicamus illi:\n nos quippe involvimur tenebris.\n20\u00a0Quis narrabit ei qu\u00e6 loquor?\n etiam si locutus fuerit homo, devorabitur.\n21\u00a0At nunc non vident lucem:\n subito a\u00ebr cogetur in nubes,\n et ventus transiens fugabit eas.\n22\u00a0Ab aquilone aurum venit,\n et ad Deum formidolosa laudatio.\n23\u00a0Digne eum invenire non possumus:\n magnus fortitudine, et judicio, et justitia:\n et enarrari non potest.\n24\u00a0Ideo timebunt eum viri,\n et non audebunt contemplari omnes qui sibi videntur esse sapientes.]","title":"Vulgate: Job: Job Chapter 37","type":"page"}