{"collection":"Bible & Christianity","html_url":"https://unchartedknowledge.5gfusion.net/browse/bib/vul/joe003.htm","path":"bib/vul/joe003.htm","source_url":"https://sacred-texts.com/bib/vul/joe003.htm","text":"1\u00a0[Quia ecce in diebus illis, et in tempore illo,\n cum convertero captivitatem Juda et Jerusalem,\n2\u00a0congregabo omnes gentes,\n et deducam eas in vallem Josaphat;\n et disceptabo cum eis ibi super populo meo,\n et h\u00e6reditate mea Isra\u00ebl,\n quos disperserunt in nationibus,\n et terram meam diviserunt.\n3\u00a0Et super populum meum miserunt sortem;\n et posuerunt puerum in prostibulo,\n et puellam vendiderunt pro vino ut biberent.\n4\u00a0Verum quid mihi et vobis, Tyrus et Sidon,\n et omnis terminus Pal\u00e6stinorum?\n numquid ultionem vos reddetis mihi?\n et si ulciscimini vos contra me,\n cito velociter reddam vicissitudinem vobis super caput vestrum.\n5\u00a0Argentum enim meum et aurum tulistis,\n et desiderabilia mea et pulcherrima intulistis in delubra vestra.\n6\u00a0Et filios Juda et filios Jerusalem vendidistis filiis Gr\u00e6corum,\n ut longe faceretis eos de finibus suis.\n7\u00a0Ecce ego suscitabo eos de loco in quo vendidistis eos,\n et convertam retributionem vestram in caput vestrum.\n8\u00a0Et vendam filios vestros et filias vestras in manibus filiorum Juda,\n et venundabunt eos Sab\u00e6is, genti longinqu\u00e6,\n quia Dominus locutus est.\n9\u00a0Clamate hoc in gentibus,\n sanctificate bellum,\n suscitate robustos:\n accedant, ascendant omnes viri bellatores.\n10\u00a0Concidite aratra vestra in gladios,\n et ligones vestros in lanceas.\n Infirmus dicat: Quia fortis ego sum.\n11\u00a0Erumpite, et venite, omnes gentes de circuitu,\n et congregamini;\n ibi occumbere faciet Dominus robustos tuos.\n12\u00a0Consurgant, et ascendant gentes in vallem Josaphat,\n quia ibi sedebo ut judicem omnes gentes in circuitu.\n13\u00a0Mittite falces, quoniam maturavit messis;\n venite, et descendite,\n quia plenum est torcular, exuberant torcularia:\n quia multiplicata est malitia eorum.\n14\u00a0Populi, populi, in valle concisionis,\n quia juxta est dies Domini in valle concisionis.\n15\u00a0Sol et luna obtenebrati sunt,\n et stell\u00e6 retraxerunt splendorem suum.\n16\u00a0Et Dominus de Sion rugiet,\n et de Jerusalem dabit vocem suam,\n et movebuntur c\u00e6li et terra;\n et Dominus spes populi sui,\n et fortitudo filiorum Isra\u00ebl.\n17\u00a0Et scietis quia ego Dominus Deus vester,\n habitans in Sion monte sancto meo;\n et erit Jerusalem sancta,\n et alieni non transibunt per eam amplius.\n18\u00a0Et erit in die illa: stillabunt montes dulcedinem,\n et colles fluent lacte,\n et per omnes rivos Juda ibunt aqu\u00e6;\n et fons de domo Domini egredietur,\n et irrigabit torrentem spinarum.\n19\u00a0\u00c6gyptus in desolationem erit,\n et Idum\u00e6a in desertum perditionis,\n pro eo quod inique egerint in filios Juda,\n et effuderint sanguinem innocentem in terra sua.\n20\u00a0Et Jud\u00e6a in \u00e6ternum habitabitur,\n et Jerusalem in generationem et generationem.\n21\u00a0Et mundabo sanguinem eorum, quem non mundaveram;\n et Dominus commorabitur in Sion.]","title":"Vulgate: Joel: Joel Chapter 3","type":"page"}